Дакладнае паходжаньне цэлюліту невядомае. Многія аўтары лічаць, што гэтая зьява мае шэраг прычынаў, у тым ліку структурныя, генэтычныя і эндакрынныя (гарманальныя). Цэлюліт паўстае з цэлага шэрагу складаных запаленчых зьяў у падскурных тлушчавых тканінах і дэрме. Страта вагі рэдка суправаджаецца істотным памяншэньнем цэлюліту.
Аднак пэўныя дыетычныя стратэгіі могуць прывесьці да паляпшэньня агульнага стану скуры і, такім чынам, да памяншэньня цэлюліту. Тым, хто хоча красавацца летам у купальніку, варта прыняць да ўвагі наступныя рэкамэндацыі.
1. Піце дастаткова вады
Пастаўце сваёй мэтай выпіваць як мінімум 2 літры вадкасьці за дзень. Калі вы п’яце мала вадкасьці, і 2 літры (8 шклянак) падаецца вам жахлівай колькасьцю, ідзіце да сваёй мэты паступова. Дадавайце адну дадатковую шклянку вады за тыдзень.
Вада неабходная для ўсіх мэтабалічных працэсаў у арганізьме. Недахоп вады прыводзіць да абязводжваньня, у выніку чаго скура страчвае тонус.
2. Абмяжуйце спажываньне солі
Звычайная кухонная соль складаецца зь дзьвюх частак — хлярыду і натрыю. Занадта высокае спажываньне натрыю можа прывесьці да ацёку. А цэлюліт, як мяркуецца, часьцей за ўсе пачынаецца з хранічных лякальных міжтканкавых ацёкаў.
Абмяжуйце спажываньне солі да максымальна 6 г на дзень, што складае 1 чайную лыжку. Прыміце да ўвагі і колькасьць солі, якую вы спажываеце з гатовымі прадуктамі, бо амаль 80 % солі мы спажываем у складзе прамыслова вырабленых прадуктаў. Падлічана, што толькі пятая частка спажываньня солі — гэта сталовая соль, якую мы самі дадаём падчас прыгатаваньня ежы. Асноўнымі крыніцамі солі зьяўляюцца хлеб, мясныя прадукты і сыр. Напрыклад, 3 лустачкі хлеба ўтрымліваюць 1 г солі, 2 лустачкі сыру — 0,5 г солі. Іншыя прадукты, багатыя на соль: булённыя кубікі, соевы соўс, салямі, бэкон, марынаваныя прадукты, усе прамыслова вырабленыя запраўкі для салатаў і соўсы, салёная і вэнджаная рыба і мяса, рыбныя кансэрвы.
3. Адмоўцеся ад алькаголю
Алькаголь — першы сябар цэлюліту. Па-першае, ён вельмі калярыйны і да таго ж стымулюе апэтыт, што прыводзіць да набору вагі, асабліва пры рэгулярным ужываньні. Па-другое, ён можа спрыяць абязводжваньню арганізму і, адпаведна, скуры. Па-трэцяе, ён прыводзіць да акісьляльных працэсаў у арганізьме. Акісьленьне можа прывесьці да хранічнага запаленьня, якое, у сваю чаргу, таксама зьяўляецца важным фактарам разьвіцьця цэлюліту.
4. Ешце трускаўкі
Трускаўкі — выдатная крыніца вітаміну С. Вітамін С спрыяе нармальнай фармацыі калягену. Усяго толькі 100 грам трускавак утрымлівае сутачную дозу вітаміну С і ўсяго толькі 35 калёрый. Іншыя добрыя крыніцы вітаміну С: шчаўе, парэчка, ківі, чырвоны перац.
5. Ешце грэчку
Грэчка вельмі багатая крыніца рутыну. Рутын — гэта біяфляваноід, які дапамагае арганізму эфэктыўна выкарыстоўваць вітамін С і выпрацоўваць каляген. Каляген ёсьць асноўным будаўнічым блёкам скуры. Грэцкія крупы таксама ўтрымліваюць шмат цынку, медзі, марганцу, магнію, ніяцыну і рыбафлявіну — усе гэтыя элемэнты адыгрываюць ролю ў падтрыманьні здаровага стану скуры. Рутын таксама знойдзем у цытрусавых, яблыках (у скурцы), чорнай гарбаце.
6. Піце зялёную гарбату
Зялёная гарбата зьяўляецца надзвычайнай крыніцай антыаксыданту марганцу і ў залежнасьці ад гатунку ўтрымлівае да 50% сутачнай нормы гэтага мінэралу на адзін кубак. Без рэгулярнага паступленьня антыаксыдантаў з прадуктаў харчаваньня арганізм ня можа справіцца з наступствамі акісьляльнага стрэсу, які, як гаварылася вышэй, ёсьць адным з фактараў разьвіцьця цэлюліту.
7. Дадатковая парада: пачніце сілавыя трэніроўкі
Сядзячы лад жыцьця — шлях да адрузлай скуры. Цягліцы губляюць тонус, і цела становіцца больш друзлым. Да таго ж, цягліцы спальваюць больш калёрый, чым тлушч, нават у стане спакою. Пастаўце мэтай хадзіць у спартовую залю мінімальна два разы на тыдзень. Дадатковай мэтай павінен быць рух памяркоўнай нагрузкі (хада, язда на ровары) як мінімум 150 хвілін на дзень. Калі вам не стае самадысцыпліны, дамоўцеся займацца спортам разам зь сябрам/сяброўкай ці калегам.
