Раисҷумҳури Амрико эълон кард, ки Иёлоти Муттаҳида аз ин ба баъд аз шарикони тиҷоратияш барои маҳсулоти воридотӣ боҷ меситонад. Аз ҷумла, ба гуфтаи Доналд Трамп, ҳаҷми боҷ аз маҳсулоти Иттиҳоди Аврупо 20 дарсад хоҳад буд. Ба гуфтаи баъзе аз коршиносон, ин тасмим метавонад ба оғози ҷанги тиҷорӣ ва рукуди иқтисод дар ҷаҳон сабаб шавад.
Трамп ҳангоми суханронӣ дар Кохи Сафед рӯзи 2-юми апрел гуфт, боҷе, ки кишварҳои дигар ҷорӣ кардаанд, дари бозорҳоро ба рӯйи молҳои кишоварзӣ ва тавлидотии Амрико баста, ба бӯҳрони тиҷоратӣ ва болоравии қарзи давлатӣ сабаб шудааст.
Ба таъкиди ӯ, кишварҳое, ки мехоҳанд ба бозори Иёлоти Муттаҳида дастрасӣ дошта бошанд, акнун бояд "барои ин имтиёз" пул бипардозанд. Вай изҳор дошт, ки ситонидани боҷ аз шарикони асосии тиҷоратии Амрико яке аз ваъдаҳои маъракаи интихоботиаш буд ва имрӯз ин ваъда... иҷро шуд.”
Иқтисодшиносон ҳушдор медиҳанд, ки ҷорӣ шудани таърифаҳо иқтисоди ҷаҳонро суст ва харҷи солонаи зиндагиро барои оилаҳои миёнҳол дар Амрико низ то ҳазорҳо доллар боло мебаранд.
Вазири молияи Бритониё Рэйчал Ривз яке аз аввалин шахсоне буд, ки ба изҳороти Трамп вокуниш кард ва гуфт: “Муборизаҳои тиҷоратӣ ба фоидаи касе нахоҳад буд.”
Раиси Кумисюни Аврупо Урсула фон дер Лейен тасмими президенти Амрикоро барои ҷорӣ кардани боҷ зарбаи сахте ба иқтисоди ҷаҳонӣ хонд. Вай изҳор дошт, ки агар гуфтушунид бо Иёлоти Муттаҳида натиҷа надиҳад, Иттиҳоди Аврупо омодааст, “иқдоми ҷавобӣ” ба роҳ монад. Вай рӯзи панҷшанбе дар оғози нишасти Иттиҳоди Аврупо ва Осиёи Марказӣ дар Самарқанд гуфт: “Мо аллакай корҳоро дар мавриди бастаи аввалини чораҳои ҷавобӣ ба ин боҷҳо ба анҷом мерасонем.”
Чин ҳам ба эълони Доналд Трамп вокуниш кард ва ваъда дод, ки аз “чораҳои шадиди ҷавобӣ” кор хоҳад гирифт. Дафтари матбуоти Вазорати тиҷорати Чин гуфт, “Пекин қатъиян зидди ин тасмим аст, мо барои ҳимояи ҳуқуқ ва манфиатҳои худ чораҳои қатъӣ меандешем.”
Ба андешаи вазири тиҷорати Чин, таърифаҳои нав ба талаботи қоидаҳои тиҷорати ҷаҳонӣ ва манфиати ҷонибҳо мухолиф буда, “таҷрибаи маъмулии таҳдиди якҷониба аст”. Чин аз Амрико хост, ин таърифаҳоро “фавран бекор” ва ихтилофотро "бо шарикони тиҷоратии худ тавассути муколамаи баробарҳуқуқ ҳал кунад."
Вале ба гуфтаи Доналд Трамп, ҷорӣ шудани таърифаҳо ба фоидаи кишоварзони амрикоӣ, кормандони соҳибихтисос ва бахши саноати мошинсозиву иқтисод хоҳад буд. Вай гуфт, аксар корхонаҳои бузург ваъда додаанд, ки дар соҳилҳои Амрико тавлидотро ба роҳ хоҳанд монд.
“Ҷойҳои корӣ ва ширкатҳо ба кишвари мо баргардонда мешаванд ва тавре мебинед аллакай ин мушоҳида мешавад. Мо пойгоҳҳои саноати дохилии худро афзоиш хоҳем дод,” – гуфт Трамп ва афзуд: “Мо дари бозорҳои хориҷиро боз хоҳем кард ва монеаҳоро барои тиҷорати берунӣ аз байн мебарем. Натиҷа ин хоҳад буд, ки рақобатпазирии тавлидоти дохилӣ бештар шуда, барои истифобаранадагон нарх поин хоҳанд рафт.”
Трамп гуфт, қарори ситонидани боҷ аз рӯзи 3-юми апрел ба иҷро медарояд. Кохи Сафед эълон кард, ки таърифаи алоҳида барои воридоти мошинҳо низ аз ҳамин рӯз иҷро хоҳад шуд.
Нигарониҳо аз эълони боҷ аллакай тавлидотро дар тамоми ҷаҳон кунд карда, ба ноустувории бозорҳои молӣ дар рӯзҳои охир сабаб шудааст. Сармоягузорон мунтазири эълон буданд. Саҳмияҳои амрикоӣ аз моҳи феврал дар ҳаҷми тақрибан 5 триллион доллар зарар диданд.
Пас аз суханронӣ дар ин бора Трамп ду қарори нав дар бораи сиёсати таърифаҳо ё молиётро имзо кард. “Ин рӯзи хотирмон хоҳад буд,” – гуфт вай. “Умедворам пас аз солҳо шумо ба қафо нигариста, хоҳед гуфт, ки қарор дуруст буд. Ин як рӯзи муҳим дар таърихи кишвари мо будааст.”