Паводле БЕЛТА, Аляксандра Лукашэнку зь перамогай на прэзыдэнцкіх выбарах 19 сьнежня павіншавалі на гэты час кіраўнікі наступных дзяржаваў: Індыі, Казахстану, Вэнэсуэлы, Грузіі, Ірану, Таджыкістану, Туркмэністану, Азэрбайджану.
"Гэтыя выбары сталі яшчэ адной залатой старонкай у бліскучай гісторыі беларускага народу" – БЕЛТА цытуе словы прэзыдэнта Ірану Махмуда Ахмадзінэжада зь віншавальнага пасланьня Аляксандру Лукашэнку.
На афіцыйным сайце прэзыдэнта Расеі Дзьмітрыя Мядзьведзева віншаваньняў Лукашэнку з нагоды выбараў няма. 20 сьнежня ён назваў выбары ў Беларусі ўнутранай справай Беларусі. "Я маю надзею, што ў выніку гэтых выбараў Беларусь будзе сучаснай дзяржавай, працягне разьвіцьцё па шляху стварэньня сучаснай дзяржавы, аснаванай на дэмакратыі і сяброўстве са сваімі суседзямі", заявіў Мядзьведзеў.
Няма таксама ніякага віншаваньня кіраўніку Беларусі на афіцыйным сайце прэзыдэнта Ўкраіны Віктара Януковіча.
