امریکايي ولسمشر ډانلډ ټرمپ پر روسیې ټینګار کړی دی چې پر ۳۰ ورځني اوربند سلا شي او خبرداری کړی دی چې که دا وړانديز رد کړي نو واشنګټن به ورباندې لا زیات بندیزونه ولګوي.
دا په داسې حال کې ده چې مسکو د اوکراین پر وړاندې د جګړې په ډګر کې نورې لاسته راوړنې کړې دي.
ټرمپ د مارچ پر ۱۲مه په سپینه ماڼۍ کې خبریالانو ته وویل: "روسیه له اوربند پرته بله لاره نه لري. که اړتیا وه نو بندیزونه به ورباندې ولګوو، خو زه هیله لرم چې د دې ضرورت به پېښ نه شي."
ټرمپ دا څرګندونې تر هغې یوه ورځ وروسته کړې دي چې اوکرایني استازي په سعودي عرب کې د امریکايي ادارې له چارواکو سره په نهه ساعته خبرو کې پر لنډمهالي اوربند موافق شول.
مسکو تر اوسه د ۳۰ ورځني اوربند د وړاندیز پر جزییاتو له تبصرې ډډه کړې او دا لا روښانه نه ده چې ولسمشر ولادیمیر پوتین ورته خپل ذهن جوړ کړی دی او که نه.
د کرېملېن ویاند دېمېتري پېسکوف ویلي چې مسکو په جده کې تر خبرو وروسته د امریکا او اوکراین ګډه اعلامیه "په دقت مطالعه" کوي او تر هغو چې روسیو مرکچیانو له واشنګټنه نور تفصیلي معلومات نه وي ترلاسه کړي، ورباندې تبصره نه کوي.
د امریکا د بهرنیو چارو وزیر مارکو روبیو، چې په خبرو کې یې د واشنګټن استازیتوب کاوه، وویل چې حکومت یې د مارچ پر ۱۳مه له روسیې سره رابطه کوي.
