د کرکټ د ۱۰م نړیوال کپ په اتمه لوبه کې اسټرېلیا د نیوزي لېنډ لوبډلې ته په اووه وکټونو ماتې ورکړه.
د اسټرېلیا کپتان رکي پونټنګ پچه وګتله او لومړی یې د نیوزي لېنډ لوبډلې ته د بېټنګ کولو بلنه ورکړه. هغوي په ۴۵.۱ اورونو کې پر ۲۰۶ منډو وسوځېدو.
د نیوزي له خوا نېتن مېکولم تر ټولو زیاتې ۵۲ منډې وکړې او د اسټرېلیا له لورې مچل جهانسن تر ټولو ښه بالنګ وکړ او په ۹.۱ اورونو کې یې ۳۳ منډې ورکړې او څلور وکټونه یې واخیستل.
د اسټرېلیا له لورې د ۲۰۷ منډو د هدف ترلاسه کولو لپاره شېن واټسن او بریډلې هېډن د لوبې پیل وکړ. دې لوبغاړو د لومړي وکټ په شراکت ۱۳۳ منډې وکړې. شېن واټسن ۶۲ او بریډلې هېډن ۵۵ منډې جوړې کړې او وسوځېدو.
د اسټرېلیا لوبډلې په ۳۴ اورونو کې ۲۰۷ منډې وکړې او لوبه یې وګتله. د نیوزي لېنډ له خوا همیش بینیټ په اوو اورونو کې ۶۳ منډې ورکړې او ۲ وکټونه یې واخیستل.