د خېبر پښتونخوا اعلا وزير نن (د جولای پر ۱۶مه) د ټانک ضلعې دوره کړې او هلته يې له ځينو سېلاب ځپلو کورنیو سره د مالي مرستو اعلان کړی دی.
محمود خان د ټانک په پايي کلي کې د وژل شوو دوو کسانو کورنيو ته د څلورو څلورو لاکو روپيو امدادي چېکونه ورکړل. نوموړي همدا رنګه د نورو سیلاب ځپلو کورنیو سره هم د مرستو اعلان وکړ. ده وویل، حکومت به هغو کورنیو ته ۴۰۰،۰۰۰ روپۍ ورکوي چې کور یې مکمل ړنګ وي او د چا چې کور په جزوي ډول وران شوی وي، حکومت به ورته ۱۶۰،۰۰۰ روپۍ ورکوي.
خو په سېلابونو کې د ويجاړو شوو کوورنو مالکانو له مشال رېډيو سره په خبرو کې له حکومته غوښتي چې له دوی سره دې سمدتي او د ډېرو پيسو مرستې وکړي.
په خېبرپښتونخوا کې د قدرتي افتونو پر وړاندې د مبارزې اداره وايي، د جون او جولايي مياشتو په بارانونو او له کبله يې په راغليو سېلابونو کې ۲۷ کسان وژل شوي او ۳۷ ژوبل شوي دي او سلګونه کورونه ړنګېدلي دي.
