د پاکستان د طبیعي ناورینونو پر وړاندې د مبارزې ملي اداره (اېن ډي اېم اې) وايي سېلابونو په خیبر پښتونخوا، پنجاب او سیند صوبو کې خلکو ته د سر او مال زیانونه اړولي دي.
یادې ادارې د اګست پر ۳۰مه پر خپلې ووبپاڼې لیکلي دي چې په روانه میاشت کې په پاکستان کې له باران سره تړلو پېښو او سېلابونو کې ټول ۵۳۶ کسان وژل شوي او ۴۲۱ نور ژوبل دي.
په وژلو شویو کې تر ټولو زیات شمېر په خیبر پښتونخوا کې دی چېرته چې ۴۱۴ کسانو خپل ژوند بایللی دی. همدا رنګه ورښتونو او سېلابونو په پنجاب کې ۲۹، په سیند کې ۳۰، په ګلګت بلتستان کې ۳۲، د پاکستان انتظام لاندې کشمیر کې ۲۷ او په بلوچستان کې څلور کسان وژلي دي.
یاده اداره وايي روان کال د جون له ۲۶مې نېټې راهیسې په پاکستان کې د ورښتونو او سېلابونو له وجې ۸۳۱ کسان وژل شوي او ۱۱۲۱ نور ژوبل دي.
په پنجاب کې د طبیعي ناورینونو پر وړاندې د مبارزې صوبايي اداره (پروېنشل ډیزاسټر منیجمنټ یا پي ډي اېم اې) وايي چې چناب، راوي او ستلج سيندونو کې اوبه تر خطرناکې کچې لوړې شوې دي او په ځینو سیمو کې یې تباهي رامنځ ته کړې ده.
په پنجاب کې د پي ډي اېم اې مشر عرفان علي کاټيا د اګست پر ۳۰مه په لاهور کې یوې خبري غونډې ته وويل چې په پنجاب کې د سېلاب له امله تر دې دمه لږ تر لږه ۳۰ کسان وژل شوي او له ۱۵ لکه څخه زیات خلک اغېزمن شوي دي.
د صوبايي ادارې په وینا د پنجاب درې واړه سیندونه له مختلفو سربندونو تر تیرېدو وروسته جنوبي پنجاب او سیند ته روان دي.
د پنجاب صوبايي ادارې په دې لړ کې یو راپور هم خپور کړی دی چې ترمخه یې د سیندونو د سېلابي حالت له امله څه د پاسه یو نیم مېلیونه خلک اغېزمن شوي دي او په سېلابونو کې ایسار پاتې نږدې نیم میلېون نور کسان خوندي ځایونو ته ایستل شوي دي.
بلخوا د سیند صوبې مشر (سینیر) وزیر شرجیل انعام میمن خلکو ته خبرداری ورکړی دی چې د سېپټېمبر په دویمه یا درېیمه شپه له پنجاب څخه سیند ته د سېلابې اوبو د داخلېدو امکان دی.
میمن د اګست پر ۳۰مه په کراچۍ کې یوې خبري غونډې ته وويل چې که څه هم د سېلاب ځپلو لپاره د مرستې کیمپونه جوړ شوي دي خو ډېری خلک ترجیح ورکوي چې د خپلو خپلوانو کورونو ته لاړ شي.
هغه زیاته کړې چې د څارویو لپاره هم ۳۰۰ کیمپونه جوړ شوي دي.
نوموړي دا هم ویلي چې صوبايي حکومت هر درې ساعته وروسته د سېلاب په اړه تازه معلومات خپروي او د پنجاب حکومت هم په دې لړ کې ورسره مرسته کوي.
د پاکستان د طبیعي ناورینونو پر وړاندې د مبارزې ملي ادارې (اېن ډي اېم اې) هم په اېکس پاڼه په سیند صوبه کې د شديدو سېلابونو په اړه خبرداری خپور کړی دي.
په ورته وخت کې په خیبر پښتونخوا کې د طبیعي ناورینونو پر وړاندې د مبارزې صوبايي ادارې ويلي دي چې د وروستیو بارانونو له امله د بډنۍ نهر د اوبو کچه په دوامداره توګه لوړېږي چې له امله یې په پیر بالا او درمنګو سیمو کې سېلابي حالت رامنځ ته شوی دی.
ادارې په هغه سيمه کې خلکو ته ويلي چې خوندي ځايونو ته لاړ شي او د جوماتونو له لارې خلکو ته د وضعیت په اړه معلومات هم ورکول کېږي.
