Праваабаронца: плата за паліклініку — толькі пасьля зьменаў у Канстытуцыі

Праваабаронца Алег Гулак кажа, што такія ідэі не адпавядаюць законам.

Шаўцоў у інтэрвію праграме АНТ «Контуры» заявіў, што ў практыцы любой амбуляторыі сустракаюцца пацыенты, якія прыходзяць на прыём больш за сто разоў за год без асаблівых прычынаў: «Проста яны так хочуць. Яны хочуць прыйсьці памераць ціск замест таго каб купіць таномэтар, проста спытаць, проста пачытаць, інтэрпрэтаваць аналізы, перапытаць, што лекар сказаў на мінулым прыёме».

«Што робіцца ў кабінэце ў лекара? Вядзе прыём доктар, мэдсястра, сядзіць пацыент і яшчэ там жа як мінімум два чалавекі зайшлі «проста спытаць», — апісвае Шаўцоў працоўныя будні ў паліклініках.

«Такога быць не павінна. Безумоўна, гэта выліваецца ў раздражняльнасьць і пацыента, і лекара, высокую нагрузку, таму што лекар ня можа засяродзіцца на адной праблеме, паставіць дакладны дыягназ».

Дэпутат перакананы, што нават сымбалічная плата за візыт у паліклініку адразу б адрэгулявала ня толькі колькасьць візытаў у паліклініку, але і стаўленьне людзей да ўласнага здароўя:

«Мы няправільна разумеем фразу „бясплатная мэдыцына“. Яна не бывае бясплатнай. Яна бясплатная для нас з вамі, але для дзяржавы гэта каштуе калясальных грошай. І часам мы марнатраўна ставімся да ўласнага здароўя і па-спажывецку — да сыстэмы аховы здароўя. Гэта недапушчальна. Чалавек не павінен даводзіць сябе да сытуацыі, калі ён становіцца жыхаром паліклінікі», — цытуе дэпутата Шаўцова БелТА.

Алег Гулак, кіраўнік праваабарончай арганізацыі «Беларускі Хэльсынскі камітэт», перакананы, што «калі ўвесьці аплату, то гэта пэўным чынам паўплывае на сытуацыю: людзі будуць меней наведваць паліклінікі і бюджэт будзе напаўняцца». Аднак такое рашэньне будзе супярэчыць закону:

«Гэта парушэньне Канстытуцыі, якая цяпер дзейнічае. Мяняйце Канстытуцыю, а пасьля рабіце такое. Магчыма, гэта і выгадна з эканамічнага пункту гледжаньня, але тады трэба крыху па-іншаму падаваць тэзу пра сацыяльную дзяржаву», — адзначае Гулак.

«У сацыяльнай сфэры ў нас даўно ўжо ідзе дзіўная падмена паняткаў. Прыкладам, бясплатная адукацыя стала называцца „адукацыяй за кошт бюджэту“. За яе выпускнікі расплачваюцца разьмеркаваньнем. Неяк Тозік (намесьнік кіраўніка ўраду Анатоль Тозік. — РС) казаў пра „суфінансаваньне бясплатнай мэдычнай дапамогі“. Гэта падман! Такія людзі добра ведаюць, што ў бясплатнай мэдыцыне ёсьць адна вельмі істотная якасьць — за яе не патрабуюць грошай», — заявіў праваабаронца Алег Гулак у інтэрвію Радыё Свабода.

Пазьней на сайце Радыё Свабода — рэпартаж з чаргі ў менскай паліклініцы.