تحریک طالبان پاکستان (حکیم الله مسید ډلې) د هغو دوو ملکانو ويډيو خپره کړه چې پنځه ورځې وړاندې خوست ته په لاره د کرمې ایجنسۍ له ببرک تاڼې نه تښتول شوي وو.
په ډېره اسماعیل خان کې د مشال راډیو خبریال سیلاب مسید وايي دغه ویډیويي کلېپ څه کم اوه دقيقې دی او دا ورته د تحریک طالبان پاکستان ( حکیم الله مسید ) ډلې پورې تړلي یو تن سیف الله وزیر ور استولی دی.
په ویډیو کې دواړه مشران ملک جانان او ملک مزاګي د ژمي په مناسب لباس کې ښودل کیږي.
طالبانو ددغو مشرانو د خوشې کولو لپاره څه ډول شرایط نه دي وړاندې کړي، خو وايي د یوې جرګې له لارې به د دغو مشرانو د برخلیک پریکړه کوي.
