«Сёньня, 9 жніўня, спаўняецца 107 гадоў, як нарадзілася выбітная беларуская паэтка, дысыдэнтка і грамадзянка БНР Ларыса Антонаўна Геніюш. Мы, актывісты Моладзі БНФ, зь вялікай павагай ставімся да асобы і да творчасьці Ларысы Геніюш, таму ня можам праігнараваць гэтую сьвяточную дату і аб’яўляем інтэрнэт-акцыю, каб ушанаваць яе памяць», — гаворыцца ў паведамленьні арганізацыі.
Удзельнікам флэшмобу прапаноўваецца напісаць, чаму варта рэабілітаваць Ларысу Геніюш і дадаць яе творчасьць у школьную праграму.
«Ларыса Геніюш ня толькі зрабіла вялікі ўклад у беларускую літаратуру, але ўяўляе сабой цудоўны прыклад змаганьня, стойкасьці і непахіснасьці. Гэтай жанчыне давялося зьведаць мноства выпрабаваньняў. Але, нягледзячы ні на што, яна годна вытрымала ўсе цяжкасьці. Таму ўшанаваць памяць Ларысы Геніюш у яе Дзень народзінаў — гэта справа гонару любога сьвядомага патрыёта сучаснай Беларусі», — сьцьвярджаюць актывісты.
Моладзь БНФ больш за год дамагаецца рэабілітацыі Ларысы Геніюш. Актывісты абвясьцілі конкурс эсэ на тэму «Чаму варта рэабілітаваць Ларысу Геніюш?», а таксама зьбіралі подпісы за тое, каб надаць імя паэткі адной з вуліц у Зэльве.
