په بلوچستان کې تېر کال د تښتول شوي ماشوم مړی د جون پر ۲۸مه پر داسې مهال خارو ته سپارل شوی چې د هغه کورنۍ او سیاسي ګوندونو پر صوبايي حکومت سختې نیوکې کړې دي.
د مصور خان کاکړ په نامه د لس کلن ماشوم جنازه د جون پر ۲۸مه د کوټې په هاکي ګراونډ کې ترسره شوه.
په جنازه کې د بلوچستان د پولیسو مشر ترڅنګ صوبايي وزیرانو، سیاسي مشرانو او ولس په ګڼ شمېر ګډون کړی وو.
د ماشوم تره حاجي ملنګ په خپله وینا کي وویل چې حکومت له دوی سره د مصور خان په میندلو او خوشي کولو کې کړې ژمنې پوره نکړې.
پر دې مهال د ګڼو سیاسي ګوندونو استازو ویناوې وکړې او په بلوچستان کې یې د تښتوونو او وژنو په اړه نه یوازې د خوشینۍ څرګندونه وکړه بلکې تور یې پورې کړ چې صوبايي حکومت د ولس په ساتلو کې پاتې راغلی دی.
د بلوچستان اعلا وزیر سرفراز بګتي هم پر دې پېښه ناخوښي ښودلې او هغه خبره یې بیا تکرار کړې چې ګواکې "د مصور خان کاکړ قاتلان به د قانون منګولو ته سپاري."
مصور خان د ۲۰۲۴م کال د نومبر پر ۱۵مه هغه وخت په کوټه کې د ملتاني محلې څخه نامعلومو کسانو وتښتاوه چې له کوره مدرسې ته روان وو.
حکومت وايي چې په تېرو ورځو کې یې له داعش ډلې سره تر نښته وروسته د یاد ماشوم مړی میندلی وو.
هغه د کوټې د یو صراف راز محمد کاکړ زوی دی. ویل کېده چې هغه د پېسو غوښتلو لپاره تښتول شوی وو.
