اسلام اباد: د پاکستان د کورنیو چارو وزارت پرېکړه کړېده چې پوځ ته به په اسلام اباد کې د درو میاشتو لپاره له عامو امنیتي ځواکونو سره د مرستې اجازه ورکړي.
د یاد وزارت چارواکي وايي چې دا پرېکړه یې د پاکستان د آیین له دوه سوه پنځه څلوېښتم آرټيکل سره سمه کړېده.
چارواکي زیاتوي چې پوځ ته د دې اجازت ورکولو هدف دا دی چې هغوی په پلازمېنه اسلام اباد کې د عامو امنیتي ځواکونو ملاتړ وکړي.
د پاکستان سرکاري راډیو لیکلي چې د اطلاعاتو وفاقي وزیر پرویز رشید تېره ورځ وویل چې دا خبره ناسمه ده چې د ټول اسلام اباد د امنین چارې به پوځ ته سپارل کېږي.
پرویز رشید زیاته کړېده چې پوځ به یوازې د اسلام اباد پر حساسو سیمو د امنیت ټینګ ساتلو لپاره ګمارل کېږي.
اوس پوښتنه دا ده چې د کورنیو چارو د وزارت دې پرېکړې ته سیاستوال او د سیاسي او امنیتي چارو کارپوهان په کوم نظر ګوري.
