قازق چارواکي وایي، پاکستان او نورې خواوې د ټرانس-افغان دهلېز جوړېدو ته هڅوي.
د قازقستان د رسنیو د راپور له مخې، د هغه هېواد د ټرانسپورت وزارت د فبرورۍ پر ۱۵مه وویل چې د رېللارو د ملي شرکت مشر دامیر کوژاخامیتوف پاکستان ته تللی چې د ټرانس-افغان دهلېز د پروژې د پرمخ بیولو لپاره د ټرانسپورت او لاجېسټيکي چارو له شرکتونو سره خبرې وکړي.
د هغه دهلېز د جوړولو موخه قازقستان، ازبکستان، افغانستان او پاکستان د اورګاډي له لارې نښلول دي.
د هغې پروژې موافقه په ۲۰۱۸ز کال کې لاسلیک شوې وه.
د هغه ۵۷۳ کېلومیټره رېللارې د جوړولو لګښت څه باندې څلور نیم اربه (مېلیارده) امریکايي ډالره اټکل شوی دی.
د پلان له مخې، هغه پټلۍ به له مزارشریف څخه د شمالي وزیرستان او خوست ترمینځ تر غلام خان بندر پورې وغځول شي.
