Çeşmeler

Madridiň bir kazyýeti suratkeş Salwador Daliniň jesediniň jikme-jik barlagdan (DNK) geçirilmegi üçin, mazarynyň açylmagy barasynda karar çykarypdyr.

Kazyýete bu meselede Ispaniýanyň demirgazygynda ýaşaýan bir zenan ýüz tutupdyr. Ol zenan meşhur suratkeşiň gyzydygyny öňe sürýär.

Kazyýetiň 26-njy iýunda çykaran kararynda aýdylşyna görä, jikme-jik genetika ýa-da biologiýa barlag geçirilip bilinmegi üçin, Daliniň mazardaky galyndylarynyň çykarylmagy hökmanydyr.

Beýik suratkeşiň gyzydygyny öňe sürýän ispan zenan - Maria Pilar Abel ýurduň demirgazygyndaky Girona şäherinde ýaşaýar.

"Söýşüpdirler"

1956-njy ýylda doglan zenan Abeliň aýtmagyna görä, öz ejesi 1950-nji ýyllarda Daliniň maşgalasynda hyzmatkär bolup işläpdir we şonda meşhur suratkeş bilen söýşüpdir.

Şol döwürde Salwador Dali Ýelena Iwanowna Dýakonowa ýa-da Galýa öýlenen bolmaly. Ýöne olardan çaga bolmandyr.

Ispaniýanyň El Pais atly gazetiniň ýazmagyna görä, zenan Abel Daliniň öz kakasy höküminde ykrar edilmegi üçin, 2007-nji ýyldan bäri iş alyp barýar.

Dali 1989-njy ýylda 84 ýaşynda aradan çykypdy. Ol 20-nji asyryň iň beýik surrealist suratkeşleriniň biridir.

Suratkeş öz eserlerini Ispaniýa döwletine miras galdyrypdyr.

Şonuň üçinem Dali bilen "diňe murtunyň bolmany üçin tapawut edýändigini" öňe sürýän zenan Abeliň edýän dawasy hem hut Ispaniýa döwletine garşydyr.

Türkiýäniň orta mekdeplerinde Darwiniň döreýiş teoriýasy okadylmaz.

Ankara hökümeti Ç. Darwin tarapyndan öňe sürlen döreýiş teoriýasynyň "jedelli temadygyny" öňe sürýär.

Türkiýäniň bilim ministrliginiň habar bermegine görä, biologiýa sapagyndan, Darwinizme degişli bolan bölüm 2019-njy okuw ýylynyň planyndan çykarylar.

Türk bilim ministrligi beýannamasyny şeýle tamamlaýar: "Ýaşaýşyň döreýşi we kämilleşmegi" baradaky sapaklar ýokary klaslarda, ýagny synplarda dowam eder.

Magaryf resmileriniň garaýşyna görä, jedelli temalar okuwçylaryň entek özbaşyna oýlanyp, hakykata özüçe göz ýetirip biljek ýaşa gelmänkä okadylyp bilinmez.

Muňa garamazdan, orta mekdeplerde döreýiş teoriýasy barada umumy maglumat berler.

Hökümetiň bu karary ýurduň käbir alymlarynyň berk tankydyna uçar boldy.

Olaryň aýtmagyna görä, şeýlelikde, Türkiýe adamzadyň döreýşi baradaky sapagy gadagan eden iki ýurtdan birine öwrüler. Şeýle sapaklar Saud Arabystanda hem okadylmaýar.

Günbatarda işleýän türk alymlardan Mustafa Akýoluň nygtamagyna görä, döreýiş teoriýasynyň okadylmagy meselesi tä Osman imperiýasy döwründen şu wagta çenli birnäçe gezek gün tertibine getirilipdir. Ýöne indi şeýle üýtgeşikligiň esasy goldawçysy hut prezident Erdogandyr.

Akýoluň bildirmegine görä, Türkiýede şeýle üýtgeşiklik ýurtdaky çakdanaşa dindar toparlaryň gysyşy netijesinde amala aşyrylýar.

Günbatar mediasy bolsa, döreýiş teoriýasy baradaky gapma-garşylykly pikirlere Türkiýedäki dünýewiler bilen dinçileriň arasynda bolup geçýän çaknyşyklarynyň netijesiniň biri hökmünde baha berýär.