د بلوچستان د ښاروالۍ صوبايي وزیر سردار سرفراز ډومکي تر اوږده ناروغۍ وروسته د کراچۍ په یو روغتون کې سا ورکړې ده.
د سردار سرفراز ډومکي ورور هیربیار ډومکي په کوته کې رسنیو ته ویلي چې سردار سرفراز ډومکي له اوږدې مودې د ځیګر په ناروغۍ اخته وو او د سېپټمبر پر ۱۵مه یې د کراچۍ په یو روغتون کې سا ورکړې ده.
سردار سرفراز ډومکي د ۲۰۲۴م کال د فبرورۍ پر اتمه په ترسره شویو عامو انتخاباتو کې د سبۍ له لهړي سیمې د بلوچستان اسمبلۍ غړی ټاکل شوی وو.
نوموړی د پاکستان پیپلز ګوند غړی او د بلوچستان په اوسني حکومت کې د ښاروالۍ وزیر وو.
سردار سرفراز ډومکي تر دې وړاندې په ۲۰۱۳م کال کې د مسلم لیګ نون او په ۲۰۱۸م کال کې بیا د بلوچستان عوامي پارټۍ پر ټکټ د صوبایي اسمبلۍ غړی پاته شوی وو.
نوموړی په ۲۰۱۸م کې د څه مودې لپاره د بلوچستان د کلتور او سېلګرۍ وزیر هم پاته شوی وو.
د بلوچستان اعلا وزیر سرفراز بګټي او د کابینې نورو غړو سرفراز ډومکي د ښه سیاستوال او ځايي قبایلي مشر بللی چې د دوی په وینا، تل یې په سیمه کې مثبت سیاسي او قبایلي رول لوبولی دی.
سردار سرفراز ډومکي په ۱۹۶۹م کال کې د اګست پر ۱۲مه د بلوچستان د سبۍ ضلعې په لهړي تحصیل کې زیږېدلی وو. د نوموړي پلار سردار چاکر خان ډومکي هم د سیمې یو نومیالی قبایلي او سیاسي مشر اوسېدلی وو.
سردار سرفراز ډومکي سیاست ته تر تګ وړاندې له ۱۹۸۸م څخه تر ۲۰۱۰م کاله د بلوچستان په یو شمېر ضلعو کې د مرستیال کمشنر په توګه هم پاته شوی وو.
