Вядомыя расейскія дзеячы культуры напісалі ліст у беларускую міліцыю адносна Зьмітра Дашкевіча. Маці Эдуарда Лобава ня можа паслаць яму падарунак да дня народзінаў. Ірына Халіп не атрымала ліст ад мужа, Андрэя Саньнікава, у якім той паведамляў пра правакацыю турэмнай адміністрацыі. Зь Мікалаем Статкевічам сустрэўся адвакат. Павал Севярынец апавёў пра апошні тыдзень на «хіміі».
Вядомыя расейскія пісьменьнікі Барыс Стругацкі і Ніна Катарлі, а таксама актор Аляксей Дзівотчанка зьвярнуліся ў Дэпартамэнт выкананьня пакараньняў МУС у абарону лідэра «Маладога фронту» Зьмітра Дашкевіча. Аўтары ліста патрабуюць не парушаць правы вязьня, якога, як яны лічаць, беларускія ўлады перасьледуюць паводле палітычных прычын.
Нявеста актывіста Наста Палажанка: «Дзіводчанка разам зь Нінай Катарлі напісалі Дзіму ліст, у якім паведамілі, што разам з Барысам Стругацкім накіравалі ліст у дэпартамэнт у ягоную падтрымку. Увогуле яму шмат людзей з Расеі пішуць лісты».
Зьміцер Дашкевіч па-ранейшаму сядзіць у адзіночнай камэры Глыбоцкай турмы, шмат чытае і піша, на ўмовы ня скардзіцца.
Дашкевіч быў асуджаны на 2 гады паводле абвінавачаньня ў хуліганстве, якое нібыта ўчыніў разам з актывістам Эдуардам Лобавым. Эдуард атрымаў 4 гады, яго зьмясьцілі для адбыцьця пакараньня ў Івацэвіцкую калёнію.
За амаль паўгода зьняволеньня Лобаву толькі 3 разы дазволілі пазваніць дамоў. Вось ужо болей за месяц званкоў няма. Да 1 сьнежня маці Лобава зьбіралася даслаць сыну падарунак на дзень народзінаў, але ліміт на перадачы вычарпаны й прыйдзецца чакаць сярэдзіны сьнежня.
«У іх, відаць, ёсьць абмежаваньне па месяцах. Я нядаўна перадала невялікую перадачу, і ўсё — кажуць, больш нельга. Меркавала, што можна, толькі каб не перавышаць ліміт агульнай колькасьці, аказваецца — не.»
Апошнім часам ад Эдуарда Лобава не даходзяць і лісты. Тая ж праблема і з карэспандэнцыяй ад экс-кандыдата на прэзыдэнта Андрэя Саньнікава.
Жонка палітыка журналістка Ірына Халіп: «Адвакату ён сказаў, што 19 кастрычніка адправіў мне ліст, у якім падрабязна распавёў, як да яго ў камэру падсаджвалі хворага на сухоты вязьня. Але дагэтуль я гэты ліст не атрымала».
Андрэй Саньнікаў таксама паведаміў, што працягваецца ціск на яго з мэтай дамагчыся прашэньня аб памілаваньні. Болей за тыдзень Саньнікава трымаюць у карантыне Бабруйскай калёніі.
Гэтаксама ў карантыне Магілёўскай 15-й калёніі трымаюць каардынатара «Эўрапейскай Беларусі» Зьмітра Бандарэнку. Сваякі паведамляюць, што стан здароўя вязьня не палепшаў.
5 лістапада зь Мікалаем Статкевічам у Шклоўскай калёніі сустрэўся адвакат.
Жонка Марына Адамовіч: «Быў у яго адвакат. Сказаў напярэдадні, што будзе сядзець, пакуль ня пусьцяць. У выніку праседзеў там палову дня. Званіў, сказаў, што бачыў яго, а падрабязнасьці пазьней».
Мінуў тыдзень, як адміністрацыя «камэндатуры», дзе адбывае пакараньне 2 гадамі «хіміі» Павал Севярынец, вырашыла, што ён стаў на шлях выпраўленьня. Ці ёсьць прыкметы таго, што для адбыцьця пакараньня палітыка могуць перавесьці дадому ў Віцебск? Сам Павал Севярынец гэтых прыкмет не заўважыў:
«Выглядае на спэктакль. Можа, яны хацелі мяне падштурхнуць да прызнаньня віны, можа, паказаць начальству, што працуюць у гэтым кірунку.»
Павал Севярынец кажа, што прызнаваць віну па-ранейшаму не зьбіраецца.
Зьміцер Дашкевіч
Зьміцер Дашкевіч
Нарадзіўся 20 ліпеня 1981 г. у вёсцы Кушняры Івацэвіцкага раёну Берасьцейскай вобласьці. Да пяці гадоў жыў у Расеі на Далёкім Усходзе. Потым сям’я перабралася ў Старыя Дарогі. Там скончыў школу № 2. Вучыўся ў Гарадзенскім сельскагаспадарчым інстытуце. У 2001 годзе прыйшоў у "Малады фронт". Увосень 2001 г. быў адным з абаронцаў Курапатаў. Пазьней паступіў у Віленскі пэдагагічны ўнівэрсытэт на факультэт славістыкі. Быў абраны кіраўніком Менскай гарадзкой арганізацыі "Маладога фронту". Актыўны ўдзельнік і арганізатар масавых акцыяў і мерапрыемстваў. За сваю палітычную дзейнасьць неаднаразова прыцягваўся да адміністрацыйнай адказнасьці. У 2004 г. абраны старшынём "Маладога фронту".
Эдуард Лобаў
Эдуард Лобаў
Нарадзіўся ў Менску ў 1988 г. З 8-га кляса марыў зьвязаць сваё жыцьцё з войскам. Служыў тэрміновую службу ў спэцназе. Тамсама, у войску, пазнаёміўся з маладафронтаўцам з Гомелю, дзякуючы якому далучыўся да "Маладога фронту". Быў абраны кіраўніком менскай гарадзкой арганізацыі МФ. Надалей цікавіцца ваеннай справай і марыць пра адраджэньне беларускага войска.
Затрыманы 18 сьнежня разам зь лідэрам МФ Зьмітром Дашкевічам, абвінавачаны ў хуліганстве. У Жодзінскім СІЗА за адмову сьведчыць супраць маладафронтаўцаў Эдуарда пагражалі перавесьці ў камэру, дзе зь ім жорстка расправяцца.
Андрэй Саньнікаў
Андрэй Саньнікаў
Нарадзіўся ў Менску 8 сакавіка 1954 года. Скончыў Менскі дзяржаўны інстытут замежных моваў, Дыпляматычную акадэмію Міністэрства замежных справаў СССР у Маскве. Валодае чатырма мовамі. Працаваў у Таварыстве дружбы з замежнымі краінамі, у сакратарыяце ААН у Нью-Йорку, быў дарадцам прадстаўніцтва Рэспублікі Беларусь у Швайцарыі.
У 1995-1996 гг. — намесьнік міністра замежных спраў Беларусі. Пакінуў гэтую пасаду ў лістападзе 1996 год на знак пратэсту супраць правядзеньня рэферэндуму. У лістападзе 1997 году стаў стваральнікам і міжнародным каардынатарам грамадзянскай ініцыятывы «Хартыя’97».
У 2008 годзе ініцыяваў грамадзянскую кампанію «Эўрапейская Беларусь».
Ляўрэат міжнароднай прэміі імя Бруна Крайскага ў галіне абароны правоў чалавека (2005 г.).
Кандыдат у прэзыдэнты Рэспублікі Беларусь на выбарах-2010.
Мікола Статкевіч
12 жніўня 1956 году Нарадзіўся ў вёсцы Лядна Слуцкага раёну Менскай вобласьці ў сям'і настаўнікаў.
1978 Скончыў Менскую вышэйшую інжынэрную зэнітна-ракетную вучэльню.
1986 Абараніў кандыдацкую дысэртацыю.
Працаваў выкладчыкам Менскай вышэйшай інжынэрнай зэнітна-ракетнай вучэльні.
Люты 1991 На знак пратэсту супраць падзей у Вільні выйшаў з КПСС.
1991 Сябра Цэнтральнай рады і выканаўчага камітэту Беларускай сацыял-дэмакратычнай партыі (Народная Грамада).
1995 Старшыня БСДП (НГ).
1991-1995 Стваральнік і кіраўнік Беларускага згуртаваньня вайскоўцаў.
2000 Удзельнічаў у выбарах у Палату прадстаўнікоў.
2005 Асуджаны на тры гады абмежаваньня волі за арганізацыю 18-19 кастрычніка 2004 году ў Менску вулічнай акцыі супраць афіцыйных вынікаў парлямэнцкіх выбараў і рэфэрэндуму. Па амністыі тэрмін абмежаваньня волі быў скарочаны на год.
Кіраўнік аргкамітэту ў справе стварэньня Беларускай сацыял-дэмакратычнай партыі (Народная Грамада).
2010 Статкевіч вылучаўся кандыдатам у прэзыдэнты. Пасьля пратэстаў на Плошчы яго арыштавалі і затым асудзілі да 6 гадоў з адбыцьцём тэрміну пакараньня на падставе ч. 1 арт. 293 Крымінальнага кодэксу (арганізацыя масавых беспарадкаў, якія суправаджаліся гвалтам над асобай, пагромамі, падпаламі, зьнішчэньнем маёмасьці і ўзброеным супрацівам прадстаўнікам улады). З тэрміну ён адседзеў 5 гадоў, катэгарычна адмовіўся пісаць на імя Лукашэнкі прашэньне аб памілаваньні, аднак усё адно выйшаў на волю пасьля ўказу апошняга.
2011 Адбываючы тэрмін зьняволеньня, Мікола Статкевіч узяў шлюб з Марынай Адамовіч. Дзьве ягоныя дачкі ад першага шлюбу жывуць у Нямеччыне.
2017 Статкевіча затрымліваюць і зьмяшчаюць у СІЗА перад Днём Волі.
31 траўня 2020 Статкевіча затрымалі па дарозе на выбарчы пікет Сьвятланы Ціханоўскай. Спачатку яго пакаралі адміністрацыйным арыштам на 15 сутак, да якіх пасьля дадалося яшчэ столькі ж. Аднак па адбыцьці гэтага тэрміну палітыка ня вызвалілі, а перавялі ў СІЗА № 1 Менска і выставілі абвінавачаньне паводле крымінальнага артыкулу 342. Ён зноў адмаўляецца пісаць Лукашэнку прашэньне на памілаваньне, называе яго ўзурпатарам і дыктатарам, вітае канвой на закрытым судзе ў Гомлі нацыянальным воклічам «Жыве Беларусь!».
Павал Севярынец
Павал Севярынец
Нарадзіўся 30 сьнежня 1976 г. у Воршы. Скончыў з залатым мэдалём віцебскую школу № 25 (з мастацкім ухілам). Пачатак цікавасьці да палітыкі — абраньне ў 10 клясе школы ў Дзіцячы рэспубліканскі парлямэнт. Захапляўся геаграфіяй і геалёгіяй. Скончыў геафак БДУ. У 1994—1999 гг. працаваў журналістам у шэрагу недзяржаўных выданьняў. З 1998 г. друкуецца ў незалежнай прэсе як публіцыст. Ляўрэат літаратурнай прэміі імя Алеся Адамовіча і прэміі імя Васіля Быкава "За свабоду думкі".
У 1999—2003 гг. быў намесьнікам старшыні Партыі БНФ. З 1999 да 2004 гг. — старшынём "Маладога Фронту", цяпер — сустаршыня аргкамітэту па стварэньні партыі "Беларуская хрысьціянская дэмакратыя". У часе прэзыдэнцкіх выбараў 2010 г. быў актывістам штабу кандыдата ў прэзыдэнты Віталя Рымашэўскага. Быў арыштаваны 20 сьнежня і зьмешчаны ў СІЗА КДБ. Пры канцы сьнежня яму прад’яўлена абвінавачаньне па крымінальнай справе, узбуджанай сьледчым упраўленьнем папярэдняга расьсьледаваньня ГУУС Менгарвыканкаму па чч. 1 і 2 арт. 293 КК (масавыя беспарадкі). 4 красавіка замест гэтага прад'яўлена іншае абвінавачаньне (арт. 342 КК — арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх).
Нарадзіўся 20 ліпеня 1981 г. у вёсцы Кушняры Івацэвіцкага раёну Берасьцейскай вобласьці. Да пяці гадоў жыў у Расеі на Далёкім Усходзе. Потым сям’я перабралася ў Старыя Дарогі. Там скончыў школу № 2. Вучыўся ў Гарадзенскім сельскагаспадарчым інстытуце. У 2001 годзе прыйшоў у "Малады фронт". Увосень 2001 г. быў адным з абаронцаў Курапатаў. Пазьней паступіў у Віленскі пэдагагічны ўнівэрсытэт на факультэт славістыкі. Быў абраны кіраўніком Менскай гарадзкой арганізацыі "Маладога фронту". Актыўны ўдзельнік і арганізатар масавых акцыяў і мерапрыемстваў. За сваю палітычную дзейнасьць неаднаразова прыцягваўся да адміністрацыйнай адказнасьці. У 2004 г. абраны старшынём "Маладога фронту".
Нарадзіўся ў Менску ў 1988 г. З 8-га кляса марыў зьвязаць сваё жыцьцё з войскам. Служыў тэрміновую службу ў спэцназе. Тамсама, у войску, пазнаёміўся з маладафронтаўцам з Гомелю, дзякуючы якому далучыўся да "Маладога фронту". Быў абраны кіраўніком менскай гарадзкой арганізацыі МФ. Надалей цікавіцца ваеннай справай і марыць пра адраджэньне беларускага войска.
Нарадзіўся ў Менску 8 сакавіка 1954 года. Скончыў Менскі дзяржаўны інстытут замежных моваў, Дыпляматычную акадэмію Міністэрства замежных справаў СССР у Маскве. Валодае чатырма мовамі. Працаваў у Таварыстве дружбы з замежнымі краінамі, у сакратарыяце ААН у Нью-Йорку, быў дарадцам прадстаўніцтва Рэспублікі Беларусь у Швайцарыі.
