Дзень Волі: на сьцягі і ўлёткі няма грошай

Чыноўнікі прапанавалі традыцыйны маршрут — вуліцай Сурганава да плошчы Бангалор. Арганізатары сьвяткаваньня заявілі, што на месцы збору вырашаць, у якім фармаце будзе адбывацца акцыя.

Намесьнік старшыні партыі БНФ Віктар Івашкевіч паведаміў, што цягам тыдня арганізатары акцыі будуць сустракацца з прадстаўнікамі ўсіх моладзевых арганізацый і рухаў, каб выпрацаваць адзіную тактыку правядзеньня дэманстрацыі. Ён падкрэсьліў, што сёлетняя акцыя ня мае бюджэту і таму арганізатары спадзяюцца, што людзі прыйдуць 25 сакавіка да Акадэміі Навук са сваімі сьцягамі і нацыянальнай сымболікай.

“Унікальнасьць гэтай акцыі ў тым, што яна рыхтуецца толькі пры дапамозе незалежных СМІ. Няма такіх магчымасьцяў засыпаць Беларусь улёткамі. Не сядзіце на кухні і не выступайце ацэншчыкамі дзеяньняў іншых. Вы можаце легальна прыйсьці да Акадэміі навук са сьцягам.

Ува ўсіх ёсьць сьцяг, але яны чамусьці іх хаваюць да будучай перамогі, каб потым у вокнах выстаўляць, маўляў, мы былі з вамі. А цяпер надышоў час гэтыя сьцягі даставаць і не спадзявацца, што нехта прынясе, а я ціхенька пастаю”.

Падчас прэсавай канфэрэнцыі старшыня аргкамітэту дзеля стварэньня сацыял-дэмакратычнай партыі “Народная Грамада” Мікола Статкевіч заявіў:

“Гэта вельмі важнае сьвята. Яно павінна адбывацца ў цэнтры гораду, у рэшце рэшт — на праспэкце, які сам Лукашэнка пераназваў у праспэкт Незалежнасьці. У мінулым годзе мы ведаем, што адбывалася. Але ж частка дэманстрантаў здолела прабіцца з плошчы Якуба Коласа і адбылося годнае шэсьце і мітынг на праспэкце Незалежнасьці. Бангалор для нас не падыходзіць”.

Лідэр АГП Анатоль Лябедзька паведаміў:

“Для Эўропы не існуе палітычных вязьняў у Беларусі. Вось гэта страшна. Калі насамрэч людзі ў Беларусі ня выйдуць самі і ня скажуць, што ў нас ёсьць палітычныя вязьні, ніякія эўрапейскія палітыкі, ніякія міжнародныя арганізацыі ня будуць мець прызнаны сьпіс палітвязьняў у Беларусі.

Мы сёньня заяўляем, што ў нас ёсьць антыкрызісны плян, а ва ўлады няма, то гэта закранае ня толькі палітычна актыўную частку грамадзтва, але й простых людзей. Кожны павінен зрабіць свой асабісты выбар”.

Гаворыць намесьнік старшыні партыі БНФ Вінцук Вячорка:

“Дыпляматы і дэпутаты нацыянальных парлямэнтаў заявілі, што будуць сачыць за сытуацыяй 25 сакавіка і паводзінамі ўладаў. Шэраг палітыкаў прыяжджаюць пад гэтыя даты па сваіх праграмах. Так, скажам, прыедуць дэпутаты нямецкага бундэстагу. Яны акурат будуць 24 і 25 сакавіка ў Менску.

А дэпутаты парлямэнтаў паўночнаэўрапейскіх краін, аб’яднаныя ў Паўночную Раду, у гэты час у суседняй Вільні будуць праводзіць сустрэчы ў якасьці сэмінару з прадстаўнікамі дэмакратычных сілаў і так званай Палаты прадстаўнікоў”.

Арганізатары сьвяткаваньня Дня Волі нагадалі, што мерапрыемства дазволенае, і заклікалі ўлады ўстрымацца ад правакацыяў, бо акцыя будзе мець мірны характар.