Суд Гомельскага раёну 15 лістапада пачне разгляд крымінальнай справы ў дачыненьні падарожніка з Францыі Жаляна Віё. Яго вінавацяць паводле часткі 2 артыкулу 295 (незаконная перавозка агнястрэльнай зброі) і часткі 1 артыкулу 333-1 (незаконнае абарачэньне моцнадзейных ці атрутных рэчываў) Крымінальнага кодэксу Рэспублікі Беларусь. Пра гэта паведаміла на сваёй старонцы ў Facebook прэсавы сакратар абласнога суду Вольга Барсукова.
Затрымалі французскага падарожніка ў верасьні на памежным пункце пропуску Новая Гута і зьмясьцілі ў Гомельскі сьледчы ізалятар № 3. Жалян кіраваўся ва Ўкраіну, перасякаў беларускую мяжу пешшу і, як сьцьвярджаюць мытнікі, не задэкляраваў патрон, які знаходзіўся ў кішэні ягонага заплечніка.
Экспэртыза ўстанавіла, што пісталетны патрон калібру 9×19 прызначаны для стральбы з пісталетаў Раrabellum P-08, Walter P-38, пісталета-кулямёта МР-38 ды некаторых іншых відаў агнястрэльнай зброі згаданага калібру.
У чым віна француза паводле артыкулу 333-1, пакуль невядома.
Сам Жалян Віё пісаў на волю менскаму сябру, што пры пераходзе беларускай мяжы выбраў «чырвоны калідор», каб дэкляраваць рэчы і патрон, падораны яму ў якасьці сувэніра калегам з Польшчы.
Пра арышт Віё даведаліся ягоныя сваякі ў Францыі і распачалі ў сеціве ды СМІ кампанію за яго вызваленьне зь «беларускага палону».
«Я хутка пакрыюся лёдам». Сваякі затрыманага француза пра яго падарожжа ў «беларускае пекла»
Становішча францускага падарожніка абцяжаранае тым, што дадзены яму адвакат не валодаў ані французскай, ані ангельскай моваю. Француз, у сваю чаргу, ня ведае ні беларускай, ні расейскай.
Журналістам у Гомелі ўдалося распытаць жанчыну, чый сын сядзіць у адной камэры з Жалянам Віё.
«У лісьце сын паведаміў, што знаходзіцца ў адной камэры з маладым французам. Небарака, ён нічога не разумее, разгублены такі. Сын піша, што шкадуе француза, дзеліцца зь ім харчамі, калі сам атрымлівае з дому перадачу». Вядома, што француз абураецца ўмовамі ўтрыманьня ў ізалятары.
Намесьнік начальніка ізалятару Юры Лавец раней у размове з гомельскімі журналістамі адрэагаваў на нараканьні:
«Умовы ўтрыманьня ў беларускім ізалятары, пэўна, адрозьніваюцца ад францускіх. Але ніякае тут ня пекла, гэта глупства».
