د بلوچستان په مستونګ کې له کوټې څخه د لاهور او راولپېنډۍ پر لاره پېښور ته پر تلونکي جعفر اېکسپرېس چاودنه شوې چې پکې د چارواکو په خبره، چا ته مرګژوبله نه ده اوښتې.
یو پولیس تاڼېدار اختر بنګلزي مشال راډیو ته وویل، چاودنه د اګست ۱۰مې پر سهار له مرکز کوټې څخه شاوخوا ۳۰ کېلومیټره لیرې سوېل ختیځ لوري ته له پروت سپېزنډ تمځي سره نېږدې شوې چې له کبله یې د اورګاډي انجن او شپږ ډبې (بوګۍ) له پټلۍ ښکته شوې.
دی وايي، د پټلۍ خرابېدو له وجې له کوټې څخه د پاکستان نورو برخو ته د مساپر لېږدوونکو اورګاډو تګ راتګ ځنډېدلی دی.
په کوټه کې د اورګاډي چارو ادارې ویاند کاشف احمد مشال راډیو ته وویل، کارکوونکي یې سیمې ته ورغلي او د پټلۍ رغولو او د پرېوتو ډبو پورته کولو چارې ترسره کوي.
دی وايي، خالي اورګاډی یې سپېزنډ ته لېږدولی او له هغه ځایه مساپر کوټې ته ستنوي.
احمد وايي، ټولو مساپرو ته د ټېکېټ پیسې ورسپاري.
دی زیاتوي، له پېښوره تلونکی اورګاډی سېوۍ ته رسېدلی چې د پټلۍ تر جوړېدو وروسته به کوټې ته روان شي.
د چاودنې ذمه واري لا چا نه ده منلې. خو د مارچ پر ۱۱مه بلوڅ بېلتونپالې ډلې بلوچ لېبرېشن ارمي (بي اېل اې) د بلوچستان په بولان سیمه کې جعفر اېکسپرېس محاصره کړی وو. هغه مهال د پاکستان پوځ تایید کړې وه چې وسلوالې ډلې ۲۱ مساپر او څلور د ملېشې ځواک سرتېري وژلي دی. البته بي اېل اې هغه مهال د لسګونه استخباراتي کارکوونکو د وژلو دعوه کړې وه.
په مستونګ کې تازه پېښه پر داسې مهال شوې چې د بلوچستان حکومت د اګست پر اوومه د "امنیتي اندېښنو" له کبله د کوټې په ګډون په ټوله صوبه کې د میاشتې تر پای پورې د موبایل ټېلېفون انټرنېټي خدماتو تړلو اعلان وکړ.
د پاکستان چارواکي وخت په وخت د خیبر پښتونخوا او بلوچستان په ګډون د هېواد په مختلفو برخو کې انټرنېټ او ټېلېفوني شبکې تړي او وايي، د دې موخه د ناامنۍ او د وسلوالو د فعالیتونو مخه نیول دي. چارواکي وايي، وسلوالې ډلې د حملو د پلانولو او داراز، د رېموټ کنټرول بمي بریدونو لپاره د موبایل ټېلېفون شبکه او انټرنېټ کاروي.
په تېرو څلورو کلونو کې په بلوچستان کې ناامني زیاته شوې او په جولای کې په هغه صوبه کې یوشمېر حملې وشوې چې پکې د پوځ او پولیسو د افسرانو په ګډون یوشمېر سرتېري او ولسي وګړي ووژل شول. د بلوچستان حکومت د جولای پر نهمه او ۱۰مه نېټه د امنیتي ګواښونو له کبله له کوټې د پاکستان نورو برخو ته د اورګاډو تګ راتګ ځنډولی وو.
په همدې حال کې د پاکستان پوځ هم وخت په وخت په صوبه کې د هدفي عملیاتو پر مهال د مشکوکو وسلوالو د وژنې دعوې کوي. پوځ د اګست پر اتمه او نهمه په جلا، جلا بیانونو کې د اګست له اوومې څخه د اتمې تر شپې پورې په ژوب کې د ۴۷ مشکوکو وسلوالو د وژنې دعوه کړې وه.
د پاکستان د کورنیو چارو وزیر محسن نقوي د جولای په پای کې په کوټه کې له چارواکو سره د لیدو پر مهال د "ترهګرۍ پرضد" د مبارزې هوډ تکرار کړ او و یې ویل چې په دې لړ کې د بلوچستان له حکومت سره "کلک ملاتړ" کوي.
د پاکستان وزیراعظم میا محمد شهباز شریف په مارچ کې په یو بیان کې ویلي ول چې وسلوال د بلوچستان د "سولې او پرمختګ دښمنان" دي او زیاته کړې یې وه چې هغوی به خپلو موخو ته په رسېدو بریالي نه شي.
په همدې حال کې د پاکستان پوځ او حکومت وايي چې د بلوچستان په ګډون په ټول هېواد کې د وسلوالو پرضد مبارزې ته دوام ورکوي.
