Бозӣ барои ҷойи сеюми мусобиқот миёни футболбозони навраси Тоҷикистону Эрон шаби ҷумъаи 23-юми август дар Варзишгоҳи марказии шаҳри Душанбе доир гардид. Замони асосии дидор бо ҳисоби мусовии 1:1 хотима ёфт. Аз рӯи силсилаи пеналти ё зарбаҳои 11-метрӣ мунтахаби наврасони Тоҷикистон бо ҳисоби 4:2 пирӯз шуд. Дарвозабони дастаи Тоҷикистон Абубакр Раҳмонқулов, ки ду тӯби аз пеналти задаи рақибонро баргардонд, беҳтарин бозигари ин дидор эътироф гашт.
Дар бозии тасаллобахш барои ҷойи панҷум дастаҳои мунтахаби наврасони Қирғизистон ва Туркманистон рақобат карданд. Ин бозӣ, ки 23-юми август дар Варзишгоҳи марказии ҷумҳуриявӣ доир шуд, бо ҳисоби 2:0 ба суди наврасони туркман ба поён расид. Голҳоро Какамурат Бобоев дар дақиқаи 17-ум ва Муҳаммадалӣ Носиров дар дақиқаи 50-ум ба самар расонданд.
Ба ин тартиб, дар бозии ниҳоӣ, ки рӯзи шанбеи 24-уми август дар Варзишгоҳи марказии Душанбе соати 20:00 шуруъ мешавад, дастаи ғолиби гурӯҳи “А” – Афғонистон - ва тими ғолиби гурӯҳи “В” – Узбекистон - барои Ҷоми қаҳрамонии CAFA-2024 ва медалҳои тилло мубориза мебаранд.
Дар мусобиқоти қаҳрамонии CAFA-2024, ки дар Душанбе 24-уми август ба анҷом мерасад, шаш дастаи мунтахаби наврасони то 17-солаи минтақа – Тоҷикистон, Узбекистон, Қирғизистон, Туркманистон, Эрон ва Афғонистон - иштирок карданд.
Тибқи қуръакашӣ ба гурӯҳи “А” дастаҳои мунтахаби наврасони Тоҷикистон, Қирғизистон ва Афғонистон, ба гурӯҳи «В» тимҳои Узбекистон, Эрон ва Туркманистон дохил шуданд.
Дар марҳилаи гурӯҳӣ дастаҳо аз рӯйи системи даврӣ рақобат карданд. Ғолибони гурӯҳҳо дар финал ба ҳам меоянд. Дастаҳое, ки дар гурӯҳи худ ҷойи дуюмро гирифтанд, дар бозӣ барои ҷойи сеюм мубориза бурданд. Инчунин барои ҷойи панҷум бозии тасаллобахш сурат гирифт.
Ширкат дар қаҳрамонии CAFA-2024 барои мунтахаби наврасони Тоҷикистон (U-17) зери раҳбарии Марко Раҷини, мутахассиси итолиёӣ, як давраи омодагии даста ба марҳилаи интихобии Ҷоми Осиё-2025 маҳсуб мешуд.
Дастаи мунтахаби наврасони Тоҷикистон (U-17) дар марҳилаи интихобии Ҷоми Осиё-2025 дар гурӯҳи «J» бо тимҳои Умон, Сингапур ва Гуам рақобат хоҳад кард. Бозиҳо дар ин гурӯҳ аз 19-ум то 27-уми октябри соли равон дар Сингапур барпо мегарданд.
Бар асоси натиҷагирии марҳилаи интихобии Ҷоми Осиё-2025 даҳ дастаи ғолиби гурӯҳҳо ва панҷ тими беҳтарини ҷойҳои дуюм ба қисми ниҳоӣ роҳ меёбанд.
Марҳилаи ниҳоии Ҷоми Осиё-2025 миёни дастаҳои наврасони то 17-сола аз 3-юм то 20-уми апрели соли оянда дар Арабистони Саудӣ доир мегардад.
Қаҳрамонии CAFA-2024 байни дастаҳои мунтахаби наврасон (U-17)
Гурӯҳи «А»
Тоҷикистон
Афғонистон
Қирғизистон
Гурӯҳи «В»
Узбекистон
Эрон
Туркманистон
Даври 1-ум
17-уми август (шанбе)
Гурӯҳи “А”
Қирғизистон - Тоҷикистон – 0:3
Гурӯҳи “В”
Туркманистон – Узбекистон – 0:1
Даври 2-юм
19-уми август (душанбе)
Гурӯҳи “А”
Афғонистон - Қирғизистон – 2:0
Гурӯҳи “В”
Эрон – Туркманистон – 6:1
Даври 3-юм
21-уми август (чоршанбе)
Гурӯҳи “А”
Тоҷикистон – Афғонистон - 0:1
Гурӯҳи “В”
Узбекистон – Эрон – 1:0
Мавқеи дастаҳо дар ҷадвали мусобиқот дар гурӯҳҳо:
гурӯҳи “А” – 1. Афғонистон – 6 имтиёз (таносуби тӯбҳо – 3-0). 2. Тоҷикистон – 3 (3-1). 3. Қирғизистон – 0 (0-5);
гурӯҳи “В” – 1. Узбекистон – 6 имтиёз (таносуби тӯбҳо – 2-0). 2. Эрон – 3 (6-2). 3. Туркманистон – 0 (1-7).
23-юми август (ҷумъа)
Бозӣ барои ҷойи 5-ум
Қирғизистон – Туркманистон – 0:2
Бозӣ барои ҷойи 3-юм
Тоҷикистон – Эрон – 1:1, аз рӯи пеналти – 4:2
Финал
24-уми август (шанбе)
20:00 – Афғонистон – Узбекистон
Душанбе, Варзишгоҳи марказии ҷумҳуриявӣ
