Паводле Вячаслава Сіўчыка, на стэндзе паказана схема таго, што знаходзіцца на тэрыторыі народнага мэмарыялу.
На стэндзе напісана: “Мэмарыял Курапаты. Месца згубы ахвяраў палітычных рэпрэсій 1937-1941 гадоў. На гэтым месцы супрацоўнікі НКУС БССР зьнішчалі людзей. Ва ўрочышчы налічвалася больш за 500 масавых пахаваньняў людзей. З 1988 года намаганьнямі грамадзкасьці пачаў стварацца народны мэмарыял памяці ахвяраў сталінскіх рэпрэсій”.
Тут жа мапа ўрочышча з умоўнымі абазначэньнямі.
Міліцыянты патлумачылі, што ўсталяваць стэнд можна толькі з дазволу Менскага райвыканкаму.
Спадар Сіўчык апавёў, што ў зьвязку з актамі вандалізму прадстаўнікі грамадзкасьці зьвярталіся да міліцыі з просьбай пачаць дзяжурства ва ўрочышчы. Работнікі міліцыі адказалі, што яны згодныя, але калі грамадзкасьць за гэта будзе плаціць ім грошы. Спадар Сіўчык заявіў, што ўлады адмаўляюцца займацца Курапатамі.
