په کوټه ښار کې په یوه ترافیکي پېښه کې شپږ کسان وژل شوي او اووه نور ژوبل دي.
چارواکي وايي، دا پېښه نن (د جون پر ۲۴مه) د زرنج رکشې او د سپرلیو د مزده موټر ترمینځ د ټکر له وجې مخې ته راغلې ده.
د شالکوټ تاڼې مشر (اېس اېچ او) محمد عابد مشال راډیو ته وویل، په زرنج رکشه کې ایراني تېل په بوشکو کې ځای پر ځای شوي وو او د مزدا موټر سره له جنګېدو وروسته اور لګېدلی دی.
په پېښه کې ژوبل تنان د بولان میډیکل کمپلېکس ته رسول شوي او ډاکټرانو مشال راډیو ته ویلي دي چې د ژوبلو تنانو وضعیت نازک دی.
