У судзе Менскага раёну пачалі разглядаць крымінальную справу 18-гадовага Іларыёна Б. Калі яго затрымалі сёлета ў лютым, ён яшчэ вучыўся ў 11 клясе 59-й менскай школы і быў непаўналетнім. Цяпер яго вінавацяць па 4 частцы 328 артыкула Крымінальнага кодэксу — у распаўсюдзе наркотыкаў у складзе групы.
«На загад нявысьветленай асобы», «пры нявысьветленых абставінах», «у нявысьветлены час» — гучала з вуснаў пракурора.
Справа Іларыёна Б. разглядаецца на фоне нядаўняй галадоўкі актывістак руху «Маці 328», якія патрабавалі сустрэчы з Лукашэнкам. Галадоўніцы казалі, што шмат юнакоў адбываюць вялікія тэрміны за «пыл у кішэні».
За што пагражае да 15 гадоў зьняволеньня Іларыёну Б.?
Нагандляваў на 500 рублёў
«Сам набыў наркотык і сам прадаваў, ніякай групы не было, таму не прызнаю 4 частку 328 артыкула, а ўсё астатняе прызнаю», — заявіў суду Іларыён Б. Ён сказаў, што ў 2017 годзе за 800 рублёў набыў 73 грамы наркотыку, зь іх пасьпеў зрабіць 5 закладак па 5 грамаў, астатнія трымаў дома.
«Пасьпеў атрымаць 500 рублёў на картку за 2 закладкі».
Паводле падсуднага, закладкі ён рабіў каля вёскі Антані́шкі Менскага раёну, недалёка ад якой жылі ягоныя бацькі. Здымаў закладкі на айфон ды зьмяшчаў у інтэрнэце здымкі з інструкцыяй для спажыўцоў. «Усё проста».
«Google ведае ўсё»
Сваю кампэтэнтнасьць у справе набыцьця і распаўсюду наркотыкаў Іларыён Б. тлумачыць наяўнасьцю інтэрнэту.
«З інтэрнэту даведаўся, што „Альфа ПВП“ — хадавы наркотык».
«Так, што ён небясьпечны, чытаў у інтэрнэце».
«Набраў у Google „праца мінёра“ — там усё ёсьць, што рабіць».
«Сьпісаўся з прадаўцом: Здрасьце, трэба столькі і столькі такога і такога».
Вэрсія сьледзтва: атрымліваў загады ў складзе групы
Паводле сьледзтва, Іларыён Б. зьдзяйсьняў злачынствы ў складзе групы, у якой былі разьмеркаваныя ролі. Ён атрымліваў загады «нявысьветленай асобы», дакладна іх выконваў, рабіў справаздачы, пра што сьведчаць зьвесткі ў ягоным тэлефоне і ноўтбуку.
— А ці знайшлі таго, хто ўцягнуў яго ў гэтую непрыгожую справу і прадаваў наркотыкі? — запытваў сьведак-міліцыянтаў адвакат.
— Ня ведаю, — адказаў опэрупаўнаважаны Менскага РАУС Сяргей Навіцкі.
Аляксандар Малафееў з управы наркакантролю, які браў удзел у аглядзе кватэры, дзе жыў Іларыён Б., не раскрыў суду і таго, як міліцыя выйшла на сьлед падсуднага. «Гэта была апэратыўная інфармацыя».
Лукашэнка запатрабаваў у Шуневіча адрозьніваць пакараньні спажыўцам і пастаўшчыкам наркотыкаў
Мала што дадаў і опэрупаўнаважаны Навіцкі: «З наркакантролю нам паступілі зьвесткі, што ў кватэры на вуліцы Касманаўтаў могуць быць наркотыкі».
Паводле яшчэ аднаго опэрупаўнаважанага, Уладзіслава Піхты зь Менскай раённай міліцыі, калі Б. затрымлівалі, пры ім быў ноўтбук, у якім знайшлі фатаздымкі закладкі наркотыкаў.
«Вобшук быў гадзіны 3–4. Панятыя прысутнічалі, канечне. У шафе знайшлі шэраг скруткаў з наркотыкамі», — сказаў сьведка.
Яшчэ міліцыянт прызнаў, што ведаў пра ўзрост Іларыёна Б. на момант затрыманьня — пра тое, што таму яшчэ не было 18 гадоў. Але які быў статус Б. падчас вобшуку — затрыманага ці не — Уладзіслаў Піхта не адказаў. «Не магу згадаць, бо дакумэнты аб затрыманьні складаў ня я».
Між тым, паводле адваката, гэта важнае пытаньне: ці абʼявілі Б. падчас ператрусу, што ён затрыманы? Бо паводле закону пра затрыманьне яму — як непаўналетняму — мусяць абвясьціць пры бацьках. Гаспадыня аднапакаёвай кватэры, у якой жыў і Б., заявіла суду, што міліцыянты ў яе не пыталіся дазволу на агляд кватэры.
— А вы былі супраць?
— Паспрабавала б я. Уварваліся шасьцёра мужыкоў...
«Думаў, прадам і больш ня буду»
Школу хлопец так і ня скончыў, бо арыштавалі яго за тры месяцы да выпускнога. З бацькамі ён ня жыў, хоць, кажа, падтрымлівае зь імі добрыя адносіны (між тым на працэс бацькі не прыйшлі). Са сваёй непаўналетняй сяброўкай Іларыён Б. здымаў пакой у Менску.
«Пашкадаваў, у яе бацькі пітушчыя, бʼюцца, узяў да сябе». «Хацелі ажаніцца».
«Ён добры, абараняў мяне ад маці», — сказала суду дзяўчына.
Дзіўна, але ў тым самым пакоі зь імі жыла і гаспадыня аднапакаёўкі — маладая жанчына зь дзіцем. «Станоўчы малады чалавек, таленавіты, музыку піша», — ахарактарызавала яна падсуднага.
Продажам наркотыкаў Іларыён заняўся, бо былі патрэбныя грошы.
«Думаў, прадам і больш ня буду. Пішу песьні для вядомых музыкаў. Назва хоць адной маёй песьні? Гэта сакрэт», — сказаў падсудны.
«Для мяне быў такі шок, калі ў яго знайшлі тую вагу, тыя скруткі з наркотыкамі! Даставалі зь ягонага заплечніка, з кішэняў. Ніколі б не магла пра яго падумаць!» — распавяла гаспадыня кватэры.
«Паддаўся імгненнай слабасьці», — падсумаваў Іларыён Б. пры канцы пасяджэньня.
