د ایران په پلازمېنه تهران او نورو ښارونو کې پر د سېپټمبر پر ۲۵مه ۱۰مه شپه هم حکومت ضد احتجاجونه روان ول.
مظاهرې د ګشت ارشاد پولیسو د مبینه وهلو له وجې د مهسا امیني په نوم د یوې ۲۲ کلنې نجلۍ تر مړینې وروسته پیل شوې چې د حکومت پر دې خبرداریو سربېره روانې دي چې وار له مخه مرګونې ځپنې او چاپې به لا سختې کړي.
روانه میاشت د امیني تر مړینې وروسته د نړۍ په بېلابېلو برخو کې د ایران سفارتونو دباندې هم مظاهرې شوې دي. د سېپټېمبر پر ۲۵مه په پاریس کې فرانسویو پولیسو د ایران له سفارتي ودانۍ سره نېږدې د سلګونه کسانو لاریون منتشرولو لپاره اوښکې بهوونکی ګیس وکاراوه.
د سېپټېمبر پر ۲۵مه ناوخته زده کوونکي په تهران پوهنتون کې ورغونډ شوي ول او د ((ازادۍ، ازادۍ)) او د بندي زده کوونکو د خوشې کولو نعرې یې وهلې. د ایران د ځواکمنې عدلیې مشر پرون د مظاهره چیانو پر وړاندې ((بې له نرمۍ ښوولو)) د اقدام ژمنه وکړه.
رسمي ارقام ښيي چې په ناکراریو کې تر اوسه ۴۱ کسان وژل شوي دي خو د بشري حقونو سازمانونه او نور څارونکي وايي چې ښايي اصلي شمېر تر دې خورا زیات وي ځکه چې مظاهرې تر لږترلږه ۸۰ ښارونو او سیمو غځېدلې دي.
