Рассельгаснагляд часткова рэабілітаваў беларускае мяса і малако

15 красавік 2017, 16:25

Пункт пропуску «Красная Горка» на шашы М-1. Ілюстрацыйнае фота

Цяпер у Расею «Вялес – Міт» можа пастаўляць ялавічыну і гатовую мясную прадукцыю, а «Бабушкіна крынка» – малочную прадукцыю (за выключэньнем сыроў і сухога малака).

Пра гэта паведаміла афіцыйная прадстаўніца расейскага ведамства Юлія Мэла.

«Улічваючы вынікі аналізу матэрыялаў, атрыманых падчас праведзенай інспекцыі ў Рэспубліцы Беларусь у пэрыяд з 5 па 13 красавіка 2017 года, Рассельгаснагляд дазволіў ажыцьцяўляць пастаўкі прадукцыі з двух беларускіх прадпрыемстваў», – сказала яна.

У Маскве ў пятніцу прайшлі перамовы па выніках інспэкцыі беларускіх прадпрыемстваў. Расейскі бок прадстаўляў намесьнік міністра сельскай гаспадаркі Яўген Непаклонаў, беларускі – міністар сельскай гаспадаркі Леанід Заяц. На сустрэчы былі падведзеныя вынікі інспэкцыі 18 беларускіх прадпрыемстваў. Канчатковую справаздачу Рассельгаснагляд накіруе Беларусі 20 красавіка, адзначыла Мэла.

З 6 лютага Рассельгаснагляд увёў забарону на пастаўкі ялавічыны і ялавічных субпрадуктаў зь Менскай вобласці. Па словах міністра сельскай гаспадаркі РФ Аляксандра Ткачова, Беларусь стала «перавалачнай базай», празь якую ў Расею трапляюць санкцыйныя прадукты. З моманту ўвядзення харчовага эмбарга ў 2014 годзе Беларусь скарысталася перавагамі зоны свабоднага гандлю на тэрыторыі ЭўрАзЭС і заняла нішу ў больш за 15% у расейскім імпарце, падкрэсьліваў Ткачоў. У 2012 годзе доля паставак прадукцыі зь Беларусі не перавышала 1%.

Акрамя таго, у Рассельгаснагляду былі прэтэнзіі да малочнай прадукцыі, вырабленай у самой Беларусі. Ўвоз гэтай прадукцыі з шэрагу беларускіх прадпрыемстваў у Расею таксама быў забаронены.

Беларускі бок лічыць, што забароны Рассельгаснагляду неабгрунтаваныя. Аляксандр Лукашэнка нават заявіў, што даручыў МУС Беларусі завесьці крымінальную справу на кіраўніка Рассельгаснагляду за «ўчыненьне шкоды дзяржаве».