د ملګرو ملتونو د ماشومانو د ملاتړ صندوق( یونیسېف) په خپل نوي راپور کې ویلي، چې روان میلادي کال نهه ویشت میلیونه او دوه لکه افغانان بشري مرستو ته اړتیا لري.
د یونیسېف د اټکل له مخې، تر مني پورې به تر پنځلس میلیونه ډېر افغانان بېړنیو مرستو ته اړتیا پیدا کړي.
د یادې ادارې په باور، د ښځو د کار مخنیوی پرته له شکه چې د موسسو د مرستو پر رسولو منفي اغېز کوي.
یونیسېف وایي سږکال له افغانانو سره د مرستې لپاره یو اعشاریه پنځه څلویښت میلیارده ډالرو بېړنیو مرستو ته اړتیا لري.
دا راپور پر داسې مهال خپور شوی چې په افغانستان کې ډېری خلک وايي چې د تېر جمهوري نظام له ړنګېدو او د طالبانو د نظام له راتلو وروسته په افغانستان کې د کار او روزګار مواقعې کمې شوې او په ځانګړي ډول هغه کورنۍ زیاتې ځپل شوې دي چې مېرمنو به یې د ژوند په بېلابېلو څانګو کې د کار کولو له لارې خپلو کورنیو ته ډوډۍ ګټله.
