Дар чанд ҷумла
Боздошти як тоҷик дар Амрико ба гумони риоя накардани таҳрими зидди Русия
Мақомоти Амрико се шаҳрванди Русияро, ки яке аз онҳо ҳамзамон табааи Тоҷикистон аст, ба гумони риоя накардани таҳримҳои зидди Маскав боздошт намудаанд.
Николай Голтсев, Кристина Пузирёва ва Салимҷон Насриддинов ба содироти маҳсулоти мамнӯи техникӣ ба Русия муттаҳаманд. Гуфта мешавад, ин маҳсулот дар ҷанги Русия алайҳи Украина истифода шудааст.
Хабар рӯзи 31-уми октябр нашр шуд. Радиои Озодӣ то ин дам вокуниши наздикони Салимҷон Насриддиновро дар мавриди қазия ба даст наовард.
Хабаргузории "Франс Пресс" Салимҷон Насриддинови 52-соларо "шарики эҳтимолии" Николай Голстев ва ҳамсараш Кристина Пузирёва номбар кардааст.
Иван Арвело, маъмури вижаи Департаменти Амнияти Миллии Амрико, дар баёяние гуфт, сегона ба фиристодани маҳсулоти зери таҳрим ба арзиши тақрибан 10 миллион доллар ба Русия гумонзад ҳастанд.
Вазорати адлияи Амрико дар изҳороте гуфт, баъзе аз намунаҳои маҳсулоти фиристодаи онҳо дар дрону тонкҳо ва чархболҳои мусодирашудаи Русия дар Украина дида шудааст.
"Ин ширкатҳо маҳсулоти электрониро аз истеҳсолкунандаҳои амрикоӣ харида, ғайриқонунӣ ва бо пеши по задани таҳрим ба Русия фиристодаанд," – гуфта шудааст дар изҳороти вазорат. Дар ҳоле, ки ба гуфтаи манбаъ, онҳо медонистанд, ки маҳсулоти техникӣ бо ҳадафи низомӣ истифода хоҳад шуд.
Ба гузориши расонаҳо, маҳсулот ба воситаи ширкатҳои SH Brothers ва SN Electronics харида шудааст. Ҳарду ширкатро дар Бруклин сабтином кардаанд.
Додситонии федеролии минтақаи шарқии Ню-Йорк мегӯяд, "беш аз 1,1 миллион доллар даромад"-и онҳоро дар бонкҳои дохилӣ кашф ва рӯзи сешанбе мусодира кард.
Салимҷон Насриддинов, ки 5-уми ноябр 53-сола хоҳад шуд, Донишгоҳи политехникии Тоҷикистонро хатм карда, сипас дар Русия кору зиндагӣ ва тиҷорат кардааст.
Вай чанд сол пеш ба Амрико кӯчид ва соли 2021 дар маъракаи тоҷикони Иёлоти Муттаҳида дар Ню-Йорк иштироку суханронӣ кард. Дар баъзе аз аксҳо дар саҳифааш дар Фейсбук дар канори раиси ҷумҳурӣ Эмомалӣ Раҳмон ва сафири Тоҷикистон дар Вашингтон тасвир ёфтааст.
Ҳамаи хабарҳои имрӯзро дар инҷо бихонед
Нишасти "хатарнок"-и ҳавопаймои Эрон дар Фурудгоҳи Душанбе
Тибқи иттилои дарёфтии Радиои Озодӣ, ҳавопаймои ширкати эронии “Вориш” рӯзи 10-уми апрел дар Фурудгоҳи Душанбе нишасти "хатарнок" анҷом додааст. Мақомоти Тоҷикистон ва ширкат дар ин бора расман шарҳе намедиҳанд.
Як манбаи боварбахши Радиои Озодӣ дар Оҷонси авиатсияи шаҳрвандии Тоҷикистон гуфт, ҳавопаймои ширкати “Вориш”, ки аз Теҳрон ба Душанбе меомад, соати 11:14 дар Фурудгоҳи Душанбе бо мушкил нишаст.
Ба гуфтаи ҳамсуҳбати мо, ҳамаи мусофирон ва халабонҳо солиманд. Сабаби ба мушкил фуруд омадани ҳавопаймо бад будани вазъи боду ҳаво гуфта мешавад.
“Соати 11 дар Душанбе раъду барқ ва борон буд. Ҳавопаймои Душанбе барои нишасту парвози ҳавопаймо ду хат дорад. Ҳавопаймои ширкати “Вориш” дар байни ин ду хати парвоз фуруд омад ва зоҳиран чархаш осеб дид. Аз соати 11 ҳамаи парвозҳои рафтуо баргашт аз Фурудгоҳи Душанбе ва ба ин фурудгоҳ манъ шуд. Мутахассисон қариб даҳ соат талош карданд, ҳавопаймои ширкати “Вориш”-ро таъмир карда, аз хати парвоз берун кунанд ва танҳо баъди ин барои дигар парвозҳо иҷозат шуд,” -- гуфт ҳамсуҳбати мо дар Оҷонси авиатсияи шаҳрвандӣ.
Талошҳои мо барои гирифтани шарҳи расмӣ аз намояндагони Фурудгоҳи Душанбе бенатиҷа буд. Таблои онлайни Фурудгоҳи Душанбе нишон медиҳад, ки ҳамаи парвозҳо аз соати 11 то 20 лағв шудаанд. Рӯшан нест, ки ҳавопаймои эронӣ дар пайи нишасти хатарнок ба чӣ мушкил рубарӯ шудааст.
Тоҷикистон ва Эрон дар аввали имсол низоми раводидро миёни ду кишвар бекор карданд. Ҳоло байни ду кишвар ҳафтае 5 парвоз (чор парвоз аз ширкати “Вориш” ва як парвоз аз “Сомон Эйр”) анҷом мешавад.
Беш аз 20 муҳоҷири тоҷикро аз "Внуково" ба Тоҷикистон рондаанд
Мақомоти Русия баъди се рӯзи нигаҳдорӣ беш аз 20 муҳоҷири тоҷикро аз фурудгоҳи "Внуково"-и Маскав ба Тоҷикистон ихроҷ кардаанд.
Муҳоҷирони тоҷик рӯзи 10-уми апрел бо ирсоли навор ба Радиои Озодӣ гуфтанд, ки се рӯз дар шароити бад қарор доштанд ва сабаби роҳ наёфтан ба Русияро низ касе барояшон шарҳ надод.
Дар ҳоле ки ба гуфтаи онҳо, тамоми санадҳояшон дуруст буд ва дар Русия ҳаққи иқомат доштанд.
Чанд рӯз пеш низ ба беш аз 500 муҳоҷири тоҷик дар марзи Қазоқистон бо Русия иҷозаи ворид шудан надода буданд. Ин муҳоҷирон мехостанд бо мошин ва аз роҳи заминӣ вориди Русия шаванд.
Ин гурӯҳи муҳоҷирон рӯзи 9-уми апрел хабар доданд, ки пас аз як ҳафта мақомоти рус ба онҳо иҷозаи вуруд ба Русияро додаанд.
Дар Русия ҳудуди як миллион муҳоҷири тоҷик кору зиндагӣ мекунанд ва ин кишварро барои сиёсати саркубгарона нисбат ба муҳоҷирон танқид мекунанд. Мақомоти Русия борҳо гуфтаанд, ки ҳадафашон рафъи қонуншиканиҳо ҳаст
Амрико ва Русия баъзе аз зиндониёнро иваз кардаанд
Амрико ва Русия рӯзи 10-уми апрел дар шаҳри Абузабӣ, маркази Имороти Муттаҳидаи Араб, баъзе аз зиндониёнро иваз кардаанд.
Дар ин бора нашрияи “The Wall Street Journal” бо такя ба раиси созмони истихбороти марказии Амрико ё CIA хабар дод.
Ҷониби Русия то ҳол табодули зиндониёнро тасдиқ ё инкор накардааст.
Ба гузориши "The Wall Street Journal", Русия Ксения Карелинаро озод кардааст, ки шаҳрвандии Русия ва Амрикоро дорад.
Ӯ барои гузарондани як миқдор пул ба нерӯҳои мусаллаҳи Украина бо иттиҳоми "хиёнат ба давлат" ба 12 сол зиндон маҳкум шуда буд.
Вакили мудофеи Карелина тасдиқ кард, ки ӯ раҳо шудааст ва дар роҳ ба Иёлоти Муттаҳида аст.
Раҳоии ӯро котиби давлатӣ ё вазири умури хориҷии Амрико Марко Рубио низ таъйид намуд. Ба гуфтаи ӯ, Карелина дар Русия ноодилона боздошту маҳкум шудааст ва президенти Амрико Доналд Трамп “озодии ӯро фароҳам овард”.
Амрико шаҳрванди Олмону Русия Артур Петровро ба Маскав додааст.
Вай соли 2023 бо дархости Иёлоти Муттаҳида ва бо иттиҳоми интиқоли микроэлектроника ба Русия бар хилофи таҳримҳо дар Қибрис (Кипр) боздошт шуда буд.
Нишасти ҳайатҳои Русия ва Амрико дар Истанбул оғоз ёфт
Нишасти машваратӣ миёни ҳайатҳои Русия ва Амрико рӯзи 10-уми апрел дар Истанбул оғоз ёфт.
Вазорати корҳои хориҷии ҳарду кишвар пештар хабар дода буданд, ки дар ин баҳс ба "эътидол овардани кори намояндагиҳои дипломатӣ" дар Маскав ва Вашингтон мавзӯи асосист.
Музокирот дар консулгарии генералии Русия дар Истанбул мегузарад.
Ҳайати Русияро сафири ин кишвар дар Вашингтон Александр Дарчиев ва ҳайати Амрикоро муовини ёвари котиби давлатӣ дар умури Аврупо ва АвруОсиё Соната Коултер раҳбарӣ доранд.
Ин даври дуюми машваратҳо дар Истанбул аст. Даври аввал дар охири моҳи феврали имсол дар консулгарии генералии Амрико баргузор шуда буд.
Сухангӯйи Вазорати корҳои хориҷии Амрико рӯзи 9-уми апрел гуфт, ки "Украина дар барномаи нишаст нест".
Вай афзуд, дипломатҳо фақат ба масъалаи "барқарор кардани кори муътадили сафоратҳо таваҷҷуҳ мекунанд"
Кори сафоратҳои Амрико ва Русия дар хоки ҳамдигар дар солҳои охир пас аз рондани дипломатҳо ва маҳдудиятҳои гуногун ба таври чашмрас маҳдуд шудааст.
Иқтисоди Тоҷикистон аз нигоҳи БОР барои ду соли оянда
Тибқи пешбинии Бонки Осиёии Рушд, иқтисоди Тоҷикистон имсол 7,4 ва соли оянда 6,8 дарсад рушд хоҳад кард. Ин дар ҳолест, ки мақомоти тоҷик гуфтаанд, суръати рушди иқтисод имсол ва солҳои оянда аз 8 дарсад кам нахоҳад буд.
Дар гузориши Бонки Осиёии Рушд, ки дар аввали моҳи апрел нашр шуд, омадааст, сармоягузории бузург ба бахши энержӣ, саноат ва рушди бахши хусусӣ аз омилҳои асосии афзоиши иқтисод дар ду соли оянда хоҳад буд.
Ко Сакамото, намояндаи доимии Бонки Осиёии Рушд дар Тоҷикистон гуфтааст, ин ниҳоди молӣ омода аст, ки дар бахшҳои алоҳида, аз ҷумла, камбуди сармоя ва беҳтар кардани хизматрасонии давлатӣ, ба Тоҷикистон кӯмак кунад.
Тибқи пешбинии Бонки Осиёии Рушд, имсол сатҳи таваррум то 5 дарсад ва соли оянда то 5,8 дарсад боло хоҳад рафт.
Боло рафтани талабот ба қарзҳои истеъмолӣ, зиёд шудани маоши кормандони давлатӣ, нафақа ва хизматрасониҳои коммуналӣ, аз омилҳои асосии таваррум дар кишвар гуфта мешавад.
Бонки Осиёии Рушд ба Тоҷикистон тавсия додааст, ки технологияи рақамиро рушд диҳад, то хизматрасониҳои давлатӣ ва сатҳи зиндагии мардум беҳтар шавад.
Як зани тоҷикро бо 6 фарзандаш аз Русия баргардонданд
Як зани тоҷик, ки бо шаш фарзанди ноболиғаш дар Русия танҳо монда буд, ба Тоҷикистон баргардонда шудааст.
Дар ин бора намояндагии Вазорати меҳнат ва муҳоҷирати Тоҷикистон дар Русия 9-уми апрел хабар додааст.
Ба қавли манбаъ, аз ташкилоти ҷамъиятии тоҷикон "Умед", давоми се моҳ ин модар ва кӯдаконашро нигоҳбин кардаанд.
Дар хабарномаи расмӣ омадааст, намояндагии Вазорати меҳнат ва муҳоҷирати Тоҷикистон дар Русия санадҳои зан ва фарзандонашро омода карда, бо дастгирии соҳибкорон билети бозгаштро барои онҳо хариданд.
Аммо мақомот дар бораи ин зан ва шаш фарзандаш маълумоти зиёд надоданд. Маълум нест, ки онҳо кай ба Русия рафта ва чаро бесарпараст мондаанд.
Тақрибан ҳар сол занон ва кӯдакони бесарпаноҳи тоҷикро аз Русия ба Тоҷикистон мефиристанд.
Чин ба молҳои Амрико 84% боҷ ҷорӣ кард. Шурӯи "ҷанги тиҷоратӣ"?
Чин барои молҳои воридотӣ аз Иёлоти Муттаҳида 84 дарсад боҷ ҷорӣ кард.
Ин иқдом рӯзи 10-уми апрел ба иҷро медарояд ва посух ба таърифа ё боҷҳоест, ки аз сӯйи Доналд Трамп, раисҷумҳури Амрико, ҷорӣ шуда, боис ба шиддат гирифтани ҷанги тиҷоратӣ миёни ду иқтисоди бузурги ҷаҳон гаштааст.
Таърифаҳои Амрико алайҳи Чин дар маҷмуъ ба 104 дарсад расид ва рӯзи 9-уми апрел ба иҷро даромад.
Вазорати тиҷорати Чин дар баёнияе гуфт, "агар Иёлоти Муттаҳида ба сахттар кардани маҳдудиятҳои иқтисодӣ ва тиҷоратӣ пофишорӣ кунад, Чин иродаи қавӣ ва василаҳои фаровоне дорад, ки чораҳои зарурӣ андешад ва то ба охир мубориза барад."
Нигарониҳо аз пайомади таърифаҳо боис ба "нооромӣ" дар бозори саҳом дар ҷаҳон шудааст, аммо ин ошуфтагӣ Трампро мутаассир накардааст. Вай баръакс гуфт, ки таърифаҳо "дору" ҳастанд ва аз ӯ мавқеи худ пас нахоҳад гашт.
Трамп рӯзи 8-уми апрел гуфт, кишварҳо "муштоқ"-и музокирот дар мавриди қарордодҳои тиҷоратии нав ҳастанд.
Скотт Бессент, вазири молияи Амрико, рӯзи 9-уми апрел чораи охири Чинро маҳкум кард. Ӯ дар мусоҳиба бо Fox Business Network гуфт, "мутаассифона, чиниҳо намехоҳанд биёянду музокира кунанд, зеро онҳо бадтарин хилофкорони низоми тиҷорати байнулмилалӣ ҳастанд."
Дар ҳамин ҳол, кишварҳои Иттиҳоди Аврупо дар Брюссел ҷамъ шуда, дар мавриди чораҳои мутақобил раъй доданд. Вашингтон ба молҳои Иттиҳоди Аврупо таърифаи 20-дарсадӣ ҷорӣ кардааст.
Радиои Аврупои Озод/Радиои Озодӣ тарҳи Иттиҳоди Аврупоро дид, ки аз 15-уми апрел ба иҷро медарояд ва тибқи он барои як зумра молҳои Амрико, аз ҷумла пӯлоду либосу хӯрок 25 дарсад боҷи изофӣ ҷорӣ шудааст.
"Бе даъватнома ва таҳқиромез." Шикоят аз "сарбозшикор" дар Кӯлоб
Маъмурони милиса дар Кӯлоб талош кардаанд, ки як ҷавонро аз дохили бозори марказии шаҳр бо зӯр ба артиш баранд, аммо соҳибкорон монеъ шудаанд.
Ҳодиса рӯзи 8-уми апрел рӯй дод.
Дар наворе, ки ба дасти Радиои Озодӣ расид, яке аз маъмурон бо либоси мулкӣ мегӯяд, "ман шахсан барои бурдани ту омадаам. Бе даъватнома. Даъватномаро мон."
Кормандони милиса талош кардаанд, Амирҷон Бухориевро аз дукони модараш, соҳибкор Раҷаббӣ Одинаева ба артиш баранд.
Наздиконаш рафтори намояндагони мақомотро таҳқиромез хонданд. Дар иваз кормандони милиса ба дари дукони онҳо муҳр задаанд.
Азиз Бухориев, бародари Амирҷон, рӯзи 9-уми апрел ба Радиои Озодӣ гуфт, "мо сад дарсад розием, ки бародарам ба хидмат равад. Чаро дар ҷойи ҷамъиятӣ чунин карданд ва дукони моро бастанд? Мо андоз (молиёт) месупорем, зиндагиямон пеш меравад. Як гурӯҳ ҷамъ шуда, таҳқиромез мехоҳанд сарбоз гиранд. Ман хидмат кардаам ва бародарам ҳам ба артиш меравад. Инҳо бе даъватнома бо таҳқир ин корро карданиянд."
Як манбаъ дар Шуъбаи корҳои дохилии Кӯлоб бе зикри номаш ба Радиои Озодӣ гуфт, аз ин ҳолат хабар надоранд, аммо дастур гирифтаанд, ки дар доираи қонун дар сафарбар кардани ҷавонон ба артиш саҳм гузоранд.
Дар Тоҷикистон мавсими баҳории даъвати ҷавонон (аз 18 то 27-сола) ба артиш ҷараён дорад.
Мақомоти вилояти Хатлон рӯзи 1-уми апрел эълон карданд, ки нақшаи даъватро иҷро карданд, аммо ҳанӯз аз ҷалби маҷбурӣ ё бо зӯр ба артиш бурдани ҷавонон аз ин минтақа ва гӯшаҳои дигар шикоят мерасад.
Ҳалокати 98 кас баъди фурӯ рафтани сақфи клуби шабона
Дар пайи фурӯ рафтани сақфи як клуби шабона дар Ҷумҳурии Доминикан 98 кас ҷон бохта, 160 нафар захмӣ шудаанд.
Ҳодиса рӯзи 8-уми апрел рух додааст.
Ба гузориши хабаргузориҳо, маъмурони наҷот ҳамчунон дар ҳоли берун овардани ҷасадҳои қурбониён аз зери харобаҳо ҳастанд.
Гузориш шудааст, ки сақфи бино дар вақти як консерт фурӯ рафт.
Теъдоде аз сиёсатмадорон, варзишгарон ва шахсони дигар дар консерт ҳузур доштанд.
Доминикан як ҷумҳурии ҷазираӣ аст, ки дар Амрикои Шимолӣ ҷойгир шудааст.
Артиши Русия ба чанд минтақаи Украина бо паҳпод ҳамла кардааст
Дар ҳамлаи нерӯҳои Русия ба вилояти Днепри Украина 15 кас захмӣ шудааст.
Дмитрий Лисак, волии вилоят, гуфт, бесарнишинҳои Русия шаби 8 ба 9-уми апрел ҳамла карданд ва бинои баландошёна зарар дид.
Артиши Русия ҳамчунин ба вилоятҳои Харков ва Краматорск зарба задааст. Дар Харков ду кас захмӣ шудааст.
Дар ҳамин ҳол Вазорати дифои Русия хабар додааст, ки шаби 9-уми апрел бесарнишинҳо ба зиёда аз 10 минтақаи ин кишвар ҳамла карданд.
Ба ҳисоби Вазорати дифои Русия, 158 паҳпод бар фарози минтақаҳои Краснодар, Ростов ва Осетияи Шимолӣ нобуд шудаанд. Тасдиқи дурустии ин маълумот душвор аст.
Дар фурудгоҳҳои Владикавказ, Волгоград ва Грозний маҳдудият ҷорӣ кардаанд.
Светлана Герасименко, ситорашиноси маъруфи Тоҷикистон даргузашт
Светлана Герасименко, cиторашиноси украинӣ, ки нисфи зиёди умрашро дар Тоҷикистон гузаронидааст, 8-уми апрел дар Русия даргузашт.
Дар ин бора Пажӯҳишгоҳи астрофизикаи Академияи илмҳои Тоҷикистон хабар дод.
Светлана Герасименко 80 сол дошт.
Ӯ зодаи вилояти Киеви Украина буд ва соли 1973 барои кор ба Академияи илмҳои Тоҷикистон даъват шуд.
Светлана Герасименко боқии умрро дар шаҳри Душанбе гузаронд ва солҳо ситораҳои дунболадор ё шаҳобҳоро таҳқиқ мекард. Светлана Герасименко ва фазошиноси украинӣ Клим Чурюмов кашшофи як ситораи думдор буданд, ки баъдан бо номи Чурюмов-Герасименко сабт шуд.
Навори суҳбати Светлана Герасименко аз бойгонии Радиои Озодӣ:
Барои ҳавопаймои президент дар фурудгоҳи Душанбе "ангар" сохтаанд
Барои ҳавопаймои президенти Тоҷикистон дар Фурудгоҳи Душанбе ангар (hangar) ё маҳалли нигаҳдорӣ сохтаанд.
Радиои Озодӣ рӯзи 9-уми апрел қарори ҳукуматро дид, ки дар он омадааст, сохтмони ангар барои ҳавопаймои "Боинг 787-800 Дримлайнер" ба анҷом расида, комиссияи давлатӣ бояд онро қабул кунад.
Як муовини сарвазир роҳбари комиссия шуда, намояндагони қариб ҳама ниҳодҳо ба он шомил ҳастанд. Аммо дар ин санад гуфта нашудааст, ки маҳалли нигаҳдории ҳавопаймои раисҷумҳур бо чӣ қадар маблағ ва давоми чанд сол сохта шуд.
Ҳукумати Тоҷикистон дар соли 2023 ҳавопаймои "Боинг 787-800 Дримлайнер"-ро бо 92 миллион доллар аз Мексика харид. Ин навъи ҳавопаймоҳо асосан барои раҳбарони давлатҳо аст ва сарватмандоне, ки ҳавопаймои хусусӣ мехаранд.
Президент Эмомалӣ Раҳмон ин ҳавопайморо дар сафар ба минтақаҳо ва хориҷи кишвар истифода мекунад.
Раисҷумҳур пештар бо ҳавопаймоҳои ширкати “Сомон Эйр” парвоз мекард.
Хариди ҳавопаймои алоҳида барои президент вокунишҳои зиёд дар дохилу хориҷ ба миён оварда буд.
Як сокини Варзоб аз кӯҳ афтода, захмӣ шудааст
Як сокини Варзоб, ки барои ҷамъоварии гиёҳ ба кӯҳ баромада буд, ба ҷарӣ афтида, захмӣ шудааст.
Кумитаи ҳолатҳои фавқуллода мегӯяд, ҳодиса 7-уми апрел дар мавзеи Санги Фалахмони ноҳияи Варзоб рух дод.
Ба қавли манбаъ, марди 32-сола баъди ба ҷарӣ афтидан бо телефон ба наҷотдиҳандагон тамос гирифтааст. Наҷотдиҳандагон ин мардро аз ҷарӣ бароварда, ба беморхона интиқол додаанд. Дар хабари расмӣ омадааст, мард дар ҷойи ҳодиса хуни зиёд талаф додааст. Вазъи саломатиаш ҳоло маълум нест.
Ҳамасола дар фасли баҳор сокинони минтақаҳои куҳсори Тоҷикистон барои ҷамъоварии гиёҳ, аз ҷумла, чукрӣ ба кӯҳ мебароянд ва ин кор баъзан бо фоҷиа тамом мешавад.
Аз ҷумла, чанд рӯз пеш як сокини ноҳияи Дарвоз аз кӯҳ афтод ва ҷон бохт. Ба иттилои КҲФ, марди 34-сола, сокини деҳаи Паткунови ҷамоати деҳоти Қалъаи Хумб, субҳи 2-юми апрел бо мақсади ҷамъоварии чукрӣ ба кӯҳҳои наздики деҳа рафта буд. Ҷасади ин мард баъд аз зуҳри ҳамон рӯз аз ҷониби сокинони маҳаллӣ ёфт шуда, ба наздиконаш супурда шуд.
Кумитаи ҳолатҳои фавқулода аз шаҳрвандон дархост кардааст, ки то 11-уми апрел аз рафтани ба кӯҳ, шикор, ҷамъоварии ҳезуму гиёҳон ва чорвочаронӣ худдорӣ кунанд.
"Бохтарӣ" як сол зиндонӣ шудааст
Идибеки Мардон, ки дар шабакаҳои иҷтимоӣ бо номи "Бохтарӣ" саҳифа дорад, ба як сол зиндон маҳкум шудааст.
Ҳукми Додгоҳи шаҳри Бохтар ҳафтаи гузашта содир шуда, то ҳол қувваи қонунӣ нагирифтааст. Ба ҳамин далел, намояндагони додгоҳ аз суҳбат дар ин бора худдорӣ карданд.
Аммо як манбаи огоҳ 9-уми апрел ба Радиои Озодӣ гуфт, додгоҳ Идибеки Мардонро дар "истифодаи зӯроварӣ нисбат ба намояндаи ҳокимият" гунаҳкор кард. Кодекси ҷиноии Тоҷикистон барои ин иттиҳом то 37 ҳазор сомонӣ ҷарима ва ё то 2 сол зиндонро пешбинӣ кардааст.
Маълум нест, ки "Бохтарӣ" то куҷо иттиҳомро қабул кардааст ва оё аз болои ҳукм шикоят мебарад ё не. Талошҳои Радиои Озодӣ барои сӯҳбат бо вакили дифоъ ва наздикони Идибеки Мардон бенатиҷа буд.
Идибеки Мардон моҳи феврали имсол баъди бозгашт ба Тоҷикистон дастгир шуда буд. Ӯ моҳи сентябри соли гузашта дар як навор Абдулмаҷид Муминзода, раиси шаҳри Бохтар ва наздиконашро дашном дода, таҳдид кард, ки наворҳои онҳоро пахш мекунад.
Баъд аз пахши он видео Идибеки Мардон аз Тоҷикистон рафт, вале бо дархости додситонӣ қарори ҳабси ӯ ғоибона аз сӯи додгоҳ содир шуда буд.
Идибеки Мардон дар шабакаҳои иҷтимоӣ борҳо аз мақомоти Тоҷикистон ситоиш карда, ба мухолифони ҳукумат дар Аврупо ҳамлаҳои лафзӣ мекард.
Садҳо муҳоҷири тоҷик дар марзи Қазоқистон бо Русия банд мондаанд
Зиёда аз 500 шаҳрванди Тоҷикистон як ҳафта боз дар гузаргоҳи Сагарчин дар сарҳади Қазоқистон бо Русия банд мондаанд.
Баъзе аз онҳо барои дароз кардани муҳлати будубош дар Русия вориди Қазоқистон шуда буданд, вале ҳоло марзбонони Русия иҷозаи даромадан намедиҳанд ва ҳам намегӯянд, ки иллаташ чист.
"Баъзе аз бачаҳо як ҳафта боз дар инҷо ҳастанд. 200 мошин ҳаст, нагузаштааст. Бинед, мо дар чӣ аҳволем. Узбекҳо гузаштанд, қирғизҳо гузаштанд, чун аз сафораташон одам ҳаст. Аз мо касе нест," -- гуфт як муҳоҷири тоҷик бо шарти фош нашудани номаш рӯзи 8-уми апрел.
Марзбонони рус ба муҳоҷирони тоҷик сабаби роҳ надоданашон ба хоки Русияро шарҳ намедиҳанд. Як намояндаи Қирғизистон ба муҳоҷирони ин кишвар дар ҳузури дигарон гуфтааст, ки дар сарҳад қочоқи нуриҳои менералӣ сабт шудааст ва ба ҳамин далел Русия назоратро сахт кардааст.
Дар сафорати Тоҷикистон дар Қазоқистон ба зангҳои Радиои Озодӣ посух надоданд.
Баъзе аз муҳоҷирони бандмонда аз Тоҷикистон бо мошинҳои шахсӣ ба Русия мераванд, вале бархеи дигар онҳое ҳастанд, ки ба хотири убури марз ва навсозии муҳлати будубош аз Русия ба Қазоқистон ворид шудаанд.
Аксар муҳоҷирони тоҷик барои тамдиди будубоши худ дар Русия бояд дар 90 рӯз як бор хоки ин кишварро тарк кунанд. Бештари онҳо ба Қазоқистони ҳаммарз бо Русия мераванд, то аз он ҷо дубора вориди Русия шаванд. На ҳамеша мақомоти рус ба бархеи онҳо иҷозаи бозгашт ба Русияро медиҳанд. Мақомоти Тоҷикистон ба чунин равишҳо дахолати ҷиддӣ намекунанд.
Видеоро дар инҷо бинед:
