د بلوچستان د خبریالانو ټولنې بلوچستان یونېن اف جرنلسټس د صوبایي اسمبلۍ غونډې ته د ورتګ پر ځای د اسمبلۍ مخې ته د احتجاج اعلان کړی دی.
ټولنې د مې پر ۱۹مه په یو بیان کې ویلي چې دا احتجاج د کوټې د انتظامیې لخوا یوه ورځ مخکې د پریس کلب د تړلو د اقدام پرضد کوي.
د دوی په وینا، د دې تر څنګ به د مې پر۲۱مه په ټول ملک کې خبریالان د دې پېښې پرضد د پریس کلبونو مخې ته احتجاجي مظاهرې کوي.
دا له هغه وروسته ده چې د کوټې انتظامیې د مې پر ۱۸مه هغه مهال د کوټې پریس کلب هغه مهال وتاړه چې د بلوچ یکجهتي کمېټۍ لخوا هلته یو سمینار وربلل شوی وو.
پولیس وایي چې په سیمه کې د بم د شتون تر اطلاع وروسته یې پریس کلب او نېږدې ودانۍ د لټون عملیاتو په مهال تړلی وې، خو خبریالان دا ردوی او وایي چې د پولیسو دا عمل په اساسي قانون کې د ورکړل شوی بیان د ازادۍ خلاف کار دی او د دې پر ضد به احتجاجونو ته دوام ورکوي.
د بلوچستان اعلا وزیر میر سرفراز بګټي د کوټې پریس کلب د تړلو په اړه یوه پارلېماني کمیټۍ جوړه کړې ده. دغه کمیټۍ به د پریس کلب بندولو د پېښې تر پلټنې وروسته خپل راپور اعلا وزیر ته وړاندې کړي.
