Прозьвішчы судзьдзяў, якія беспадстаўна каралі за «лаянку», «непадпарадкаваньне міліцыі», «удзел у несанкцыянаваным мерапрыемстве», прыведзеныя ў табліцы, падрыхтаванай праваабаронцамі «Вясны».
Сярод іншага ў базе «Вясны» значыцца 17 прысудаў, вынесеных у пэрыяд паміж 1 студзеня 2016 году і 14 сакавіка 2017-га Валерам Есьманам. Летась у кастрычніку ён асудзіў да 2 гадоў пазбаўленьня волі з адтэрміноўкай выкананьня прысуду Зьмітра Паліенку. 7 красавіка ў сувязі з адміністрацыйнымі выракамі актывіста прысуд яму быў заменены рэальным тэрмінам у калёніі.
Зафіксавана таксама 19 палітычных прысудаў, вынесеных судзьдзём Віктарам Казаком у пэрыяд паміж 1 студзеня 2016 году і 17 лютага 2017-га. Ён, у прыватнасьці, прысудзіў актывісту Паўлу Вінаградаву штраф за акцыю пратэсту 17 лютага 2017 году. Пасьля Казак выносіў выракі за акцыі 25 і 26 сакавіка ў Менску, у тым ліку палітыку Алесю Лагвінцу, які быў прэвэнтыўна затрыманы напярэдадні масавых мерапрыемстваў.
Але рэкардсмэнка ў гэтым пераліку судзьдзя Тацяна Матыль, якая ў пэрыяд паміж 1 студзеня 2016 году і 10 сакавіка 2017-га вынесла 31 прысуд з палітычных матываў. Яна судзіла затрыманых 25 і 26 сакавіка, у тым ліку журналіста тэлеканалу «Белсат» Аляксандра Баразенку, які асьвятляў акцыю на Дзень Волі ў Менску.
31 ліпеня 2015 году Рада Эўразьвязу выключыла з санкцыйнага сьпісу беларускіх судзьдзяў, датычных да палітычнага перасьледу грамадзянаў у 2010-2012 гадах.
