د بشري حقونو نړيواله اداره، ايمنسټي انټرنېشنل وايي په پاکستان کې د تودوخې د لوړېدو سم مديريت نشته چې له امله یې خلک د روغتيا له بنیادي حقونو محروم پاتې شوي او ستونزې یې زیاتېږي.
یادې ادارې د مې پر پينځمه په يو راپور کې وويل چې پاکستان په نړۍ کې د تودوخي د بدلون له وجې پيدا شويو ګواښونو ته په کتو، تر ټولو زیات له خطر سره مخ هېوادونو کې په پينځم نمبر دی.
د بخښنې نړیوال سازمان ليکلي چې په پاکستان کې داسې کوم فعال سیسټم نشته چې په وخت دې بيړنيوو ناورینونو او روغتيايي ستونزو ته په سم ډول ځواب ووايي. د راپور ترمخه، د سېلابونو د مخنيوي نه کولو او چاپيريال ساتنې د سمو پروګرامونو د نه عملي کولو له کبله ناروغۍ ډېریږي او په ځانګړې ډول د ماشومانو او زړو ژوند ته ډېر خطر پېښ دی.
ايمنسټي انټرنېشنل وړانديز کړی چې نړيوالو بشري حقونو ته په پام دې، د پاکستان حکومت په ۲۰۲۲ کال کې د چاپيريال ساتنې په برخه کې کړی پرمختګ روان وساتي او داسې پايداره پروګرامونه جوړ کړي چې روغتيايي سیسټم یې بهتره او د نړيوالې تودوخې خطرونه اداره کړلی شي.
تر اوسه د پاکستان حکومت د دې راپور په غبرګون کې څه نه دي ويلي. تېر کال د پاکستان وزيراعظم شهباز شريف په ملګرو ملتونو کې د وينا په وخت پر نړيوالو غږ کړی وو چې د طبیعي ناورینونو د کنټرول لپاره دې ورسره مرسته وکړي.
