د خیبر پښتونخوا اعلاوزیر علي امین ګنډه پور ويلي چې هغه د خپلې صوبې پولیسو او انتظاميې ته امر کړی دی چې افغان کډوال دې په زور نه باسي.
نوموړي دا خبره د اپرېل پر څلورمه په اسلام اباد کې يوې خبرې غونډې ته تر هغه وروسته په وينا کې وکړه چې د پاکستان د حکومت له خوا بې اسناده او د افغان تابعیت یا سېټېزن کارډ لرونکو افغانانو ته په خپله خوښه د هغه هېواد د پرېښودو ضرب الاجل (مهلت) د مارچ پر ۳۱مه پای ته ورسېد او د اپرېل له درېيمې يې افغانستان ته د هغوی د لېږدولو دویم پړاو پیل کړی دی.
ګنډه پور خبري غونډې ته وويل "په داسې حالاتو کې د دوی [افغان کډوالو] ايستل، چې هلته د دوی لپاره څه انتظام نه شته، د هغه ځای حکومت يې خپل نه ګڼي، هلته د دوی د خوراک څښاک، اوسېدو او ژوند تېرولو بندوبست نه شته، نو په داسې حالاتو کې د دوی ايستل نه زموږ تګلاره ده، نه زموږ روايات دي او نه به موږ چا ته د داسې کولو موقع ورکړو."
نوموړي دا خبره په داسې وخت کې کړې چې د راپورونو له مخې، له تېرو څو ورځو راهيسې د خيبر پښتونخوا په بېلا بېلو سيمو کې پوليس په کورونو ګرځي او افغان کډوالو ته د ستنېدو ويناوې او اعلانونه کوي.
د ملګرو ملتونو د کډوالو ادارې (یو اېن اېچ سي ار) په وينا، په پاکستان کې شاوخوا ۸۰۰،۰۰۰ کسان د افغان تابعيت (سېټېزن) کارډونو لري.
هغه کارډونه د پاکستان د وګړو د نوملیکنې، شناختي کارډونو او نورو اسنادو ادارې (نادرا) افغانانو ته ورکړي ول.
بلخوا هلته ۱۳۰،۰۰۰ افغانان د ملګرو ملتونو د کډوالو ادارې د مهاجرت کارډونه (پروف اف رجسټرېشن یا پي او ار) هم لري.
اسلام اباد وايي چې د مهاجرت کارډ لرونکي افغان کډوال د ۲۰۲۵ز کال د جون تر ۳۰مې په پاکستان کې د پاتې کېدو قانوني جواز لري.
د ملګرو ملتونو د کډوالو ادارې، د مهاجرت نړیوال سازمان او د بشري حقونو کمېشن په ګډون د حقونو کورنیو او نړیوالو سازمانونو، پښتونخوا ملي عوامي ګوند، پښتون ژغورنې غورځنګ او په هغه هېواد کې د افغان کډوالو مشرانو په تېرو میاشتو کې څو ځلې د افغانانو پر ایستلو اندېښنه ښوولې او له حکومته یې غوښتي دي چې افغانان دې په زور نه ستنوي.
په افغانستان کې د طالبانو حکومت هم پر پاکستان غږ کړی چې افغان کډوال دې له هغه هېواده په زور نه باسي او په خپله خوښه دې ورته د ستنېدو موقع ورکړي.
خو د پاکستان وفاقي حکومت وايي، د افغانانو ایستلو ته ژمن دی او دا کار د ملي امنیت په ګټه بولي.
پاکستان د ۲۰۲۳ز کال له نومبر راهیسې له ۸۰۰،۰۰۰ زیات افغانان هېواد ته ستانه کړي دي.
د ۲۰۲۳ز کال په اکتوبر کې د پاکستان د هغه وخت لنډمهاله حکومت بې اسناده بهرنیانو ته د اکتوبر تر ۳۱مې په خپله خوښه د وتلو ویلي ول. د هغه کال د نومبر له لومړۍ راهیسې له پاکستانه د بې اسناده افغانانو په زور د ایستلو بهیر پیل شو.
