Беларуская музыка Кацярына Ваданосава выдала на Soundcloud альбом «Мітатворчасьць». Гэта першы сольны альбом Ваданосавай, якая раней грала з гуртамі Alta Mente і «Птушыны шлях». У альбоме яна выступіла як сьпявачка, мультыінструмэнталістка, аўтарка тэкстаў і музыкі.
Кацярына гаворыць пра альбом як пра збор мітаў і легендаў, на якіх стаіць яе ўнутраны сьвет. У запісе ўзялі ўдзел музыкі, якія граюць на розных інструмэнтах: віялянчэль, цымбалы, беларуская дуда, бас-гітара, электраскрыпка... У альбоме спалучаецца музыка эўрапейскага Сярэднявечча, Рэнэсансу, барока, сучаснага року і беларускіх матываў.
«Я расказала гісторыю, якую сама хацела б пачуць; я стварыла ўласную міталёгію, што арганічна ўпісваецца ў сьветаўспрыманьне беларусаў і, як ні дзіўна, здольная гарманічна існаваць у нашай паўсядзённай рэчаіснасьці», — кажа сьпявачка пра альбом.
Жывая прэзэнтацыя альбому заплянаваная на 2 сьнежня ў менскай кавярні «Грай», уваход вольны. Кацярыну Ваданосаву падтрымаюць бард Яўген Барышнікаў, скрыпач Зьміцер Кацечаў ды іншыя музыкі, якія ўзялі ўдзел у стварэньні альбому.
Кацярына Ваданосава — адна зь нешматлікіх жанчын-дудароў, супрацоўніца Літаратурнага музэю Янкі Купалы, паэтка, нярэдка выступае ў якасьці фотамадэлі, вырабляе мастацкія пераплёты кніг. Пра ўсё гэта яна нядаўна распавядала Свабодзе ў перадачы «Вольная студыя».
