په افغانستان کې د طالبانو حکومت بهرنيو چارو سرپرست وزیر مولوي امير خان متقي وايي پاکستان او تحريک طالبان پاکستان دې خپل مشکلات د خبرو له لارې حل کړي.
متقي د مې پر اتمه په اسلام اباد کې د ستراتيژيکو مطالعاتو انسټېټيوټ کې وويل چې په پاکستان کې ناامني او وينه توييدل نه غواړي. هغه زیاته کړه چې د افغانستان خاوره به د هېڅ هېواد پر ضد نه کاريږي.
د اپرېل پر ۱۱مه د پاکستان دفاع وزير خواجه اصف له امريکا غږ سره په مرکه کې دعوه کړې وه چې د تحريک طالبان پاکستان (ټي ټي پي) وسله وال په افغانستان کې دي. د هغه په وينا د طالبانو حکومت د ټي ټي پي سره ملګرتيا لري نو ځکه یې پر ضد اقدامات نه کوي. خو متقي په اسلام اباد کې د مشال راډيو د يوې پوښتنې په ځواب کې وويل چې د پاکستان او ټي ټي پي جګړه په افغانستان کې د دوی د حکومت سره نه ده پيدا شوې بلکې زړه مسله ده.
هغه زیاته کړه چې د پاکستان حکومت پخپله وايي چې په دې شل کلن جنګ کې یې تر اتیازرو خلک وژل شوي دي نو ځکه دا نوی کړکيچ نه دی. هغه زیاته کړه چې په افغانستان کې د طالبانو حکومت د دواړو خواو ترمينځ د روغې جوړې لپاره د منځګړتوب په ذریعه خپله ذمه واري پوره کړې ده.
امير خان متقي د خپلو څلور ورځني سفر په دوران کې د مې پر اوومه، د پاکستاني پوځ له مشر جنرال عاصم منير سره هم ملاقات کړی وو. په دې اړه د پوځ خبرپاڼې ويلي چې په دې موقع د امنيت په سمبالښت ټينګار وشو.
د طالبانو حکومت د ۲۰۲۱ کال په اګست کې پر افغانستان تر واکمنېدو څو میاشتې وروسته د ټي ټي پي او اسلام اباد ترمینځ د سولې د خبرو منځګړتوب وکړ. د دې مذاکراتو په نتیجه کې د دواړو خواوو ترمینځ اوربندونه وشول چې وروستی هغه یې د ۲۰۲۲ز کال تر نومبره برقرار وو خو پر هغې سربېره په پاکستان کې حملې روانې وې.
په دې لړ کې پاکستان په افغانستان کې د طالبانو پر حکومت فشار زیات کړ او تور یې پورې کړ چې د ټي ټي پي مشران له هغه ځایه په پاکستان کې حملې پلانوي. خو ټي ټي پي او په افغانستان کې د طالبانو حکومت د پاکستانیو چارواکو دعوې او تورونه ردوي.
د پاکستان حکومت او ټي ټي پي د امیر خان متقي د سولې د خبرو د وړانديز په اړه څه نه دي ويلي. خو د پاکستان اوسني ایتلافي حکومت د عمران خان په مشرۍ په تير حکومت نيوکې کړې چې د سولې مذاکراتو له وجې یې وسله وال لا قوي شول. د پاکستان مليامنيت کمېټې د ۲۰۲۲ کال د ديسمبر پر ۳۰مه په يوه غونډه کې پرېکړه کړې وه چې د وسله والو پر ضد به هدفي عمليات کوي.
د طالبانو حکومت په تېرو وختونو کې په بیا بیا ټینګار کړی دی چې د افغانستان خاوره به د هېچا پرضد کارېدو ته پرې نه ږدي. د هغوی حکومت داراز، دا تور هم رد کړی دی چې وسلوالې ډلې یې د خاورې په استعمالولو په پاکستان کې حملې کوي. طالبان وايي د ۲۰۱۹ کال په فرورۍ کې امريکايانو سره کړي هغه توافق ته ژمن دي چې وايي د افغانستان خاوره به د ترهګرۍ لپاره نه کاريږي.
طالبان په پاکستان تور پورې کوي چې له خاورې یې افغانستان ته داعش وسله وال او ډرون الوتکې ورځي. د ۲۰۲۳ کال د فرورۍ پر ۲۳مه د طالبانو حکومت دفاع وزير ملا محمد يعقوب ويلي وو چې د افغانستان "فضايي حدود نيول شوي" دي. هغه زیاته کړې وه چې بې پيلوټه الوتکې له پاکستانه ورځي. د پاکستان حکومت په دې اړه څه غبرګون نه وو ښوولی.
