Дар мусобиқоти қаҳрамонии CAFA-2024, ки аз 17-ум то 24-уми август дар Душанбе баргузор мешавад, шаш дастаи мунтахаби наврасони то 17-солаи минтақа – Тоҷикистон, Узбекистон, Қирғизистон, Туркманистон, Эрон ва Афғонистон - иштирок мекунанд.
Тибқи қуръакашӣ ба гурӯҳи “А” дастаҳои мунтахаби наврасони Тоҷикистон, Қирғизистон ва Афғонистон, ба гурӯҳи «В» тимҳои Ӯзбекистон, Эрон ва Туркманистон дохил шуданд.
Мунтахаби наврасони Тоҷикистон зери раҳбарии Марко Раҷини, мутахассиси итолиёӣ, дар доираи омодагӣ ба марҳилаи интихобии Ҷоми Осиё-2025 дар қаҳрамонии Ассотсиатсияи футболи Осиёи Марказӣ (CAFA)-2024, ки аз 17-ум то 24-уми август дар Душанбе доир мегардад, ширкат меварзад.
Футболбозони навраси тоҷик дар марҳилаи гурӯҳӣ рӯзи шанбеи 17-уми август бо дастаи Қирғизистон ва рӯзи чоршанбеи 21-уми август бо тими Афғонистон вориди рақобат мешаванд.
Дар марҳилаи гурӯҳӣ дастаҳо аз рӯйи системи даврӣ рақобат мекунанд. Ғолибони гурӯҳҳо баъдан дар финал ба ҳам меоянд. Дастаҳое, ки дар гурӯҳи худ ҷойи дуюмро мегиранд, дар бозӣ барои ҷойи сеюм мубориза мебаранд. Инчунин барои ҷойҳои панҷуму шашум бозиҳои тасаллобахш сурат мегиранд. Ҳамаи бозиҳо дар Варзишгоҳи марказии ҷумҳуриявӣ доир мегарданд.
Ёдовар мешавем, дастаи мунтахаби наврасони Тоҷикистон (U-17) дар марҳилаи интихобии Ҷоми Осиё-2025 дар гурӯҳи «J» бо тимҳои Умон, Сингапур ва Гуам рақобат хоҳад кард. Бозиҳо дар ин гурӯҳ аз 19-ум то 27-уми октябри соли равон дар Сингапур баргузор мешаванд.
Бар асоси натиҷагирии марҳилаи интихобии Ҷоми Осиё-2025 даҳ дастаи ғолиби гурӯҳҳо ва панҷ тими беҳтарини ҷойҳои дуюм ба қисми ниҳоӣ роҳ меёбанд.
Марҳилаи ниҳоии Ҷоми Осиё-2025 миёни дастаҳои наврасони то 17-сола аз 3-юм то 20-уми апрели соли оянда дар Арабистони Саудӣ доир мегардад.
Қаҳрамонии CAFA-2024 байни дастаҳои мунтахаби наврасон (U-17)
Гурӯҳи «А»
Тоҷикистон
Афғонистон
Қирғизистон
Гурӯҳи «В»
Узбекистон
Эрон
Туркманистон
Даври 1-ум
17-уми август (шанбе)
18:30 – Туркманистон - Узбекистон
21:30 – Қирғизистон - Тоҷикистон
Даври 2-юм
19-уми август (душанбе)
18:30 – Афғонистон - Қирғизистон
21:30 – Эрон – Туркманистон
Даври 3-юм
21-уми август (чоршанбе)
18:30 – Узбекистон - Эрон
21:30 – Тоҷикистон – Афғонистон
23-юми август (ҷумъа)
18:00 – Бозӣ барои ҷойҳои 5-6-ум
21:30 – Бозӣ барои ҷойи 3-юм
Финал
24-уми август (шанбе)
Оғози бозӣ - соати 20:00
«А» - «В»
Душанбе, Варзишгоҳи марказии ҷумҳуриявӣ
