Ҷашни Наврӯз имсол ба моҳи Рамазон рост омад, вале боз ҳам хиёбонҳои Душанбе, пойтахти Тоҷикистон, пур аз мардум ва меҳмонон буд.

Мижгон бо ҳамсараш Эраҷ барои тамошои тантанаҳои наврӯзӣ аз Эрон ба Тоҷикистон омадааст. Ӯ рӯзи 21-уми март дар суҳбат бо Радиои Озодӣ гуфт, аз ин сафари худ пушаймон нест.

“Воқеан, ҷашни бошукӯҳи ҷашни бостонии муштараки Эрону Тоҷикистон ва воқеан хеле хушҳолем аз ин ки ин таҷрубаи қашангро инҷо ба даст овардем. Воқеан хуш гузашт. Интизориҳоямон бештар аз ин буд, вале бо моҳи Рамазон чун мусодиф шуда, як миқдор маросими шодаш камтар баргузор шуд, вале бо ин ҳол хеле олӣ буд”, - изҳор дошт ӯ.

Фотима, ки аз шаҳри Кирмони Эрон барои тамошои таҷлили Наврӯз ба Душанбе омадааст, рӯзи 21-уми март дар суҳбат бо Радиои Озодӣ гуфт, ҷашни Наврӯз дар Тоҷикистон аз кишвари ӯ каме фарқ дорад.

“Чизе, ки аз қабл дидам, ин ҷашнро хеле бо рақсу овозу шодӣ дар инҷо баргузор мекунанд. Хеле дӯст медоштам, ки биёям ва аз наздик инро бубинам”, - изҳор дошт ӯ.

Таҷлили ҷашни Наврӯз имсол дар Тоҷикистон назар ба солҳои пешин тафовут дорад. Дар пайи бекор шудани низоми раводид миёни Тоҷикистону Эрон, сайёҳони эронӣ дар таҷлили Наврӯзи соли 2025 дар Тоҷикистон зиёд ба назар мерасанд.

Нуҷумшиносон дақиқ кардаанд, ки соли нави хуршедӣ рӯзи 20-уми март, соати 14:01 дақиқа ба вақти маҳаллӣ дар Тоҷикистон фаро расид.

Таҷлили расмии ҷашни Наврӯз дар Душанбе субҳи 21-уми март бо афрӯхтани гулхан оғоз шуд. Ба ин муносибат дар Боғи Ғалаба дар Душанбе мардуми зиёде ҳам ҷамъ омаданд.

Наврӯз яке аз ҷашнҳои асосӣ дар Тоҷикистон буда, ба муносибати он чор рӯз истироҳати расмӣ эълон шудааст.

Дар Қирғизистон вакилон барои пароканда кардани порлумон овоз доданд. Ҳамаи 84 вакил аз ин қарор пуштибонӣ карданд ва касе раъйи мухолиф надод.

Қаблан Нурланбек Тургунбек, раиси порлумон гуфта буд, ки 32 вакил бо далелҳои асоснок пешниҳод карданд, ки Жогорку Кенеш пароканда карда шавад.

Интихоботи навбатии порлумонӣ дар Қирғизистон қарор буд моҳи ноябри соли 2026 ва интихоботи президентӣ январи 2027 баргузор шавад. Дар номаи вакилони қирғиз омадааст, Комиссияи марказии интихобот дар муддати кутоҳ наметавонад ду интихобот баргузор кунад.

Бар асоси қонуни тасвибкардаи порлумон, президент бояд интихоботи пеш аз муҳлат таъйин кунад. Пешбинӣ мешавад, ки интихоботи ояндаи порлумонӣ дар Қирғизистон 30 ноябри имсол баргузор шавад.

Дар Тоҷикистон мавридҳои таҷовуз ба номус ё қасди таҷовуз бештар шудааст.

Оҷонсии омор дар гузориши тозааш мегӯяд, дар ҳашт моҳи соли равон 31 мавриди таҷовуз ба номус сабт шудааст, ки дар қиёс ба ҳамин давраи соли гузашта 10 маврид ё 47 дарсад бештар мебошад.

Маълум нест, ки сабаби якбора зиёд шудани ҳолатҳои таҷовуз ба номус чист. Мақомоти қудратӣ дар ин замина ҳеч шарҳе надодаанд.

Баъзе аз ҷомеашиносон ва ҳуқуқшиносон гуфтанд, ҳанӯз ҳеч таҳқиқоти ҷиддӣ сурат нагирифтааст, ки заминаҳои афзоиши ин мавридҳоро дақиқ кунад. Як мушкили дигар, ба гуфтаи созмонҳои ҳомии ҳуқуқ, ин аст, ки на ҳама сокинон дар Тоҷикистон аз озори ҷинсӣ дидан расман шикоят мекунанд.

Кумитаи наҷоти гаравгонон ва зиндониёни сиёсӣ, ки қароргоҳаш дар Лаҳистон аст, марги Зубайдуллоҳи Розиқ, узви пешини Раёсати олии Ҳизби дар Тоҷикистон мамнуъи наҳзати исломиро натиҷаи дар шароити бад нигоҳ доштани мухолифони ҳукумат гуфтааст.

Ин созмон 24-уми сентябр дар изҳороте гуфт, "таъқиби мухолифон ва нигоҳ доштани онҳо дар шароити ғайриинсонӣ, боиси чунин фоҷеаҳо шудааст".

Мақомоти Тоҷикистон ба ин изҳорот вокунише накардаанд ва дар бораи сабабҳои марги Зубайдуллоҳи Розиқ дар зиндон чизе нагуфтаанд.

Ин собиқадори ҳаракати сиёсии исломӣ ва донишманди фиқҳ субҳи 24-уми сентябр дар синни 83 солагӣ дар зиндони шаҳри Ваҳдат даргузашт ва дар шаҳри Душанбе ба хок супорида шуд.

Ба гуфтаи наздиконаш, Зубайдуллоҳи Розиқ то зиндонӣ шуданаш дар соли 2015 гирифтори бемории дил буд. Ӯро соли 2024 як муддат дар бемористони зиндони шаҳри Ваҳдат бистарӣ карда буданд.

Кумитаи наҷоти гаравгонон ва зиндониёни сиёсӣ аз ҷомеаи ҷаҳонӣ даъват кардааст, ки "барои озодии фаврии ҳамаи зиндониёни сиёсӣ дар Тоҷикистон тадбирҳои ҷиддӣ андешанд".

Мақомоти Тоҷикистон будани зиндониёни сиёсиро дар кишвар рад мекунанд.

Дастаи мунтахаби футзали Тоҷикистон, ки дар бозии охиринаш дар марҳилаи интихобии Ҷоми Осиё-2026 аз тими миллии Ҷопон бо ҳисоби 1:3 мағлуб шуд, дар гурӯҳи С мақоми дуюмро касб кард ва ба қисми ниҳоии мусобиқот роҳ ёфт.

Бозии футзалбозони тоҷик бо қаҳрамони чаҳоркаратаи Осиё шаби 24-уми сентябр дар Қасри теннис ва маҷмааи варзишҳои обии шаҳри Душанбе доир гардид.

Нимаи аввали бозӣ бо ҳисоби 1:0 ба суди футзалбозони тоҷик хотима ёфт. Голро Самандар Ризомов дар дақиқаи 13-ум ба самар расонд.

Дар нимаи дуюми бозӣ ҷопониҳо ба дарвозаи мизбонон се гол заданд. Голҳоро Сора Каназава, Митсури Накамура ва Казуя Шимизу ба дарвозаи мунтахаби Тоҷикистон ворид карданд. Ҳамин тавр, бозӣ бо ғалабаи мунтахаби Ҷопон бо ҳисоби 3:1 ба поён расид.

Дар бозии дигари даври сеюм дар гурӯҳи С тими миллии Камбоҷа бар дастаи мунтахаби Макао бо ҳисоби 11:2 ғолиб омад.

Ёдовар мешавем, дар даври якуми марҳилаи интихобии Ҷоми Осиё-2026 дар гурӯҳи С Ҷопон бар Камбоҷа бо ҳисоби 5:0 ва Тоҷикистон бар Макао бо ҳисоби 10:2 пирӯз шуда буданд. Дар даври дуюм Ҷопон бар Макао бо ҳисоби 13:0 ва Тоҷикистон бар Камбоҷа бо ҳисоби 7:1 ғалаба карданд.

Ба ин тартиб, пас аз натиҷагирии бозиҳои се даври мусобиқот дар гурӯҳи С Ҷопон бо касби 9 имтиёз мақоми аввалро соҳиб шуда, ба қисми ниҳоии Ҷоми Осиё-2026 роҳхат гирифт.

Мунтахаби Тоҷикистон зери раҳбарии сармураббӣ Пайрав Воҳидов дар гурӯҳи худ бо касби 6 имтиёз ҷойи дуюмро ишғол кард ва ба қисми ниҳоии мусобиқот роҳ ёфт.

Бояд тазаккур дод, дар қисми ниҳоии Ҷоми Осиё, ки аз 27-уми январ то 7-уми феврали соли 2026-ум дар Индонезия доир мегардад, ба ғайр аз дастаи мизбон, ғолибони ҳашт гурӯҳи интихобӣ ва ҳафт дастаи беҳтарини ҷойҳои дуюм иштирок хоҳанд кард.

Ҳайати дастаи мунтахаби футзали Тоҷикистон дар мусобиқоти интихобии Ҷоми Осиё-2026 чунин буд:

Дарвозабонҳо: Фирӯз Бекмуродов, Нуриддин Ҷабборов, Фирӯз Бозмамадов;

Бозигарони майдонӣ: Дилшод Саломов, Идрис Ёров, Самандар Ризомов, Некрӯз Идиев, Насратшо Исмоилов, Муҳаммад Раҷабов, Муҳаммадҷон Шарипов, Бахтиёр Солиев, Хусрав Холиқназаров, Умед Қузиев, Баҳодур Хоҷаев;

Сармураббӣ – Пайрав Воҳидов.

Мавқеи дастаҳо дар ҷадвали гурӯҳи С

Исроил рӯзи 24 сентябр эълон кард, ки бар асари бархӯрди як паҳбоди партобшуда аз Яман ба шаҳри Илот дар соҳили Баҳри Сурх, дастикам 22 нафар захмӣ шуданд.

Гурӯҳи ҳусиҳои Яман, ки ҳукуматро дар Санъо дар даст дорад, масъулияти ин ҳамларо, ки дар дуввумин рӯз аз соли нави яҳудиён анҷом шуд, ба дӯш гирифт.

Расонаҳои исроилӣ бо такя ба таҳқиқоти аввалия эълон кард, ки сомонаҳои дифои ҳавоии Исроил натавонистанд паҳбодро раҳгирӣ кунанд.

Нерӯҳои имдодрасони тиббии Исроил эълон кард, ки тимҳояш панҷ осебдидаро, ки ҷароҳатҳо бардошта буданд ва вазъи ду нафарашон вазнин аст, таҳти дармон қарор додаанд.

Пулис эълон кард, ки ин паҳбод дар маркази шаҳри Илот суқут кард ва хисоротеро ба минтақае, ки гардишгарон дар он рафтуомад мекунанд, ворид кардааст.

Навори видеоие, ки дар шабакаҳои иҷтимоӣ чарх мезанад, вале ба таври мустақил қобили ростозмоӣ нест, нишон медиҳад, ки як паҳбоди қабл аз бархӯрд, бар фарози ин шаҳри тафреҳӣ парвоз мекунад ва дуд аз маҳали бархӯрд баланд мешавад.

Артиши Исроил пеш аз ин эълон карда буд, ки занги хатар дар саросари Илот, ин шаҳри тафреҳӣ дар наздикии марзҳои Миср ва Урдун, ба садо даромадааст.

Ҳамлаи паҳбодии рӯзи чаҳоршанбе чанд рӯз пас аз он сурат гирифт, ки ҳусиҳои Яман як паҳбод партоб карданд, ки дар Эйлот суқут кард ва боиси хисороти молӣ шуд, аммо талафоти ҷонӣ надошт.

Ҳусиҳо дар як соли гузашт мушакҳо ва паҳбодҳоеро аз ҳазорон километр дурӣ ба тарафи шимол ва Исроил партоб кардаанд. Ҳусиҳо ин амали худро нишонаи "ҳамбастагӣ бо фаластиниҳо" медонанд. Шумори зиёди ин мушакҳо ва паҳбодҳои партобшуда раҳгирӣ шуданд ё ба хоки Исроил нарасидаанд.

Исроил ҳам чанд бор шаҳри Санъо ва бандарҳои муҳими Яманро мавриди ҳамла қарор додааст.

Як намояндаи "Шабакаҳои тақсимоти барқ" ба Радиои Озодӣ тасдиқ кард, ки дар баъзе минтақаҳои кишвар барқро муваққатан қатъ мекунанд.

Ин масъули Шабакаҳои тақсимоти барқ", ки бидуни зикри номаш бо Радиои Озодӣ сӯҳбат кард, гуфт, бо мақсади таъмири хатҳои интиқол ва дастгоҳҳо, асосан шабона барқро хомӯш мекунанд.

Ин дар ҳолест, ки сокинон аз вилоятҳои Хатлон, Суғд ва ноҳияҳои тобеи марказ шикоят доранд, ки давоми як ҳафтаи ахир бо маҳдудият ё "лимит" барқ мегиранд. Ба гуфтаи сокинон, рӯзона аз соати 8 то 17 ва бегоҳ аз соати 21 то субҳ барқ надоранд.

Ҳамсӯҳбати мо дар "Шабакаҳои тақсимоти барқ"-и ҷумҳурӣ дақиқ нагуфт, ки корҳои таъмирӣ кай ба анҷом мерасанд. Ӯ танҳо гуфт, қатъи муваққати барқ ҳадди ақал то охири моҳи сентябр давом мекунад.

Бо вуҷуди шикояти сокинон аз қатъи барқ, ҳеч мақоми расмӣ, аз ҷумла ширкатҳои "Барқи тоҷик" ва "Шабакаҳои тақсимоти барқ" вазъро расман шарҳ надодаанд.

Мақомот дар гузашта қатъи барқро ба таъмири дастгоҳ ва хатҳои интиқол рабт медоданд, ки бархеҳо ба он бовар надоранд. Сокинон мегӯянд, бидуни огаҳӣ қатъ кардани барқ зиндагии онҳоро мушкил кардааст.

Ҳамасола бо фаро расидани фасли тирамоҳ дар Тоҷикистон лимит ё маҳдудияти барқ ҷорӣ мешаванд. Ба ҷуз пойтахт ва маркази вилоятҳо, сокинони минтақаҳои Тоҷикистон дар фаслҳои тирамоҳ ва зимистон бо маҳдудият барқ мегиранд.

Хадамоти федероли амнияти Русия мегӯяд, як шабакаи ғайриқонуниеро ошкор кардааст, ки ба муҳоҷирон санадҳои қалбакӣ медод.

Ба гузориши хабаргузории русии ТАСС, ин шабака аз 3 нафар иборат буд ва онҳо қасд доштанд ба яке аз кишварҳои Осиёи Марказӣ фирор кунанд.

Манбаъ мегӯяд, гумонбарон дар вилоятҳои Новосибирск ва Петропавловск барои муҳоҷирон санадҳои қалбакӣ, аз ҷумла расид дар бораи пардохти маблағи патент медоданд ва муҳоҷирон бо ин санадҳо дар сохтмонҳои минтақаи Камчатка кор кардаанд.

Хадамоти федероли амнияти Русия ё ФСБ дар бораи афроди боздоштшуда маълумоти зиёд надодааст. Дар хабарномаи расмӣ танҳо зикр шудааст, ки нисбати ин се нафар бо иттиҳоми ташкили муҳоҷирати ғайриқонунӣ парванда боз кардаанд.

Ҳамчунин нисбати муҳоҷироне, ки бо санадҳои қалбакии аз ин афрод гирифтаашон кор кардаанд, бо иттиҳоми истифодаи асноди сохта парвандаи ҷиноятӣ боз ва онҳоро дар боздоштгоҳи муваққатӣ ҷой додаанд.

Дар гузашта ҳам мақомоти Русия аз боздошти афроде хабар дода буданд, ки барои муҳоҷирон санадҳои қалбакӣ дуруст мекарданд.

Томас Баррак, намояндаи вижаи Амрико дар умури Сурия ва Лубнон мегӯяд, ки Исроил ва Сурия ба як созиш барои "коҳиши таниш", наздик шудаанд.

Ба гузориши хабаргузории "Рейтерз", Томас Баррак рӯзи сешанбе дар ҳошияи нишасти Маҷмаи умумии СММ ба хабарнигорон гуфт, ки бар асоси ин созиш, Исроил ҳамлаҳои худро қатъ мекунад.

Ӯ афзуд, ки Сурия ҳам мувофиқат кардааст, ки ҳеҷ аслиҳа, таҳҷизоти вазнин ва мошинҳои ҷангиро дар наздикии марзи Исроил надошта бошад.

Баррак ҳамчунон гуфт, ки Доналд Трамп, раисҷумҳури Амрико дар пайи даст ёфтан ба созиш байни Исроил ва Сурия дар ин ҳафта буд, аммо бинобар ба даст наомадани пешрафтҳои зарурӣ ва рухсатиҳои соли нави яҳудӣ, аз суръати гуфтугӯҳо коста шуд.

Пеш аз ин, Аҳмад Аш-Шаръ, раисҷумҳури Сурия, даст ёфтан ба як созиши амниятӣ байни кишвараш ва Исроилро барои амнияти Сурия зарурӣ хонда буд.

Мақомоти интизомии Русия шаби 23-юми сентябр дар Красноярск вориди як маросими хурсандии муҳоҷирони зодаи Осиёи Марказӣ шуда, даҳҳо нафарро боздошту бозпурсӣ карданд.

Хабаргузориҳои маҳаллӣ навиштаанд, ки аксари онҳо зодагони Узбекистон будаанд.

Кормандони пулису ОМОН-и рус замоне вориди маросими хурсандӣ шуданд, ки муҷрӣ суханронӣ мекард ва меҳмонон хӯрок мехӯрданд. Як тан аз кормандони ОМОН баландгӯро аз дасти барандаи маҳфил гирифта, мегӯяд, санадҳояшонро барои тафтиш омода кунанд.

Пулис дар хабарномааш гуфтааст, ки дар ин маросим 620 нафар ширкат дошт ва онҳо "амалиёти зидди маводи мухаддир" анҷом доданд.

Шеваи бархӯрди маъмурон, ки бо сагу силоҳ вориди маҳфили шодӣ шуда, онро баҳам задаанд, аз ҷониби корбарони шабакаҳои иҷтимоӣ сахт маҳкум шуда, ин ҳодисаро сатҳи баландӣ бераҳмӣ ва муҳоҷирситезӣ дар Русия номиданд.

Аммо пулис гуфтааст, ки дар ин маҳфил 210 муҳоҷири хориҷӣ ҳузур дошт ва онҳо тафтиш карданд, ки ҳашт нафари онҳо ғайриқонунӣ дар Русия зиндагӣ мекунанд.

Дар навори нашркардаи пулис дида мешавад, ки онҳо гурӯҳе аз меҳмонони маҳфилро даст пушти ҳам бо автобус ба шӯъбаи пулис мебаранд.

Мақомоти интизомии Русия чанд соли ахир бо бадтарин шева бо муҳоҷирон бархӯрд карда, бе огоҳӣ ба ҷои хобу кори онҳо ҳамла мекунанд.

Созмонҳои ҳомии ҳуқуқи муҳоҷирон Русияро барои пеш гирифтани сиёсати бегонаситезӣ, озору азияти муҳоҷирон ва ҳамзамон шароити дурусти корӣ фароҳам накардан барои онҳо танқид мекунанд.

"Моҳи дар шаст", филми муштараки Тоҷикистону Эрон бори аввал дар шаҳри Теҳрон намоиш дода шуд. Маросими рӯнамоӣ 21-уми сентябр бо ҳузури Сафири Тоҷикистон дар Эрон ва раиси Фарҳангистони забон ва адаби форсӣ баргузор шудааст.

Филми "Моҳи дар шаст" нахустин лоиҳаи муштараки "Довфилм", "Тоҷикфилм" ва ширкатҳои эронии IFilm ва 30CUP мебошад.

"Филм қиссаи писарбачаи 10-сола бо номи Далерро нақл мекунад, ки дар мактаб-интернат ба воя расидааст. Ӯ ҳамроҳи Самад, ки ба қиморбозӣ майл дорад, дар вақти таътил ба ҷустуҷӯи модари худ мекунад. Ин сафар аз шимол то ҷануби Тоҷикистон тӯл кашида, қаҳрамононро бо рӯйдодҳои ғайриинтизор рӯ ба рӯ месозад. Дар ниҳоят, Далер бояд қароре қабул кунад, ки тамоми зиндагии ӯро дигаргун месозад", - гуфтанд таҳиягарон.

Филми "Моҳӣ дар шаст" дар коргардонии Муҳиддини Музаффар таҳия шуда, филмномаро Бахтиёр Каримов навиштааст.

Нақшҳои асосиро ҳунарманди тоҷик Хуршед Мустафоев ва Абдулло Абдураҳимзода, писарбачаи 8-сола аз мактаб-интернати шаҳри Душанбе бозидааст. Ӯро аз миёни 1800 довталаб интихоб кардаанд.

Дар Тоҷикистон мубтало шудан ба бемориҳои сироятӣ ба таври назаррас зиёд шудааст.

Оҷонсии омор бо такя ба Вазорати тандурустӣ гузориш додааст, ки дар ҳашт моҳи имсол дар кишвар 19 ҳазору 419 ҳолати гирифторӣ ба бемориҳои сироятӣ сабт шудааст, ки дар қиёс ба ҳамин давраи соли гузашта 22,7 дарсад бештар аст.

Мақомот шарҳ надодаанд, ки сабаби якбора зиёд шудани гирифторӣ ба бемориҳои сироятӣ чист.

Роҳбарони Амрико ва Украина 23-юми сентябр дар ҳошияи ҷаласаи Маҷмааи умумии Созмони милал дар шаҳри Ню-Йорк вохӯрдаанд. Трамп қабл аз оғози вохӯрӣ гуфт, Украина "бо ҷилавгирӣ аз артиши бузурги (Русия) кори бузургеро анҷом медиҳад."

Хабарнигорон аз президенти ИМА пурсиданд, ки дар сурати нақзи ҳарими ҳавоӣ Аврупо метавонад ҳавопаймо ва бесарнишинҳои русиро сарнагун кунад? Посухи Трамп мусбӣ буд.

Доналд Трамп ҳамчунин пешбинӣ кард, ки Виктор Орбан, нахуствазири Венгрия аз хариди нафту гази Русия худдорӣ мекунад.

Трамп ҳамчунин таъкид кард, ки иқтисоди Русия дар ҳолати ваҳшатнок аст.

Владимир Зеленский дар дидор бо ҳамтои амрикоиаш гуфт, неруҳои ин кишвар давоми як моҳи ахир 360 километри мураббаъ хоки Украинаро озод кардаанд. Зеленский ҳамчунин аз муҳосираи ҳазор сарбози Русия хабар дод, ки баъдан бо асирони украинӣ иваз карда мешаванд.

Доналд Трамп баъди вохӯрӣ бо Зеленский дар шабакаи иҷтимоиаш Truth Social навишт, Украина бо кумаки Иттиҳоди Аврупо "метавонад ҳамаи ҳудуди аз даст рафтаашро баргардонад".

Додгоҳи вилояти Хатлон занеро, ки се кӯдакашро бо корд захмӣ карда буд, ба 28 сол зиндон маҳкум кардааст. Ба иттилои хабаргузории "Азия-Плюс", ҳукм 16-уми сентябр содир шуда, маълум нест, ки Юлдуз Бозорова аз болои он шикоят мекунанд ё не.

Додгоҳ Юлдуз Бозорова, сокини 24-солаи ноҳияи Қубодиёнро дар куштор бо бераҳмии махсус гунаҳкор донист. Кодекси ҷиноии Тоҷикистон барои ин иттиҳом аз 15 то 25 соли зиндонро пешбинӣ кардааст, аммо маълум нест, ки додгоҳ бо кадом далел ба зан ҷазои аз ҳама вазнин таъйин кардааст.

Намояндагони Додгоҳи вилояти Хатлон бо сабаби ба қувваи қонун надаромадани ҳукм аз шарҳи он худдорӣ мекунанд.

Юлдуз Бозорова рӯзи 21-уми июн фарзандони худ Муҳаммадҷони 5-сола, Исои 4-сола ва Ҳадичаи шашмоҳаро чанд кордӣ задааст. Ҳадичаи шашмоҳа, ки аз се ҷои баданаш захм бардоштааст, рӯзи 5-уми июл дар шифохонаи ноҳияи Шаҳритус ҷон дод.

Ду фарзанди дигараш низ захмӣ шудаанд ва баъд аз муолиҷа ба наздиконашон баргардонида шуданд. Мақомот то ҳол шарҳ надодаанд, ки ин зан чаро даст ба ин кор зад. Пештар мақомот эҳтимоли бемори равонӣ будани Юлдуз Бозораваро рад карда буданд.

Қаблан низ дар Тоҷикистон модарон қасди ҷони фарзандонашонро карда буданд.

Бо фаро расидани фасли тирамоҳ, шикояти сокинон аз қатъи барқ зиёд шудааст.

Дар ҳоле, ки Шабакаҳои тақсимоти барқ расман маҳдудият ё "лимит"-и барқ ҷорӣ накардааст, сокинон мегӯянд, рӯзона аз соати 8 то 17 ва бегоҳ аз соати 21 то субҳ барқ надоранд.

Айни ин шикоят аз ноҳияҳои Шаҳринав, Ҷайҳун, Ҳамадонӣ, Панҷ, Рӯдакӣ, Фархор ва Ҳисор ба Радиои Озодӣ расидааст.

Талошҳои мо барои гирифтани шарҳи расмӣ аз идораи барқ бенатиҷа буд. Аммо дар сомонаи Шабакаҳои тақсимоти барқ ва расонаҳои давлатӣ ҳеч гуна хабаре дар бораи ҷорӣ шудани маҳдудият дар кишвар нест.

Мақомот дар гузашта қатъи барқро ба таъмири дастгоҳ ва хатҳои интиқол рабт медоданд, ки бархеҳо ба он бовар надоранд.

Ёдовар мешавем, ки ба ҷуз пойтахт ва маркази вилоятҳо, сокинони минтақаҳои Тоҷикистон дар фаслҳои тирамоҳ ва зимистон бо маҳдудият барқ мегиранд.

Як гуруҳ сокинони шаҳри Исфара шикоят доранд, ки мақомот барқи деҳаро қатъ карда талаб кардаанд, ки фарзандонашонро ба артиш фиристанд.

Ба гуфтаи сокинони ҷамоатҳои Чоркуҳ ва Сурх, қариб як ҳафта боз барқ надоранд.

Дар наворе, ки сокинон ба Радиои Озодӣ фиристоданд, дида мешавад, ки масҷид ва кӯчаҳо ториканд ва барқ хомӯш аст.

Як сокини ҷамоати Сурх гуфт, мақомот гуфтаанд, барқи онҳо замоне дубора пайваст мешавад, ки фарзандонашонро ба артиш фиристанд. Мақомот ин шикоятро рад мекунанд.

Намояндагони идораи тақсимоти барқи шаҳри Исфара бидуни зикри номашон гуфтанд, дар баъзе маҳаллаҳои ҷамоати Сурх барқро хомӯш намудаанд, аммо ин ба таъмири хатҳои интиқол вобаста аст ва ба сарбозгирӣ ҳеч рабте надорад.

Даъвати тирамоҳии ҷавонон ба артиш 1-уми октябр оғоз шуда, то охири ноябр давом мекунад. Мақомот аз ҳоло ҷавононро барои рафтан ба артиш омода мекунанд.

Ин бори аввал нест, ки сокинони шаҳри Исфара аз қатъи барқ дар мавсими даъват ба артиш шикоят мекунанд. Айни чунин шикоят аз дигар минтақаҳои Тоҷикистон ҳам дар гузашта садо дода буд.