د ایران د بشري حقونو سازمان خبر ورکړی چې دوه افغانان د شیراز په زندان کې اعدام شوي دي.
هغه سازمان د جولای پر دویمه راپور ورکړ چې علي الله بخش او افضل الله بخش د جون پر ۳۰مه د شیراز په عادل اباد زندان کې اعدام شوي دي.
علي او افضل د يو بل نېږدې خپلوان بلل شوي او درې کاله وړاندې له مخدره موادو سره د تړلیو جرمونو په تور زنداني شوي ول.
ایران یو له هغو هېوادونو دی چې د اعدامونو کچه پکې لوړه ده او له همدې امله د بشري حقونو د ډلو له خوا نیوکې ورباندې کېږي.
په افغانستان کې د طالبانو حکومت تېر کال ویلي وو چې په ایران کې ۷،۰۰۰ افغانان بندیان دي، خو دا نه ده څرګنده چې څومره یې په اعدام محکوم شوي دي.
