Паводле указу Аляксандра Лукашэнкі уводзіцца дзяржаўная рэгістрацыя сетак, сыстэмаў і рэсурсаў, прапісваецца перавод беларускіх сайтаў у дамэнную зону by, фактычна ўзаконьваецца кантроль за інтэрнэт-карыстальнікамі.
Фёдару Караленку 35 гадоў, ён нарадзіўся ў Жодзіне, паступіў пасьля школы ў МРТІ, скончыў ужо БДУІР па спэцыяльнасьці "інжынэр тэлекамунікацый". Працаваў 3 гады ў Белтэлекаме, 2 гады ў інтэрнэт-правайдэры "Network Systems". Астатні час займаўся ўласнымі праектамі ў інтэрнэце, ў тым ліку і akavita.by. Некалькі гадоў таму ў інтэрвію Радыё Свабода Фёдар Караленка сказаў:
“Беларускі інтэрнэт усё больш робіцца цікавым для беларусаў... Пэрспэктывы разьвіцьця вельмі добрыя, гэта бачна і па зьяўленьні ў беларускім інтэрнэце рэклямы сусьветных брэндаў – красамоўны паказчык выхаду беларускага інтэрнэту на нейкі новы ўзровень з ранейшага балота, і па зьяўленьні інвэстараў, гатовых укладаць грошы ў беларускі інтэрнэт. Ролю інтэрнэту ў грамадзтве пераацаніць немагчыма; гэта і выйсьце на бязьмежны рынак для прадпрыемстваў, і на вялізную аўдыторыю для СМІ, а для чалавека сьпіс магчымасьцяў увогуле будзе завялікім.”
