د بشري حقونو څار نړیوال سازمان وايي، طالبانو په افغانستان کې د واک له ترلاسه کولو وروسته پر رسنیو او د بیان ازادۍ پراخ بندیزونه لګولي دي.
دا خبره د یاد سازمان د اسیا څانګې مشرې پېټریشا ګوسمېن د اکتوبر پر لومړۍ نېټه په یوه خبرپاڼه کې کړې ده.
نوموړي ویلي، طالبانو ژمنه کړې وه ، که رسنۍ اسلامي ارزښتونه په پام کې ونیسي نو د فعالیت اجازه به ورکوي خو د دې په وینا، د هغوی نویو اصولو د بیان د ازادي ساه بنده کړې ده.
دا له هغه وروسته ده چې طالبانو د سېپټېمبر په پای کې د افغان خبریالانو لپاره د اصولو یو لسټ خپور کړ.
دوی وویل ، که مطبوعات پر اسلامي اصولو عمل وکړي، بې طرفه وي او ملي ګټو ته ژمن وي نو ازاد او خپلواک به وي.
د نقادانو په وینا، د هغوی دا ګام به سنسرشپ او ځورونو ته لاره هواره کړي.
