Сьпярша на Старой плошчы кіргіскай сталіцы каля пяці тысяч мітынгоўцаў выказалі незадаволенасьць няздатнасьцю часовага ўраду навесьці ў краіне парадак і дамагчыся вяртаньня ў Кіргізстан Бакіева і суду над ім.
Падчас мітынгу гучалі заклікі штурмаваць Дом парлямэнту, дзе месьціцца часовы ўрад, аднак бальшыня ўдзельнікаў акцыі не падтрымала гэтых намераў.
Пазьней сёньня таксама на Старой плошчы адбыўся мітынг прыхільнікаў часовага ўраду. Перад сабранымі выступіў лідэр сацыял-дэмакратаў і сябра часовага ўраду Кіргізстану Алмазьбек Атамбаеў. Ён заявіў, што часовы ўрад мае дастатковыя сілы для ўтрыманьняў заваёваў “красавіцкай рэвалюцыі”. Атамбаеў паабяцаў удзельнікам мітынгу асабіста зьезьдзіць да прэзыдэнта Казахстану Нурсултана Назарбаева і вырашыць пытаньне аб адкрыцьці мяжы з Кіргізстанам. Закрыцьцё мяжы паміж дзьвюма краінамі абарочваецца для Кіргізстану вялізнымі фінансавымі стратамі.
На мітынгу прыхільнікаў часовага ўраду знаходзіўся і Андуруш Тактанасэраў, кіраўнік руху “7 красавіка”. У інтэрвію Алене Ціхановіч ён, у прыватнасьці, сказаў:
“Сябры нашага руху, як і многія кіргізстанцы, вельмі абураныя пазыцыяй прэзыдэнта Лукашэнкі. Чаму дасюль Лукашэнка не выдае нам Бакіева? Бакіеў жа ня мае статусу палітычнага ўцекача. Лукашэнка, напэўна, баіцца сваёй будучыні...”
Андуруш Тактанасэраў таксама паведаміў, што прадстаўнікі руху сёньня хацелі прыйсьці ў беларускае пасольства, аднак на дзьвярох яго ўбачылі надпіс – зачынена з тэхнічных прычынаў. Раней ля беларускага пасольства ў Бішкеку ўжо праходзілі пікеты з патрабаваньнем выдачы Кіргізстану Курманбека Бакіева.
