За Лукашэнку больш за 80%, Караткевіч — каля 5%. Спантаннае шэсьце да Плошчы Незалежнасьці

Рэпер Вожык: Мы пад пляшку гарэлкі ўжо пяты раз абіраем Лукашэнку

Рэпер Вожык да дня выбараў прэзэнтуе на сайце «Арт Сядзібы» свой новы твор — сумную песьню-развагу «Абіраем Лукашэнку».

Галасаваньне на тле буфэтаў, канцэртаў і кірмашоў

Галасаваньне 11 кастрычніка ў многіх месцах суправаджалася выступамі калектываў мастацкай самадзейнасьці, выбарчыя ўчасткі абслугоўвалі прадпрыемствы грамадзкага харчаваньня. Шмат дзе выбарцаў заваблівалі выязным гандлем прамысловымі таварамі і сельгаспрадукцыяй.

Кіраўнік МЗС Літвы: Беларусы баяцца перамен

Жыхары Беларусі баяцца перамен, таму на выбарах абіраюць стабільнасьць — заявіў кіраўнік літоўскай дыпляматыі Лінас Лінкявічус, ацэньваючы прэзыдэнцкія выбары ў Беларусі.

«Людзі баяцца перамен, выбіраюць мінімальны ўзровень жыцьця, тое, што маюць, бо ня ведаюць, ці будзе лепей», — сказаў Лінкявічус у інтэрвію для літоўскага грамадзкага радыё.

Калегі пішуць, што Лукашэнка прагаласаваў за Караткевіч

Сябра камісіі хацела зьбіраць галасы на вуліцы

Пра гэта паведамляе кампанія па назіраньні за выбарамі EOTP. Выпадак адбыўся на 64-м участку ў Гомелі. Адна зь сябраў камісіі сказала, што ня хоча наведваць выбарнікаў дома і лепш пазьбірае галасы на вуліцы.

«Я што, буду хадзіць па бабках, станем каля крамы і будзем зьбіраць» — заявіла жанчына.

Назіральнік выклікаў міліцыю і напісаў скаргу, адбыўся невялікі канфлікт. Старшыня камісіі папрасіў не паведамляць пра інцыдэнт.

«Галасуем, але ў перамены ня верым...»

На выбарчых участках у Горадні асабліва з 11-й да 14-й гадзіны, шматлюдна, але атмасфэры сьвята і радасьці не адчуваецца.

Асабліва значны наплыў выбарцаў можна было назіраць у новых мікрараёнах, дзе ў адной школе па чатыры і нават пяць выбарчых участкаў. Адны заходзяць, іншыя выходзяць, у фае тоўпяцца перад распродажам сувэніраў, грыміць музыка, шмат людзей у буфэтах, нехта ўжо слухае канцэрт у актавай зале.

ЦВК: яўка на выбарах ужо перавысіла 74%

Цэнтравыбаркам абвесьціў новыя дадзеныя аб удзельніках галасаваньня на прэзыдэнцкіх выбарах — сярэдняя яўка па краіне на 16.00 склала 74,61%.

«Хочацца пераменаў, каб не было гэтак сумна, як цяпер», — выбары ў Магілёве

Незалежныя назіральнікі ў Магілёве заяўляюць пра вялікія разьбежкі ў падліках тых, хто прагаласаваў, зь лічбамі ўчастковых камісіяў. Тым часам ва ўчастковых камісіях сьцьвярджаюць: прэтэнзіяў да іхняй працы з боку назіральнікаў няма.

Лукашэнка ў выбарчым антуражы

Участак № 1 для галасаваньня ў Беларускім дзяржаўным унівэрсытэце фізычнай культуры і спорту ад раніцы больш нагадваў умацаваную крэпасьць, чым навучальную ўстанову. Тут чакалі самых галоўных выбарцаў краіны — Аляксандра Лукашэнку і ягонага малодшага сына Мікалая.

Тыя, хто захацеў выканаць свой грамадзянскі абавязак раней за іншых, магчыма, і пашкадавалі пра пасьпешлівасьць. Яны мусілі прайсьці даволі прыніжальную працэдуру падвойнага ператрусу — спачатку на подступах да будынку, а потым пры ўваходзе. Гэтак працягвалася да паўдня, пакуль Лукашэнка не прагаласаваў і ня зьехаў, паразмаўляўшы яшчэ гадзіну з журналістамі.

У буфэце на ўчастку насупраць управы КДБ — 50 найменьняў алькагольных напояў

У буфэце 20-га выбарчага ўчастку, што ў будынку гімназіі № 42, назіральнікі налічылі ў продажы 50 найменьняў сьпіртных напояў. На разьліў іх прадаюць без нацэнкі, папярэджвае аб’ява ў буфэце.

У буфэце на ўчастку насупраць управы КДБ — 50 найменьняў алькагольных напояў

У буфэце 20-га выбарчага ўчастку, што ў будынку гімназіі № 42, назіральнікі налічылі ў продажы 50 найменьняў сьпіртных напояў. На разьліў іх прадаюць без нацэнкі, папярэджвае аб’ява ў буфэце.

Берасьце: «Калі б не было Караткевіч, галасавалі б за Лукашэнку»

У Берасьці, як і ў іншых мясьцінах, галасаваньне суправаджаецца канцэртамі ды таннымі буфэтамі. Назіральнікі фіксуюць парушэньні, некаторыя выбарцы кажуць, што «калі б не было Караткевіч, то галасавалі б за Лукашэнку».

Назіральнікам забаранілі карыстацца мабільнай сувязьзю

Старшыня 34-й выбарчай камісіі забараніў назіральнікам карыстацца тэлефонамі. Пра гэта паведамляе кампанія «Права выбару».

Паводле гэтай інфармацыі, назіральнікі адмовіліся выконваць гэтае рашэньне і напісалі скаргі. Яны гатовыя быць пазбаўленыя акрэдытацыі, кажа прадстаўнік кампаніі Ільля Дабратвор.

Варта адзначыць, што «Права выбару» выкарыстоўвае мабільную прыладу «Вочы» і СМС для апэратыўнага збору інфармацыі. Паводле правілаў кампаніі, назіральнікі павінны перадаць першыя дадзеныя ў 20:30 з дапамогай тэлефонаў.

«Актыўнае назіраньне дало плён — парушэньняў стала менш». Хроніка з выбарчага ўчастку, адкуль вялі відэатрансьляцыю

Праз актыўнасьць назіральнікаў на выбарчым участку стала менш парушэньняў. Пасьля заяваў у ЦВК тут замянялі пакой для галасаваньня, каб назіральнікі маглі бачыць скрыню для бюлетэняў. Але стаўленьне да назіральнікаў засталося ранейшае: старшыня камісіі мае права забараніць назіральнікам ня толькі здымаць відэа, але й дыхаць.

Бабруйск. Стыхійны мітынг у дзень выбараў

У Бабруйску жыхары дому № 18 на вуліцы Гагарына ў дзень выбараў выйшлі на стыхійны мітынг з-за слабога ацяпленьня.

Embed share

Бабруйск: стыхійны мітынг у дзень выбараў

Embed share

The code has been copied to your clipboard.

---

width px height px

---

The URL has been copied to your clipboard

No media source currently available

0:00 0:03:38 0:00

У Менску на 18:00 яўка 67,7%

Старшыня Менскай гарадской камісіі па выбарах прэзыдэнта Беларусі Зьміцер Шаўцоў паведаміў, што 11 кастрычніка па стане на 18:00 яўка ў сталіцы склала 67,7%, піша belrynok.by. Дадзеныя па іншых рэгіёнах пакуль не даступныя.

Яўка па Менску на 16:00. склала 60,67%, а ў цэлым па краіне — 74,61%.

ЦВК: яўка на выбарах ужо амаль 82%

Цэнтравыбаркам абвясьціў новыя дадзеныя пра ўдзельнікаў галасаваньня на прэзыдэнцкіх выбарах — сярэдняя яўка па краіне на 18:00 склала 81,77%.

Наўпроставыя ўключэньні з Плошчы