Працэсы пачаліся ў 9.30 і ўжо да 11 скончыліся. Актывіст Алесь Макаеў быў аштрафаваны на 50 базавых велічынь, прадпрымальнік з Барысава Алесь Абрамовіч — на 40 базавых, Міхал Латышаў з Гомеля атрымаў 15 базавых велічынь штрафу, як і актывіст Маладога фронту Павал Старавойтаў. Сябра БХД Павал Пракаповіч аштрафаваны на 25 базавых велічынь.
Працэсы над актывістамі праходзілі вельмі хутка. Судзьдзі адмовіліся апытваць сьведак, якіх прапанавалі самі затрыманыя, а ў якасьці асноўнага доказу правапарушэньня называлі відэа, запісанае міліцыянтамі. Алесь Абрамовіч праглядаць відэа адмовіўся. Актывіст паведаміў суду, што зьвяртаўся да гарадзкіх уладаў Жодзіна па дазвол на правядзеньне мітынгу салідарнасьці з прадпрымальнікамі на мясцовым рынку, але яму было адмоўлена.
«Лічу, што гэта незаконна — не дазваляць праводзіць акцыі пратэсту. Мы хацелі пратэставаць супроць таго, што пры ўладзе ў Беларусі знаходзіцца банда, краінай кіруе мафія», — казаў суду Алесь Абрамовіч, які з-за перашкод і ціску мусіў спыніць прадпрымальніцкую дзейнасьць.
Летась Алеся Абрамовіча ўжо штрафавалі на 3 мільёны 150 тысяч і 2 мільёны 100 тысяч за ўдзел у акцыях пратэсту. Абрамовічу цяжка рухацца, ён інвалід, але працягвае выходзіць на пратэстныя акцыі. Адметна, што на словы Абрамовіча пра мафію судзьдзя ніяк не адрэагаваў, як і на папрокі пасьля працэсу, што ён асудзіў інваліда.
«З нас кожны застаецца пры сваёй думцы», — сказаў судзьдзя і закрыў паседжаньне.
Усе асуджаныя актывісты, акрамя Алеся Абрамовіча, правялі два дні ў Жодзінскім ізалятары часовага ўтрыманьня. Актывіст БХД Павал Пракаповіч назваў умовы ў Жодзінскім ізалятары жудаснымі:
«У камэры было вельмі брудна, кармілі толькі два разы на дзень выключна халоднай ежай, не давалі мыла і ручніка, каб памыцца, пасьцельныя рэчы такія, што спаць немагчыма», — распавёў Павал Пракаповіч.
Каб падтрымаць сябраў «Салідарнасьці», у Жодзіна на суды прыехала вялікая група актывістаў. У тым ліку новы кіраўнік Руху салідарнасьці «Разам» Мікалай Аўтуховіч, сустаршыня БХД Павал Севярынец, апазыцыянэр Вячаслаў Сіўчык — усяго каля 20 актывістаў. Пасьля судоў яны рушылі ў Барысаў, каб ускласьці кветкі да магілы беларускага патрыёта Юркі Моніча, якога ў 1923 годзе забілі бальшавікі.
Актывісты аргкамітэту прафсаюзу прадпрымальнікаў «Салідарнасьць» паведамілі, што не адмовіліся ад плянаў ладзіць новыя мітынгі прадпрымальнікаў у Баранавічах і Воршы. Раней такія мітынгі прайшлі ў Маладзечне, Барысаве і Жодзіне. Прадпрымальнікі змагаюцца за адмену 222-га прэзыдэнцкага ўказу, які забараніў гандляваць рэчамі без сэртыфікатаў.
