د پاکستان د بهرنیو چارو وزارت د واخان (وخان) دهلېز په پاکستان د ورګډولو راپورونه رد کړي دي او ویلي یې دي چې هغه سیمه د "افغانستان برخه" ده.
د وزارت نوي ویاند شفقت علي خان د جنورۍ پر ۱۶مه په اسلام اباد کې اوونیزې خبري غونډې ته وویل چې له وروستیو ګونګوسو او اوازو خبر دی خو واخان د افغانستان د خاورې برخه ده.
ده وویل، افغانستان د پاکستان ګاونډی هېواد دی او اسلام اباد یې "حاکمیت او ځمکنۍ بشپړتیا په رسمیت پېژني. سوال هم نه پیدا کېږي چې پاکستان دې د خپلو ګاونډیو لپاره دا ډول ارادې ولري."
د بهرنیو چارو وزارت ویاند زیاته کړه چې دا ډول ټولې اوازې ناسمې بولي.
واخان د افغانستان د شمال ختیز ولایت بدخشان یوه تنګه، نرۍ غرنۍ سیمه ده چې د چین تر شېنجیانګ (سېنکیانګ) سیمې غځېدلې او له تاجکستان او د پاکستان تر واک لاندې له ګلګت بلتستان سره پوله لري.
دا په داسې حال کې ده چې په وروستیو کې پر ټولنیزو شبکو داسې اوازې خپرې شوې چې پاکستان د واخان د نیولو پلان لري او یا هم هلته پوځي حضور لرل غواړي چې مستقیماً له تاجکستان سره پوله ولرلای شي.
