Кіраўнік «Рассельгаснагляду» Сяргей Данкверт папрасіў зьняць зь яго абавязкі па кантролі за пастаўкамі тавараў зь Беларусі. Сваю заяву Данкверт зрабіў сёньня на міжнародным аграрным форуме «Овощкульт», перадае ТАСС:
«Я папрасіў кіраўніцтва адвесьці мяне ўбок, таму што, можа, я сапраўды шкоднік нейкі. Разьбірайцеся з крымінальнай справай», — сказаў расейскі чыноўнік.
3 лютага Аляксандар Лукашэнка падчас сустрэчы з журналістамі і экспэртнай супольнасьцю заявіў, што ў дачыненьні да кіраўніка «Рассельгаснагляду» Сяргея Данкверта трэба распачаць крымінальную справу. У адказ на гэта спадар Данкверт рэкамэндаваў навесьці парадак на беларускіх прадпрыемствах.
Сёньня кіраўнік «Рассельгаснагляду» з трыбуны форуму сказаў, што Беларусь у некалькі разоў павялічыла пастаўкі ў Расею шэрагу відаў расьлінаводчай прадукцыі, у тым ліку пладоў інжыру:
«Буракоў у 3 разы больш, насеннай бульбы — у 1,9 раза, нават інжыр і грыбы шыітаке [— рост] у 3,6 раза», — сказаў Данкверт.
Ён дадаў, што, паводле дадзеных кантрольных пунктаў ведамства на мяжы зь Беларусьсю, пастаўкі харчовай бульбы ў Расею ў студзені-сакавіку 2017 году вырасьлі ў гадавым вылічэньні ў 2,6 раза, морквы — у 2,3 раза, капусты — у 3,4 раза, цыбулі — у 15,4 раза.
«Яны прадугледзелі, у мінулым годзе вырасьцілі больш цыбулі, каб нам паставіць сюды. Гэта значыць, яны ведалі, чаго ў нас ня будзе хапаць у першым квартале», — сказаў Данкверт.
Што тычыцца магчымага новага куратара гандлю зь Беларусьсю, то ім можа стаць Яўген Непаклонаў. З 2011 году ён быў намесьнікам кіраўніка «Рассельгаснагляду», а месяц таму яго прызначылі намесьнікам міністра сельскай гаспадаркі.
7 лютага Міністэрства ўнутраных спраў Беларусі заявіла, што праводзіцца шэраг праверак па дзеяньнях, якія зьмяшчаюць прыкметы дыскрэдытацыі дзелавой рэпутацыі беларускіх прадпрыемстваў. 14 сакавіка ў МУС паведамілі, што праверка ў дачыненьні да Данкверта «цяпер у самым разгары». Сам Данкверт заявіў, што ўстрымаецца ад паездак у Беларусь, а калі і прыедзе, то «толькі з тэлебачаньнем», нягледзячы на запэўніваньні кіраўніка Міністэрства сельскай гаспадаркі і харчаваньня Беларусі Леаніда Зайца, што той гарантуе Данкверту вяртаньне ў Расею. А напрыканцы сакавіка паведамлялася, што кіраўнік «Рассельгаснагляду» ўжо адказаў на пытаньні Генэральнай пракуратуры Беларусі.
