Выступаючы 9 лістапада на мітынгу каля Лошыцкага яра ў Менску, намесьнік старшыні Кансэрватыўна-хрысьціянскай партыі — БНФ Юрась Беленькі заклікаў грамадзян Беларусі карыстацца беларускай мовай.
«Сёньня мы знаходзімся ў стане акупацыйнай вайны з Расеяй. Толькі наша беларуская мова можа паставіць заслон гэтай агрэсіі», — мяркуе палітык.
«Размаўляючы па-руску, ты пасіўна зьнішчаеш беларусаў», — дадаў Беленькі, падкрэсьліўшы пры гэтым, што беларусы «выжывуць, нягледзячы ні на што».
Беленькі заявіў, што цяперашнія ўлады Беларусі хаваюць у Лошыцкім яры «нешта важнае і ганебнае для сябе».
«Рэжым ня хоча раскрываць праўды пра бальшавіцкія рэпрэсіі. На гэтым месцы ў свабоднай незалежнай Беларусі зьявіцца мэмарыял, справядлівасьць будзе адноўлена. На магілах не павінны знаходзіцца пясок і аўтамабілі (зараз за дваццаць мэтраў ад памятнага знаку ў гонар бязьвінна забітых ахвяраў сталінскіх рэпрэсій знаходзяцца аўтастаянкі, вядуцца будаўніча-рамонтныя работы. — БелаПАН)», — сказаў палітык.
Мітынг працягваўся каля паўгадзіны. На ім выступілі прадстаўнікі КХП — БНФ.
Акцыя была прымеркаваная да дня памяці продкаў «Дзяды», традыцыйна арганізаваная Кансерватыўна-хрысціянскай партыяй — БНФ. Шэсьце ад Палаца культуры «Лошыцкі» да Лошыцкага яра і мітынг каля памятнага знака былі дазволены гарадзкімі ўладамі. У акцыі ўзялі ўдзел каля пяцідзесяці чалавек.
Людзі ў цывільным назіралі за шэсьцем і мітынгам, вялі відэаздымку, але ў тое, што адбывалася, ня ўмешваліся. Інфармацыі аб затрыманьнях няма.
Паводле зьвестак гісторыкаў, у 1930-х гадах у Лошыцкім яры знаходзілася гэтак званая «Белая дача» — месца разьмяшчэньня спэцкаманды НКУС, куды дастаўлялі арыштаваных ахвяраў сталінскіх рэпрэсій. Тут жа іх расстрэльвалі.
