د جنوبي وزیرستان د واڼې په خړپل سیمه کې د یو خای پر ځای شوي ماین د چاودنې له له کبله څلور ماشومان ټپیان شوي دي.
د سیمې ایډیشنل ډپټي کمېشنر فهیدالله د اګست پر ۲۸مه مشال راډیو ته وویل چې ټپي شوې درې وړې نجونې او یو وړکی هلک دی چې عمرونه یې د پنځو او ۱۲ کالو په منځ کې دي.
د یوې ماشومې حالت پکې نازک ښودل شوی چې په روغتون کې یې علاج روان دې.
فهیدالله زیاته کړه، د سیمې مرستیال کمېشنر د پېښې په ځای کې له کورنیو سره د سرکاري مرستو ژمنه کړېده.
په وزیرستان کې تر دې وړاندې هم وخت په وخت د ماین چاودنو پېښو کې ماشومان وژل شوي او یا هم معذوره شوي دي.
په وزیرستان کې په مځکه کې د ښخو ماینونو پاکول د پښتون ژغورنې غورځنګ په مطالبو کې یوه ده.
دا تنظیم په ۲۰۱۸ز کال کې جوړ شوی او له هغه وخت راهیسې د نورو غوښتنو ترڅنګ په قبایلي سیمو کې د ښخو ماینونو د صفا کولو مطالبه هم کوي.
دا ماینونه زیاتره د وسله والو طالبانو پرضد د پوځي عملیاتو په وخت ښخ کړل شوي وو.
دا په داسې حال کې ده چې په جنوبي وزيرستان کې د اپرېل پر پنځمه هم په مځکه کې ښخ کړل شوي بم چاودنې څلور ماشومان ژوبل کړي ول.
د يادونې وړ ده چې په جنوبي وزيرستان کې په ماين چادونو کې تر اوسه ۱۲۵ کسان مړه يا معذوره شوي دي. په دي کې زیاتره ماشومان دي.
