د امریکا ولسمشر جو بایډن او د چین ولسمشر شي جن پینګ پر اوکراین د روسې یرغل او په دغه اړه د بیجنګ پر موقف خبرې وکړې.
سپینه ماڼۍ وایي، د مارچ پر ۱۸مه د دواړو مشرانو دغو ټیلیفونې خبرو نېږدې دوه ساعته دوام وکړ چې پکې د اوکراین او د تاییوان د حالاتو او د امریکا او د چین تعلقاتو ته کتنه وشوه.
بلخوا تر دغو خبرو یوه ورځ وړاندې د امریکا د بهرنیو چارو وزیر اينتني بلېنکن یوې خبرې غونډې ته ویلي وو چې ولسمشر بایډن به ولسمشر شي ته دا خبره په ډاګه کوي چې چین به د هر هغه اقدام ذمه واره وي چې د روسي یرغل د مرستې په تړاو یې پورته کوي. د دواړو هېوادونو ترمنځ اقتصادي سیالي هم د دغه ټیلیفونې خبرو د اجنډا برخه وه.
دا ټیلیفوني خبرې د مارچ پر ۱۴مه په روم کې د سپینې ماڼۍ د قامي سلامتیا د سلاکار جیک سولېوان او د چین د بهرنۍ پالیسۍ د لوړ پوړې سلاکار یانګ جیچي ترمنځ تر سختو خبرو وروسته پلان شوې وې. په هغه غونډه کې سولېوان د چین له روس سره پر یو ځای کېدو اندېښنه ښودلې وه.
په دې وروستیو کلونو کې چین او روسیې خپلې دوه اړخیزې اړیکې پیاوړې کړي او چین پر اوکراین د روسي یرغل په ښکاره توګه په غندلو کې پاتې راغلی چې دې خبرې په واشنګټن کې اندېښنې راپارولې دي.
