Ҳукм шоми 25-уми декабр содир шуд.

Алишер Исматзода шаҳрвандии Русияро дорад ва даҳ соли охир дар ин кишвар мураббии варзиш буд.

Ӯ аз лаҳзаи боздошт худро бегуноҳ медонад. Ба навиштаи хабаргузории расмии “ТАСС”, дар сухани охиринаш дар додгоҳ низ гуфтааст, айбе надорад.

Ба иттилои манбаъ, додрас гуфтааст, мураббии гӯштии озод барои маблағгузории созмони мамнӯи “Давлати исломӣ” ё ДОИШ ба 9 сол ҳабс ва 400 ҳазор рубл ҷарима маҳкум шуд. "Се соли аввали ҳабсро дар зиндони умумӣ ва боқимондаашро дар муассисаи низомаш сангин хоҳад гузаронд", -- гуфтааст додрас.

Исматзода дар ҷараёни мурофиа гуфтааст, ба як нафар пули қарзашро бармегардонд, вале хабар надошт, ки ӯ ба ДОИШ рабт дорад. Додситон таъкид кардааст, ки Алишер Исматзода дар бораи ба террористон фиристода шудани пул хабар дошт ва ин кори ӯ баргардондани қарз набуд. Додгоҳи ҳарбӣ бо ҳарфи ӯ розӣ шудааст.

Аз ҳисоби бонкии варзишгар ба муттаҳам ба терроризм ду дафъа дар умум 9 ҳазор рубл – муодили 90 доллари амрикоӣ – пул фиристода шудааст.

Хабарнигори “ТАСС” менависад, дар мурофиаи додгоҳӣ баёнияи даҳҳо шоҳид, аз ҷумла назари модарони шогирдони Исматзода шунида шуд. Онҳо гуфтаанд, ки ӯ ҳар рӯз бо фарзандонашон дар тамос буд, муомилаи хуб дошт, аз пули худаш либосу пойафзоли варзишӣ мехарид ва ҳамеша кӯдаконро барои комёбиҳои варзишӣ ташвиқ мекард.

Алишер Исматзода фурсат дорад, ки аз рӯйи ҳукм шикоят кунад.

Ӯ 32-сола аст ва зодаи ноҳияи зодаи Ҷайҳун (Қумсангири пешин). Соли 2015 Донишгоҳи давлатии варзиш ва туризми Русияро хатм карда, устоди варзиши Русия дар бахши гӯштии озод, номзад ба устоди варзиш аз рӯи гӯштии юнонию румӣ мебошад.

Дар саҳифааш дар Инстаграм аксҳои зиёде аз ҷараёни мусобиқаҳо ва ё ҷоизагирии варзишгарони ҷавон дида мешавад. Матлаби охирини гузоштааш дар ин саҳифа аз моҳи январи соли 2024 аст.

Ба иттилои матбуоти русӣ, Алишер Исматзода муддате дар мақоми муррабии калони мунтахаби Маскав оид ба гӯштии озод кор карда, баъдан мураббии калони мунтахаби Русия дар бахши гӯштии озод дар миёни занон буд.

Ин нукта дар қонун дар бораи буҷаи давлатӣ барои соли 2025 зикр шудааст.

Бар асоси матни қонун, ки нашрияҳои расмии Тоҷикистон чоп карданд, нишондиҳанда барои ҳисобҳо аз якуми январи соли оянда ба 75 сомонӣ хоҳад расид. 3 сомонӣ бештар аз имсол.

Соли 2024 як нишондиҳанда барои ҳисобҳо 72 сомонӣ ва соли 2023 68 сомонӣ буд.

Дафтари матбуотии парлумон навишт, ки ҷаласаи Маҷлиси намояндагон рӯзи 25-уми декабр дар бинои нав баргузор шуд.

Бинои нави порлумон ва бинои ҳукумат бо 220 миллион доллар пули Чин сохта шуда, моҳи июли имсол дар ҷараёни сафари Си Ҷинпин ба Душанбе ифтитоҳ шуданд.

Ҷойи кори нави вакилон дар хиёбони Рӯдакӣ бунёд ва барои ҳар ду палатаи парлумон пешбинӣ шудааст. Баъзе аз вакилони порлумон қаблан гуфтанд, бинои муҳташам ба кори онҳо таъсири мусбат мегузорад.

Бархе таҳлилгарон, аз ҷумла, Раҷаби Мирзо, бо ишора ба зиёд фаъол набудани вакилон мегӯянд, дар баробари зоҳир ба моҳияти мавҷудияти парлумон таваҷҷӯҳ шавад.

Интихобот дар моҳи марти соли 2025 баргузор хоҳад шуд.

Дар миёни номзадҳо раиси ҳизб Fиёсиддин Ашӯрзода, сармуҳаррири нашрияи "Навиди Кӯлоб" Ғоиб Фирӯз, мудири як кафедраи Донишгоҳи славянӣ Наима Солизода, ходими Пажӯҳишгоҳи иқтисод Комилҷон Бобозода ва вакили Маҷлис Даринг Раҳмон Ҷаҳон Афрӯз ҳастанд.

Анҷумани Ҳизби ислоҳоти иқтисодии Тоҷикистон рӯзи 25-уми декабр дар шаҳри Душанбе гузашт.

Пеш аз ин, баъзе аз ҳизбҳои дигари сиёсӣ, аз ҷумла ҳизби ҳокими халқӣ-демократӣ, номзадҳои худро ба интихобот пешбарӣ карданд.

Баъд аз манъи фаъолияти Ҳизби наҳзати исломӣ, дар Тоҷикистон ҳафт ҳизби сиёсӣ мондааст.

Намояндагони мухолифин дар хориҷа мегӯянд, ҳеч яке ин ҳизбҳо оппозитсияи воқеӣ набуда, вакилонашон дар парлумон аз қарору қонунҳои пешниҳодии ҳукумат бе баҳсу танқид пуштибонӣ мекунанд.

Дар ин бора “Садои Амрико” бо такя ба хабаргузории "Ассошиэйтед Пресс" иттилоъ дод. Ин коргарон барои ширкате заҳмат мекашиданд, ки мошинҳои барқии BYD истеҳсол мекунад.

Додситонии умури кори Бразилия бо нашри видео нишон дод, ки коргарон дар як ҷойи тангу торике бо катҳои бидуни кӯрпа ва бе таҷҳизот шабро рӯз мекунанд.

Дар изҳороти додситонӣ гуфта шудааст, ки коргарон дар Чин аз ҷониби ширкати Jinjiang Construction Brazil барои кор дар корхонаи воқеъ дар шаҳри Камасарии вилояти Салвадор ҷалб шудаанд.

Маъмурияти ширкат шиносномаи коргаронро гирифта, ҳар моҳ 60 дарсад аз даромади онҳоро азхуд мекардааст. "Ҳар касе аз кор хориҷ мешавад, бояд пули парвозашро ба Чин ба ширкат бипардозад", -- гуфта шудааст дар хабари расмӣ.

Додситонҳо гуфтанд, шароити зисти коргарон ба ҳадди сахте буд, ки барои ҳар 31 коргар як ташноб рост меояд ва коргарон маҷбуранд барои қазои ҳоҷат аз соати 4-и саҳар дар навбат биистанд, то ки соати 5:30 тавонанд барои ба кор рафтан омода шаванд.

Ширкати Jinjiang Construction дар Бразилия ба муроҷиати хабарнигорон ҳодиса посух надод.

BYD, истеҳсолкунандаи мошинҳои барқӣ, дар изҳороте рӯзи 23-юми декабр гуфт, ҳама кору қарордодро бо ширкати Jinjian group бекор мекунад.

Дар ин бора хабаргузории ИРНА иттилоъ дод.

Аз ин пеш раисҷумҳур Масъуд Пизишкиён ваъда дода буд, ки монеаҳоро дар Интернет сабуктар хоҳад кард. Феълан маълум нест, қарор кай ба иҷро медарояд.

Ҳамзамон аз 290 узви Маҷлиси Эрон 136 нафар дар номае ба Шӯрои олии амнияти иттилоотӣ навиштаанд, ки манъи истифодаи Google Play ва WhatsApp “тӯҳфае барои душманон" хоҳад шуд.

Истифода аз Facebook, Х, Telegram ва YouTube аз соли 2009 дар Эрон манъ аст. Google Play ва WhatsApp соли 2022, баъд аз марги Маҳсо Аминӣ ва эътирозҳои сартосарии зиддиҳукуматӣ масдуд шуд.

Ҷоизаҳо ба беҳтаринҳои мавсими гузашта аз рӯи 13 номинатсия супурда мешавад. Федератсияи футболи Тоҷикистон дар сомонаи худ рӯйхати номзадҳоро аз рӯи ҳар як номинатсия нашр кардааст.

Аз он ҷумла, барои ҷоизаи беҳтарин бозигари соли 2024 Евгений Гритсенко, дарвозабони дастаи «Равшан»-и Кӯлоб, Манучеҳр Ҷалилов, ҳамлагари тими «Истиқлол”-и Душанбе ва Бахтиёр Қаландаров, бозигари дастаи «Регар-ТадАЗ»-и Турсунзода муддаӣ мебошанд.

Барои ҷоизаи беҳтарин мураббии қаҳрамонии Тоҷикистон байни дастаҳои лигаи олӣ Рустам Хоҷаев, сармураббии дастаи «Хуҷанд»-и шаҳри Хуҷанд, Шамсиддин Қосимов, сармураббии Клуби марказии варзишии артиши Душанбе ва Зайниддин Раҳимов, сармураббии бошгоҳи «Регар-ТадАЗ»-и Турсунзода довталабанд.

Танҳо дар як номинатсия – беҳтарин нишонзани қаҳрамонии Тоҷикистон миёни дастаҳои лигаи олӣ ғолиб маълум аст. Ин ҷоиза ба ҳамлагари дастаи “Истиқлол”-и Душанбе Манучеҳр Ҷалилов, ки дар мусобиқоти имсола 17 гол задааст, супурда мешавад. Дарвоқеъ, вай бори панҷум дар корномаи худ беҳтарин нишонзани қаҳрамонии Тоҷикистон гардидааст.

Рӯйхати довталабон барои дарёфти ҷоизаҳои инфиродии Лигаи футболи Тоҷикистон аз рӯи ҷамъбасти соли 2024:

Беҳтарин бозигари қаҳрамонии Тоҷикистон байни дастаҳои лигаи якум:

Ҷаҳонгир Алиев («Парвоз»)

Шоҳин Боев («Моҳир»)

Хайриддин Турахонов («Ҳулбук»)

Беҳтарин мураббии қаҳрамонии Тоҷикистон байни дастаҳои лигаи якум:

Ҷурахон Мирзоев («Ҳулбук»)

Алишер Полвонов («Парвоз»)

Сиёвуш Боев («Моҳир»)

Беҳтарин бозигари қаҳрамонии Тоҷикистон байни дастаҳои ҷавонони лигаи олӣ:

Муҳаммад Назриев («Истиқлол»)

Акмал Раҳимов («Регар-ТадАЗ»)

Беҳтарин мураббии қаҳрамонии Тоҷикистон байни дастаҳои ҷавонони лигаи олӣ:

Рустам Қурбонов («Истиқлол»)

Ҷамшед Баротов (КМВА)

Зафарҷон Ҳотамов («Эсхата»)

Беҳтарин довар:

Амирҷон Хоркашев (Душанбе)

Гулмуроди Саъдулло (Душанбе)

Насрулло Кабиров (Норак)

Беҳтарин дарвозабон:

Сафармад Ғаффоров («Хуҷанд»)

Шоҳрухҷон Эшбутаев (КМВА)

Евгений Гритсенко («Равшан»)

Беҳтарин ҳимоятгар:

Комрони Мирзохон (КМВА)

Бахтиёр Қаландаров («Регар-ТадАЗ»)

Холмурод Назаров («Равшан»)

Беҳтарин нимҳимоятгар:

Алишер Ҷалилов («Истиқлол»)

Муҳаммадҷон Раҳимов («Равшан»)

Нозим Бобоҷонов («Хуҷанд»)

Беҳтарин ҳамлагар:

Деян Тумбас («Хуҷанд»)

Квадво Фримпонг («Регар-ТадАЗ»)

Ҷаҳонгир Эргашев («Эсхата»)

Беҳтарин легионер, ки дар қаҳрамонии Тоҷикистон бозӣ мекунад:

Квадво Фримпонг («Регар-ТадАЗ»)

Деян Тумбас («Хуҷанд»)

Сергей Яворский («Вахш»)

Беҳтарин мураббӣ:

Рустам Хоҷаев («Хуҷанд»)

Шамсиддин Қосимов (КМВА)

Зайниддин Раҳимов («Регар-ТадАЗ»)

Беҳтарин бозигари сол:

Евгений Гритсенко («Равшан»)

Манучеҳр Ҷалилов («Истиқлол»)

Бахтиёр Қаландаров («Регар-ТадАЗ»)

Хабаргузории “Рейтерс” навишт, раҳбари католикҳои ҷаҳон дар паёми идонааш аз ҷанг дар Украина ба таври мустақим ёд ва ба “зарурати ҷасорат барои боз кардани дари музокирот” даъват намуд.

Попи Рум, ки аз айвони калисои Базилики Муқаддас дар Ватикан ба пайравонаш муроҷиат мекард, гуфт, “бигузор садои силоҳ дар Украинаи ҷангзада хомӯш карда шавад!”

Франсис аз соли 2013 раҳбарии католикҳои ҷаҳонро ба уҳда дорад.

Мақомоти Украина имсол ӯро барои як изҳороташ танқид карданд. Ӯ гуфта буд, ки Украина бояд ба хотири хатми ҷанг барои муколама бо Русия ҷасорат нишон дода, “парчами сафед”-ро бардорад.

Владимир Зеленский, президенти Украина, қаблан ҳама гуна музокираҳои сулҳро бо Русия бидуни барқарории сарҳадҳои пешазҷангии Украина рад карда буд. Вай баъд аз пирӯзии Доналд Трамп дар интихоботи Амрико чанд ҳафтаи охир барои музокираи сулҳ майл нишон медиҳад.

Попи Рум дар суханронии идонааш инчунин ба хатми низоъҳои сиёсӣ, иҷтимоӣ ё низомӣ дар минтақаҳои дигари ҷаҳон, ба мисли Лубнон, Малӣ, Мозамбик, Ҳаитӣ, Венесуэла ва Никарагуа даъват намудааст.

Изҳороти ҳукумати "Толибон"-ро дар ин бора бахши афғонистонии Радиои Озодӣ ва "Рейтерс" нашр карданд.

Бомбаборонҳои артиши Покистон дар вилояти Пактико сурат гирифта, ба гуфтаи мақомоти "Толибон" дар Афғонистон, аксар кушташудаҳо кӯдакону занон ҳастанд.

Ҳамдулло Фитрат, муовини сухангӯи ҳукумати "Толибон", рӯзи 25-уми декабр гуфт, бомбаборон дар чор минтақа рух дод. "Дар ин ҳодиса, инчунин, шаш нафар маҷрӯҳ шуд," - -афзуд ӯ.

Мақомоти Покистон ҳанӯз шарҳе надодаанд.

"Рейтерс" аз қавли Иноятулло Хоразмӣ, сухангӯйи Вазорати дифои Афғонистон, навишт, "Афғонистон ин амалро чун ваҳшиёна ва поймолкунандаи дағалонаи муқаррароти байнулмилалӣ ва як амали возеҳи таҷовуз арзёбӣ мекунад... Амороти Исломӣ ин амали тарсуёнаро беҷавоб намемонад”.

Покистон дар гузашта гурӯҳҳои мусаллаҳи воқеъ дар хоки Афғонистонро масъули ҳамла ба қаламраваш номидааст, вале Афғонистон ин иттиҳомҳоро пайваста рад мекунад.

62 мусофир ва 5 сарнишин дар дохили ҳавопаймо қарор доштанд.

Мақомот гуфтанд, бар асоси маълумоти ибтидоӣ, 29 нафар зинда мондаанд.

Вазорати беҳдошти Қазоқистон хабар дод, 27 нафар, аз ҷумла ду кӯдак ба беморхонаи вилоятӣ бурда шуданд. Вазъи 11 нафар вазнин арзёбӣ мешавад ва онҳо дар шуъбаи эҳёгарӣ ҳастанд.

Вазорати ҳолатҳои изтирории Қазоқистон дар изҳороте гуфт, дар ҷойи ҳодиса хадамоти кумаки изтирорӣ, аз ҷумла оташнишонҳо, кор мекунанд.

Ширкати "Azerbaijan Airlines" хабар дод, ки ҳавопаймои "Embraer 190" бо рақами J2-8243 аз Боку ба Грозний парвоз мекард, вале маҷбур шуд дар секилометрии Оқтау нишасти изтирорӣ анҷом диҳад.

Сабаби суқути ҳавопаймо маълум нест.

Бино ба як хабар, туман (меғ)-и зиёд сабаби тағйири самти парвози ҳавопаймо шудааст.

“Baza" менависад, ҳавопаймои афтода, ки аз Боку ба Грозний ҳаракат мекард, метавонист бо сабаби хатари ҳамлаи бесарнишинҳо ба Чеченистон самти парвозашро дигар карда бошад.

Хабаргузориҳои маҳаллӣ навиштанд, дар миёни мусофирон шаҳрвандони Озарбойҷон, Қазоқистон, Қирғизистон ва Русия мебошанд.

Раҳбарони баъзе аз кишварҳои Иттиҳоди Давлатҳои Мустақил, ки дар ҷаласаи ғайрирасмӣ дар Русия ҳастанд, рӯзи 25-уми декабр ба президенти Озарбойҷон Илҳом Алиев ибрози ҳамдардӣ карданд. Хабаргузории “Рейтерс" навишт, Алиев бо сабаби ҳодиса ҷаласаро тарк кард ва ба Боку баргашт.

Раисҷумҳури Тоҷикистон Эмомалӣ Раҳмон дар паёме аз суқути ҳавопаймои Озарбойҷон изҳори таассуф намуда, ба пайвандони фавтидагон таслият ва ба осебдидагон шифои комил орзу кардааст.

Дастикам як нафар кушта, чандин кас захмӣ шудаанд.

Сергей Меняйло, раҳбари ҷумҳурии Осетияи Шимолӣ, гуфт, "як зан ба ҳалокат расид. Ҳангоми рух додани ҳодиса ӯ дар дохил буд. Вазъи як нафари дигар дақиқ мешавад, ӯро табибон бурданд".

Баъзе аз расонаҳо маҷрӯҳонро аз 5 то 9 нафар ҳисоб кардаанд.

Нашрияи Shot навишт, ки дар ошёнаи чоруми маркази тиҷоратӣ балони газ таркид ва баъди ин дар масоҳати 800 метри мураббаъ сӯхтор сар зад.

РИА Новости бо такя ба Кумитаи ҳолатҳои фавқулода гуфт, ки ошёнаи сеюм ва боми марказ оташ гирифтааст.

Маъмурони наҷоту оташнишонӣ дар ҷойи ҳодиса кор мекунанд.

Ҳамдуллоҳ Фитрат, сухангӯи ҳукумати Толибон шаби гузашта дар шабакаи Х эъломияи вазорати дифои Афғонистонро нашр кард, ки тибқи он, дар ҳамлаҳои ҳавопаймоҳои ҷангии Покистон ғайринизомиён кушта ва захмӣ шудаанд, ки дар миёни онҳо кӯдакон ҳам ҳастанд.

Вазорати дифои Толибон ин амалро "ваҳшиёна" ва нақзи ҳама қонунҳои байналмилалӣ хондааст. Бархе расонаҳои шумори кушташудагони ин ҳамларо 18 нафар гуфтанд.

То кунун мақомоти Покистон дар ин маврди ба таври расмӣ чизе нагуфтаанд, аммо хабаргузории "Ассошиэйтед пресс" дар гузорише аз қавли чаҳор мақоми амниятии Покистон навиштааст, ки артиши ин кишвар дар ҷараёни ҳамлаҳои ҳавоӣ дар хоки Афғонистон, дар минтақаҳои куҳистонии вилояти Пактико, марказҳои омӯзишии Таҳрики Толибони Покистонро аз байн бурдааст.

Ин мақомот, ки нахостанд номашон зикр шавад, ҳамчунин гуфтаанд, ки дар ин ҳамлаҳо шуморе аз ҷангҷӯён низ кушта шудаанд.

Артиши Покистон дар моҳи марти имсол низ дар хоки Афғонистон ҳамлаҳое анҷом дода буд.

Мақомот дар Исломобод борҳо гуфтаанд, ки Таҳрики Толибони Покистон аз қаламрави Афғонистон барои ҳамла дар қаламрави ин кишвар истифода мекунад. Толибони Афғонистон ҳамеша ин гуфтаҳои ҷониби Покистонро рад кардаанд.

Ин ниҳод дар хабарномае навиштааст, кор дар Қатар дар бахшҳои чорводорӣ, анбори мошинҳо ва кор бо техинаи он пешбинӣ шудааст. Ба иттилои Хадамоти муҳоҷират, маош аз 600 доллари амрикоӣ боло аст.

Намояндагони Хадамоти муҳоҷирати Тоҷикистон гуфтаанд, маблағи билет, раводид, ҷойи хоб, хӯрок, либоси корӣ, нақлиёт ва хизматрасонии тиббӣ аз сӯи корфармо пардохт мешавад. Аммо дар хабарномаи расмӣ наомадааст, ки талабот барои кор дар Қатар чӣ аст?

Мақомот гуфтанд, хоҳишмандон бояд ба идораи Хадамоти муҳоҷират дар Душанбе муроҷиат кунанд.

Мақомоти Тоҷикистон талош доранд ба ҷуз Русия роҳи муҳоҷирони тоҷик ба дигар кишварҳо боз шавад. Азҷумла, шаҳрвандони Тоҷикистон дар солҳои ахир барои кор ба Британияи Кабир фиристода мешаванд. Вале шумораи ин муҳоҷирон хеле кам аст.

Владимир Путин аз он тавсиф кард, ки Русия дар садри рӯйхати шарикони тиҷоратии Тоҷикистон қарор дорад ва додугирият миёни ду кишвар зиёд мешавад. Президенти Русия ҳамчунин гуфт, Маскав барои донишҷӯёни тоҷикистонӣ солона то ҳазор квота барои таҳсил ҷудо мекунад ва ин шумораро бештар хоҳад кард.

Мактабҳои русӣ дар Тоҷикистон ва фиристодани омӯзгорон аз Русия яке аз мавзуъҳои асосии суҳбати Путин ва Раҳмон дар назди хабарнигорон буд. Президенти Русия гуфт, феълан 72 омӯзгор аз Русия дар Тоҷикистон кор мекунанд ва соли оянда шумораи онҳоро ба 82 кас мерасонанд. Эмомалӣ Раҳмон гуфт, ба ҷуз мактабҳое, ки аз тарафи Русия сохта шудаанд, инчунин, дар 4,5 ҳазор мактаб дар кишвар забони русиро таълим медиҳанд.

Раисҷумҳури Тоҷикистон дар дидор бо Путин ҳамчунин ба баррасии мавзуъҳои амният дар минтақа таъкид кардааст. Раҳмон гуфт, амният дар минтақа ва ҷаҳон Тоҷикистонро низ нигарон кардааст.

Аммо дар матни суҳбати аввалияи роҳбарони Тоҷикистон ва Русия ва ҳам хабарномае, ки сомонаи президенти Тоҷикистон нашр кард, ишорае ба мавзӯи муҳоҷирон нест. Қаблан Юрий Ушаков, ёвари президенти Русия гуфта буд, ки мавзӯи муҳоҷират ҳатман дар дидори Путин ва Раҳмон баррасӣ хоҳад шуд.

Ба навиштаи дафтари матбуоти президенти Тоҷикистон, дар дидори Эмомалӣ Раҳмон ва Владимир Путин “ҳамкорӣ дар самти таъмини амну субот, аз ҷумла амнияти иттилоотӣ, дар маркази таваҷҷуҳ қарор доштанд.”

Эмомалӣ Раҳмон рӯзи 24-уми декабр барои вохӯрӣ бо Владимир Путин ва ҳам ширкат дар нишасти ғайрирасмии сарони кишварҳои узви Иттиҳоди давлатҳои мустақил ба Русия рафта буд. Соли оянда раёсати ин созмони зери нуфузи Русия ба Тоҷикистон мегузарад.

Ӯро моҳи августи соли 2023 боздошт карда буданд.

Шаҳрванди ИМА ба чӣ гумонбар мешавад, маълум нест. Парвандаи ӯ бо баҳонаи доштани маълумоти сиррӣ пушти дарҳои баста баррасӣ шуд.

Евгений Спектор иттиҳомро рад кардааст ё пазируфтааст, номаълум аст.

Моҳи августи имсол Русия ду шаҳрванди дигари Амрикоро бо дигар русҳои боздоштшуда дар ИМА иваз карда буд.

Шӯрои уламои исломии Русия рӯзи 18-уми декабр фатво дода буд, ки мардони мусулмон бо иҷрои шартҳои шариати исломӣ метавонанд бо чор зан никоҳ кунанд.

Рӯзи 23-юми декабр Додситонии кулли Русия ба Равил Ғайнуддин, муфтии Русия ҳушдор дод, ки қонуншиканиро ислоҳ кунад.

Шамил Алоуддинов, намояндаи Шурои уламои Русия дар Телеграм навиштааст, ки пас аз вокуниши Додситонӣ ва ҷомеаи Русия фатво бекор шуд.

Фатвои "Мушкили бисёрзанӣ дар ҷомеаи мусулмонии Русия" ба издивоҷи динии мусалмонон машварат медод.

Дар он гуфта мешуд, ки марди мусалмон ҳақ дорад, ки бо риояи фармудаҳои шариат бо чанд зан издивоҷ кунад.

Бар асоси ин фатво бояд мард аз нигоҳи молиявӣ ҳама занҳоро баробар таъмин карда, ба ҳар кадоми онҳо хонаи ҷудогона гирад ва бар асоси нақша бо онҳо баробар вақт гузаронад.

Ин фатво ҷанҷолбарангез ва хилофи қонунҳои Русия дониста шуд.

Дар сомонаи Шӯрои уламои Русия навишта шудааст, ки никоҳи мусалмонӣ "қувваи қонунӣ надорад."

Бар асоси оморҳои гуногун дар Русия ҳудуди 20 миллион мусалмон зиндагӣ мекунад.

Вале имрӯз қарор аст ӯ бо президенти Русия Владимир Путин дидору гуфтугӯ анҷом диҳад.

Юрий Ушаков, ёвари Путин гуфт, "масоили доғи соҳаи муҳоҷират" дар маркази гуфтугӯҳои ду раҳбар хоҳад буд.

Маълум нест, манзур мушаххасан чӣ аст. Соли 2024 ҳамла ба “Крокус”-ро мақомоти рус кори дасти шаҳрвандони Тоҷикистон дониста, фишор болои муҳоҷирони тоҷикро афзоиш доданд.

Ушаков гуфтааст, азбаски раҳбарии давраии Иттиҳоди давлатҳои ҳамсуд барои соли 2025 аз Русия ба Тоҷикистон мегузарад, Путин ва Раҳмон қарор аст ҳамкориҳои муштаракро дар ин бахш баррасӣ кунанд.

Дар доираи ин ҷамъомади таълимию тамринӣ футболбозони навраси тоҷик бо ҳамсолони худ аз Имороти Муттаҳидаи Арабӣ ду бозии дӯстона баргузор мекунанд. Бозиҳо рӯзҳои 26-ум ва 28-уми декабр доир мешаванд.

Бояд гуфт, ки бозиҳои дӯстона дар Дубай барои наврасони тоҷик як марҳилаи омодагӣ ба қисми ниҳоии Ҷоми Осиё-2025 мебошад, ки аз 3-юм то 20-уми апрел дар Арабистони Саудӣ барпо мегардад. Рақибони дастаи мунтахаби наврасони Тоҷикистон (U-17) дар гурӯҳ 23-юми январ дар қуръакашии мусобиқот маълум хоҳанд шуд.

Ёдовар мешавем, дастаи мунтахаби наврасони Тоҷикистон (U-17) бо роҳбарии Марко Раҷини, мутахассиси итолиёӣ, дар марҳилаи интихобӣ мунтахаби Гуамро бо ҳисоби рекордии 33:0, дастаи мизбон – Сингапурро бо ҳисоби 3:1 ва тими Умонро бо ҳисоби 2:0 шикаст дода, дар ҷадвали гурӯҳи «J» бо 9 имтиёз мақоми аввалро касб кард ва ба қисми ниҳоии Ҷоми Осиё-2025 миёни наврасони то 17-сола роҳхат гирифт.

Михаил Климарев, масъули шабакаи ZaTelecom навиштааст, рӯзи 23-юми декабр суръат ё трафики Ютуб танҳо 20 дарсад буд. ZaTelecom мунтазам маълумоти суръати бозшавии шабакаҳоро тавассути хидмати мониторинги Google назорат мекунад.

Ба гуфтаи Михаил Климарев, "YouTube амалан дар Русия баста шудааст."

Чанде аз корбарони Радиои Озодӣ ҳам шикоят карданд, ки видеҳоро дар Ютубро бо мушкилӣ тамошо мекунанд ё садои наворро намешунаванд.

Суръати Ютуб дар Русия аз охири тобистони имсол якбора суст шуд. Идораи “Ростелеком” иддао кард, ки мушкилоти техникӣ дар кори хидмати Google Global Cache ба вуҷуд омадааст, аммо Google даст доштан дар мушкили дастрасӣ ба Ютубро дар Русияро рад кард. Баъдтар, ҳадди аққал се ширкати мухобиротӣ эътироф карданд, ки мушкили кори Ютуб аз "танзими Роскомнадзор" ба вуҷуд омадааст.

Ба иттилои расмӣ, созишномаи мазкурро ноиби президенти Бонки Осиёии Сармоягузорӣ ва Инфрасохторӣ ва Вазири молияи Тоҷикистон рӯзи 20-уми декабр дар шаҳри Пекин имзо кардаанд.

Ба гузориши Вазорати молияи Тоҷикистон, ин бонк дар умум барои “Роғун” 500 миллион доллар сармоягузорӣ мекунад, ки дар ду навбат ҷудо мешавад.

Аммо дар хабарномаи расмӣ гуфта нашудааст, ки ин маблағ бо кадом шарту шароит ба Тоҷикистон дода мешавад. Вазорати молия танҳо навиштааст, ки сармояи Бонки Осиёии Сармоягузорӣ ва Инфрасохторӣ дар сохтани неругоҳи “Роғун” ва “таъмири 55 км роҳ, аз ҷумла, пулҳои байни деҳаҳо", сарф мешавад.

Мақомоти Тоҷикистон талош доранд, ки барои бунёди неругоҳи “Роғун” аз ниҳодҳои молии байнулмилалӣ сармоя ҷалб кунанд. Рӯзи 17-уми декабр Бонки ҷаҳонӣ барои “Роғун” 350 миллион доллар грант ё маблағи бебозгашт ҷудо кард.

Аз шоми 23 декабр Душанберо тумани сахте фаро гирифтааст ва ин вазъ субҳи 24-уми декабр низ чунин буд.

Бар асоси онлайн-лавҳаи фурудгоҳи Душанбе, ҳамаи парвозҳо аз соати 21-и шоми 23-юми декабр қатъ шудаанд ва ҳавопаймоҳое, ки аз Русия ва Кувайт ба Душанбе омада буданд, ба фурудгоҳҳои Хуҷанд ва Тошканд фиристода шудаанд.

Ҳанӯз маълум нест, ки туман дар Душанбе кай аз байн меравад ва фурудгоҳ кори худро аз сар мегирад.

Юрий Ушаков, ёвари президенти Русия ба расонаҳои он кишвар гуфтааст, дидори Владимир Путин ва Эмомалӣ Раҳмон дар маҷмааи “Игор” баргузор мешавад.

Ба гуфтаи Ушаков, роҳбарони ду кишвар дар бораи ҳамкориҳои низомӣ, иқтисодӣ ва ҳамчунин вазъият дар Афғонистон сӯҳбат мекунанд.

Ёвари президенти Русия ҳамчунин гуфтааст, дар дидори як ба яки Путин ва Раҳмон "албатта, масъалаҳои мубрам дар бахши муҳоҷират баррасӣ мешаванд".

Дар назар аст, ки дидори Эмомалӣ Раҳмон бо Владимир Путин дар ҳошияи нишасти сарони кишварҳои узви Иттиҳоди давлатҳои мустақил баргузор шавад.

Соли оянда раёсати ин созмони зери нуфузи Русия, ки чанд кишвари собиқ Шӯравиро фаро мегирад, ба ӯҳдаи Тоҷикистон мегузарад.

Соли 2025 раёсати созмони Иттиҳоди Давлатҳои Мустақил ба уҳдаи Тоҷикистон мегузарад.

Аҳмад Саидмуродзода, сардори раёсати кишварҳои ИДМ дар Вазорати корҳои хориҷӣ, рӯзи 20-уми декабр гуфт, ҳадафи асосии Душанбе ин аст, ки мавқеи ин созмон дар арсаи ҷаҳонӣ боло равад: “Ҳадафи дигари мо мутобиқ кардани сохтор, раванд ва усулҳои кори ИДМ ба воқеиятҳои нав аст.”

Тақвияти ҳамкории кишварҳои узв дар бахшҳои саноат, энергетика, мубориза бо қочоқи маводи мухаддир ва харидуфурӯши инсон аз барномаҳои дигари Тоҷикистон барои роҳбарии ИДМ будааст. Дар ин нишаст баъзе аз хабарнигорон пурсиданд, ИДМ як созмони заиф асту Тоҷикистон барои боло бурдани “имиҷи он” дар арсаи ҷаҳонӣ чӣ кор карда метавонад?

Аҳмад Саидмуродзода, намояндаи ВКХ-и Тоҷикистон гуфт, ба ин назар, ки ИДМ як созмони заиф аст, розӣ нест. “Тоҷикистон ИДМ-ро ҳамчун як абзори муҳим барои рушди робитаҳои анъанавии кишварҳои пасошӯравӣ медонад. Нақши ин абзор чаро аз нигоҳи мо муҳим аст? Чунки дар давраи оғози истиқлоли давлатии кишварҳои пасошӯравӣ, дар ин минтақа абзоре вуҷуд надошт, ки робитаи анъанавиро ҳифз ва рушд диҳад. Яке аз ҳадафҳое ки ИДМ ба натиҷааш расидааст, ин барқарор ва таъмин намудани муколамаи устувор ва робитаи анъанавии он кишварҳои пасошӯравӣ аст,”—шарҳ дод Аҳмад Саидмуродзода.

Гузориши видеоӣ дар инҷост:

Иттиҳоди Давлатҳои Мустақил як созмони зери нуфузи Русия 33 сол пеш ба хотири сарҷамъ кардани 15 кишвари шӯравии собиқ таъсис ёфтааст.

Озарбойҷону Арманистон, Беларус, Қазоқистон, Қирғизистон, Молдова, Русия, Тоҷикистон, Туркманистон ва Узбекистону Украина шомили ин созмон ҳастанд. Намояндагони Украина чанд сол боз дар нишастҳои ин созмон ширкат намекунанд.

Ин кишварҳо миёни худ ихтилофҳои зиёде доранд. Аз ҷумла, ҳамлаи Русия ба Украина, ҷанг миёни Озарбойҷону Арманистон бар сари Қаробоғи Кӯҳӣ ва муноқишаҳо дар марзи Тоҷикистону Қирғизистон. Вале масъалаи муҳим барои Тоҷикистон имсол шояд мавзӯи муҳоҷират бошад.

Хабарнигори Радиои Озодӣ зимни нишасти хабарӣ аз намояндаи Вазорати корҳои хориҷии Тоҷикистон пурсид, ки дар давраи раёсаташон дар ИДМ барои муҳоҷирон чӣ нақшаҳое доранд?

Аҳмад Саидмуродзода, намояндаи Вазорати корҳои хориҷӣ, гуфт, талош доранд ҷаласаҳои коршиносон барои ниҳоӣ кардани чор санад дар бахши муҳоҷират баргузор шаванд. Масъули вазорат бе овардани ҷузъиёти бештар дар бораи ин санадҳо афзуд, ин ҳуҷҷатҳо бахши муҳоҷират дар ҳудуди кишварҳои узви ИДМ-ро фаро мегирад, аммо “ниҳоӣ шудани ҳуҷҷатҳо ба душвориҳо рӯбарӯ шуда истодаанд.”

Намояндагони Вазорати корҳои хориҷии Тоҷикистон ҳамчунин гуфтанд, соли оянда роҳбарони кишварҳои узви ИДМ дар Душанбе ҷамъ мешаванд. Дар шароите, ки ихтилоф байни кишварҳои узви ИДМ кам нест, рӯшан нест, ки дар давраи роҳбарии Тоҷкистон ин созмонро чӣ интизор аст.

Ҳизби “Орзуи гурҷӣ”-ро наздик ба Маскав медонанд.

Зурабишвилӣ дар як суханронӣ рӯзи 22-юми декабр миллиардер Бидзина Иванишвилӣ, сарвазири собиқ ва бунёдгузори “Орзуи гурҷӣ”-ро ба қасри президент хонд, то дар бораи таъйини рӯзи интихобот гап зананд.

Ин дархост дар пасманзари эътирозҳо алайҳи натиҷаи интихоботи гузашта ва тасмими якҷонибаи ҳукумат барои ба таъхир андохтани музокираи пайвастани Гурҷистон ба Иттиҳоди Аврупо сурат гирифт.

Интихоботи порулмонӣ дар Гурҷистон рӯзи 26-уми октябр баргузор шуд. Мақомот ҳизби “Орзуи гурҷӣ”-ро пирӯз донистанд, вале Саломе Зурабишвили ва мухолифон натиҷаҳоро напазируфтанд.

“Орзуи гурҷӣ” ҳар гуна қонуншиканиро дар интихобот рад карда, сарфи назар аз эътирозҳо аз баррасии интихоботи нав худдорӣ кард.

Трамп рӯзи 22-юми декабр дар як нишаст изҳор дошт, ки "Путин гуфтааст, мехоҳад ҳарчи зудтар бо ман мулоқот кунад".

Дмитрий Песков, сухангӯйи Кремл, рӯзи 23-юми декабр ба хабаргузории "ТАСС" гуфт, барои мулоқоти Путин бо Трамп, пеш аз савгандёдкунии ӯ дар моҳи январи 2025, "ангезаи воқеӣ вуҷуд надорад".

Маскав дар ҳафтаҳои охир ҳамлаҳоро бо мушаку ҳавопаймоҳои бесарнишин ба саросари Украина бештар кардааст.

Мақомоти Украина мегӯянд, Русия асосан зербунёдҳои иҷтимоӣ ва энергетикиро нишон мегирад.

Пас аз пирӯзии Доналд Трамп дар интихоботи Амрико гуфтугӯҳо дар бораи созиши эҳтимолии сулҳ барои хатми ҷанги Русия алайҳи Украина афзоиш ёфтааст.