Марҳилаи муқаддамотии мусобиқаи анъанавии Ҷоми Федератсияи Футболи Тоҷикистон-2025 дар минтақаи Душанбе 21-уми январ оғоз ёфт. Ба иттилои Федератсияи футболи Тоҷикистон, бозиҳои муқаддамотии Ҷоми ФФТ-2025 дар се минтақа – Душанбе, Хатлон ва Суғд – роҳандозӣ мешаванд.
Дар минтақаи Душанбе шаш дастаи лигаи олӣ - «Истиқлол» (Душанбе), КМВА (Душанбе), «Ҳосилот» (Фархор), «Регар-ТадАЗ» (Турсунзода), «Барқчӣ» (Ҳисор), «Ҳулбук» (Восеъ) ва панҷ дастаи лигаи якум – «Шодмон» (Ҳисор), «Сардор» (Турсунзода), «Ёқут» (Ваҳдат), «Душанбе» (Душанбе) ва «Рангон» (ноҳияи Рӯдакӣ) - иштирок мекунанд.
Дастаҳои «Ҳосилот» ва «Ҳулбук», ки аз минтақаи Хатлонанд, дархост кардаанд дар минтақаи Душанбе бозӣ кунанд, зеро алъон қароргоҳи онҳо дар пойтахти кишвар аст ва дар ҳамин ҷо тамрин мекунанд.
Дар натиҷаи қуръакашӣ дастаҳо ба ду гурӯҳ тақсим шуданд: гурӯҳи «А» - КМВА, «Регар-ТадАЗ», «Ёқут», «Душанбе», «Рангон», «Шодмон»; гурӯҳи «Б» - «Барқчӣ», «Истиқлол», «Сардор», «Ҳулбук», «Ҳосилот».
Таркиби гурӯҳҳои минтақаи Суғд чунин аст: гурӯҳи А - «Мастчох», «Истаравшан», «Эсхата»; гурӯҳи Б - «Парвоз», «Саразм», «Хуҷанд».
Таркиби гурӯҳҳо дар минтақаи Хатлон дертар муайян хоҳад шуд.
Ҳамаи бозиҳои минтақаи Душанбе дар майдони захиравии Варзишгоҳи марказии ҷумҳуриявӣ баргузор мешаванд. Бар асоси низомномаи мусобиқа аз ҳар гурӯҳ ду дастаи беҳтарин ба марҳилаи ниҳоии Ҷоми ФФТ-2025 роҳхат мегиранд.
Дар даври аввали мусобиқа 21-уми январ дар минтақаи Душанбе дар гурӯҳи “Б” ду бозӣ баргузор шуда, бо чунин натиҷаҳо хотима ёфт: “Истиқлол” (Душанбе) – “Ҳосилот” (Фархор) – 0:1 (гол: Паҳлавон Баҳризода, 80); “Сардор” (Турсунзода) – “Ҳулбук” (Восеъ) – 0:2 (голҳо: Х. Турахонов, 13, 50).
Ҷоизаи Ҷоми ФФТ-2025 100 ҳазор сомонӣ муқаррар шудааст. Ба дастаи ғолиб 50 ҳазор сомонӣ тақдим мегардад. Барои ҷойи дуюм 30 ҳазор сомонӣ ва барои ҷойи сеюм 20 ҳазор сомонӣ супурда мешавад.
Ёдовар мешавем, дар мавсими соли 2024 дастаи «Равшан»-и Кӯлоб барандаи Ҷоми Федератсияи футболи Тоҷикистон (ФФТ) гардида буд. Дар бозии ниҳоии Ҷоми ФФТ, ки дар Варзишгоҳи марказии шаҳри Ҳисор баргузор шуд, «Равшан» дастаи «Ҳосилот»-и Фархорро бо ҳисоби 1:0 шикаст дод.
Дар рақобат барои ҷойи сеюм КМВА (Клуби марказии варзишии артиш)-и Душанбе ба дастаи «Барқчӣ»-и Ҳисор бо ҳисоби 2:1 ғалаба кард.
Ҷоми ФФТ аз соли 2012 бори чордаҳум сурат мегирад. Дар ин мусобиқа аз ҳама бештар – 6 бор - “Истиқлол”-и Душанбе ғолиб гардидааст. “Регар-ТадАЗ”-и Турсунзода се бор, “Хайр”-и Ваҳдат, “Кӯктош”-и Рӯдакӣ, КМВА-и Душанбе ва “Равшан”-и Кӯлоб якборӣ барандаи Ҷоми ФФТ шудаанд.
