Алег Дзерыпаска вярнуў тры прыватныя самалёты, якія знаходзіліся ў яго ў лізінгу. Пра гэта паведамляе Reuters.
Па дадзеных агенцтва, прычынай такога кроку сталі санкцыі ЗША, нядаўна ўведзеныя ў дачыненьні да бізнэсмэна.
Гаворка ідзе пра рэактыўныя самалёты бізнэс-клясы. Два з іх выстаўлены на продаж па кошце амаль 30 мільёнаў даляраў кожны.
Продажам самалётаў займаецца кампанія Freestream. Там удакладнілі, што Дзерыпаска абавязаны скасаваць дамовы лізінгу ў адпаведнасьці з санкцыйнымі патрабаваньнямі.
6 красавіка Міністэрства фінансаў ЗША ўвяло санкцыі ў дачыненьні да 38 расейскіх бізнэсоўцаў і кампаніяў. Абмежаваньні ўведзеныя ў адпаведнасьці з законам аб супрацьстаяньні супернікам Амэрыкі, прынятым Кангрэсам ЗША ў мінулым годзе.
