Дар чанд ҷумла
Вохӯрии раисони Суғд ва Ботканд баъди танишҳои лафзӣ
Роҳбарони вилоятҳои Суғди Тоҷикистон ва Ботканди Қирғизистон дар марз вохӯрда гуфтаанд, бояд "аз арзёбии нодурусти масъалаҳои марбут ба марз"-и ду кишвар худдорӣ шавад.
Дафтари матбуоти ҳукумати вилояти Суғд навиштааст, дидори Раҷаббой Аҳмадзода ва Абдикарим Алимбаев 23-юми сентябр дар ноҳияи марзии Лайлаки Қирғизистон баргузор шуд. Намояндагони ниҳодҳои қудратии ду кишвар ва раисони шаҳру ноҳияҳои марзӣ ҳам дар ин вохӯрӣ будаанд.
Ҷониби Қирғизистон то ҳол дар бораи баргузории ин дидор расман хабар надодааст. Дар хабари ҳукумати вилояти Суғд омадааст, "рӯзҳои ахир нашри матолиби марбут ба марзи Тоҷикистону Қирғизистон дар расонаҳо баҳсҳоро дар шабакаҳои иҷтимоӣ барангехта, андешаҳои норавшан баён шудааст."
Дар хабар мушаххасан гуфта нашудааст, ки ду тараф аз кадом баҳсҳо дар бораи марз нигаронанд. Аммо баъди ҳарфҳои раиси Кумитаи амнияти Қирғизистон, ки гуфт ҳуҷҷатҳои нав ёфтаанд ва агар Тоҷикистон аз даъвояш даст накашад онҳоро истифода мебарад, ду кишвар вориди як баҳси лафзӣ шуданд. Вазорати корҳои хориҷии Тҷоҷикистон сафири Бишкекро даъват ва аз ҳарфҳои Қамчибек Тошиев нигаронӣ кард.
Душанбе ва Бишкек беш аз 20 сол аст, ки барои муайян кардани хатти марз гуфтугӯ доранд. Дар ин муддат аз 972 километр марз танҳо 664 километри онро мувофиқа кардаанд. Дар марзи ду кишвар борҳо муноқишаву даргирӣ сар задааст. Дар яке аз ин муноқишаҳои хунин, ки моҳи сентябри соли гузашта рух дод, аз ду тараф беш аз сад нафар куштаву даҳҳо нафар захмӣ шуданд.
Ҳамаи хабарҳои имрӯзро дар инҷо бихонед
Ғазза. Раҳоии 8 гаравгони дигар бар ивази озодии 110 фаластинӣ
Намояндагони гурӯҳи фаластинии “Ҳамос” рӯзи 30-юми январ ҳашт гаравгон, аз ҷумла як сарбози бистсолаи артиши Исроил ва панҷ шаҳрванди Тайландро озод кардаанд.
Ҳамаи онҳо рӯзи 7-уми октябри соли 2023 дар ҳамлаи “Ҳамос” ба Исроил дастгир шуда буданд. Амрико ва Иттиҳоди Аврупо ин гурӯҳи фаластиниро созмони террористӣ медонанд.
Артиши Исроил рӯзи панҷшанбе озодии гаравгонҳоро тасдиқ кард. Телавив дар иваз 110 фаластиниро аз зиндонҳо раҳо хоҳад кард.
Аз замони созиши оташбас миёни Исроил ва гурӯҳи “Ҳамос” дар Навори Ғазза (17-уми январ) ин мавриди севуми табодули гаравгонҳо ва зиндониён аст.
"Ҳамос" рӯзи 7-уми октябри соли 2023 дар ҳамлае ба Исроил беш аз 1200 касро кушт ва зиёда аз 200 нафарро ба гарав гирифт.
Дар ҳамлаҳои Исроил ҳудуди 47 ҳазор фаластинӣ кушта ва даҳҳо ҳазори дигар захмӣ шуданд.
Ҷанги ду тараф понздаҳ моҳ давом кард.
Марде, ки нусхаи Қуръонро дар Шветсия сӯзонда буд, кушта шудааст
Салвон Момика, паноҳандаи 38-солаи ироқӣ дар Шветсия, ки нусхае аз Қуръонро дар шаҳри Стокҳолм оташ зада буд, рӯзи 29-уми январ бо зарби тир кушта шудааст.
Ҳодиса чанд соат пеш аз эълони ҳукми Додгоҳ дар мавриди сӯзондани Қуръон, китоби муқаддаси мусалмонон, рух дод.
Пулиси Шветсия рӯзи 30-юми январ панҷ касро дар робита ба қазия дастгир кард.
Момика рӯзи 28-уми июни соли 2023, замоне ки мусалмонон аз Иди Қурбон таҷлил мекарданд, як нусха аз Қуръонро дар назди масҷид дар Стокҳолм сӯзонд.
Навори ин лаҳза дар шабакаҳои иҷтимоӣ нашр ва сабаби вокунишҳои зиёд шуд.
Арабистони Саудӣ, Ироқ, Эрон, Марокаш ва кишварҳои дигари мусалмонӣ ба зидди ин ҳодиса изҳорот доданд.
Садҳо тан дар моҳи июли соли 2023 ба сафорати Шветсия дар Бағдод ҳуҷум карда, бахше аз онро оташ заданд.
Ҳодисаи Вашингтон. Баъзе аз ҷасадҳоро аз об берун оварданд
Як ҳавопаймои ширкати “American Airlines” ба чархболи Блек Ҳоуки артиши Амрико дар наздикии фурудгоҳи ба номи Роналд Рейган дар Вашингтон бархӯрда, ба рӯдхонаи Потомак афтодааст. Ҳодиса шаби 29-уми январ рӯй дод.
Дар дохили ҳавопаймо 64 кас буд. Гузорише дар бораи зинда мондани касе аз мусофирон дар даст нест. То кунун ҷасади 28 қурбониро аз об берун кашидаанд.
Пулис гуфт, маъмурони чанд ниҳод дар амалиёти ҷустуҷӯву наҷот дар рӯдхона ширкат доранд.
Ҳавопаймо бо 60 мусофир аз Вишитаи аёлати Канзас ба Вашингтон парвоз мекард ва дар чархбол се сарбози амрикоӣ будаанд.
Сабабҳои суқути ҳавопаймо маълум нест. Бино ба гузоришҳо, дар ҳавопаймо 14 варзишгари рақси рӯйи ях будаанд ва аз ҷумла ду мураббияшон аз Русия, ки соли 1994 қаҳрамони ҷаҳон шудаанд.
Евгения Шишкова ва Вадим Наумов солҳои охир дар Амрико кор мекарданд ва писари онҳо узви тими миллии Иёлоти Муттаҳида будааст.
Доналд Трамп, раиси ҷумҳури Амрико гуфт, “ба назар мерасад, ки мумкин буд, аз ин фалокат пешгирӣ шавад.
Пит Ҳегсет, вазири дифои тозатаъйини Амрико гуфтааст, вазорат бе ягон таъхир ба таҳқиқи сабабҳои фалокат бо чархболи низомӣ оғоз мекунад.
Видеоро дар инҷо бинед:
Ҳамлаи Русия сабаби марги 6 кас дар Сумии Украина шуд
Бар асари ҳамлаҳои Русия дар вилояти Сумии Украина шаш кас кушта шудааст.
Мақомот гуфтанд, ҳамла шаби 30-юми январ сурат гирифта, як ҳавопаймои бесарнишин ба бинои баландошёна бархӯрд.
Нуҳ тани дигар, аз ҷумла як кӯдаки ҳафтсола, маҷруҳ гаштаанд.
Президенти Украина ҳамлаи Русияро ба Суми “фоҷиаи ваҳшатбор” ва ҷиноят номид.
Владимир Зеленский аз муттаҳидони Украина даъват кард, ки фишорро ба Русия кам накунанд.
Русия ҳамла ба сокинони одиро борҳо рад кардааст, вале мақомоти Украина бо далел нишон додаанд, ки артиши ин кишвар ғайринизомиёнро низ ҳадаф мегирад.
Ҳукумати нави Сурия аз Маскав хостааст, Башор Асадро бидиҳад
Намояндагони ҳукумати нави Сурия бори аввал бо мақомдорони Русия вохӯрда, масъалаи “ҷуброн” ва “ислоҳи хатоҳои гузашта”-ро бардоштаанд.
Дар ин бора расонаҳои Сурия, ҳамчунин, бунгоҳи хабарии Bloomberg гузориш доданд.
Хабаргузории “Рейтерс” бо такя ба манобеаш дар ҳукумати Сурия навишт, Аҳмад Шаръ, роҳбари нави Сурия, аз Маскав талаб кардааст, ки Башор Асадро ба Димишқ таслим кунанд.
Асад дар моҳи декабри соли 2024 баъди суқути ҳукуматаш ба Русия фирор кард ва Маскав ба ӯ ва оилааш паноҳандагӣ дод.
Дар иттилоияи мақомоти Сурия омадааст, дар ҷараёни гуфтугӯ бо намояндагони Русия “пардохти ҷуброн ва барқарор кардани харобаҳо ва бо ин роҳ бозгардонии боварии мардуми сурӣ ба Маскав таъкид шуд.”
Ҳайати Русияро дар гуфтугӯ бо ҳукумати нави Сурия Михаил Богданов, муовини вазири корҳои хориҷии Русия, роҳбарӣ кард. Александр Лаврентев, фиристодаи вижаи президенти Русия дар масъалаи Сурия ҳам ба Димишқ рафта буд.
Расонаҳо акси дастфишории Богдановро бо Аҳмад Шаръ, роҳбари феълии Сурия нашр карданд. Русия яке аз муттаҳидони асосии Башор Асад буд ва дар замони ҷанги дохилии Сурия аз ӯ ҳимоят мекард.
Муҳаммад Наимов бо варзишгаре аз Австралия рақобат мекунад
Муҳаммад Наимов, варзишгари маъруфи тоҷик, рӯзи 1-уми феврал дар мусобиқаи навбатии ташкилоти UFC дар Арабистони Саудӣ баромад мекунад.
Наимов давоми 15 дақиқа бо варзишгар Каан Офли аз Австралия рақобат хоҳад кард.
Ин рақобати панҷуми Муҳаммад Наимов дар ташкилоти UFC аст.
Ӯ то ин дам дар ин ташкилоти маъруф дар муҳорибаҳои омехта чор муҳориба гузаронда, дар сетои он пирӯз шуда, дар якеаш шикаст хӯрдааст.
Муҳаммад Наимови 31-сола яке аз чор варзишгар аз Тоҷикистон аст, ки дар ташкилоти амрикоии UFC баромад мекунад.
Наимов дар суҳбатҳояш қабл аз рақобат гуфт, ба муҳорибаи навбатиаш зидди Каан Офли омодагии хуб дидааст. Ин варзишгари тоҷик дар корномаи варзишиаш дар муҳорибаҳои омехта 11 ғалаба ва 3 бохт дорад.
Эрон виза бо Тоҷикистонро бекор кард
Расонаҳои Эрон гузориш доданд, ки ин кишвар раводид бо Тоҷикистонро аз рӯзи 3-юми феврали имсол бекор мекунад.
Ба гузориши хабаргузории давлат ИРНА, қарори Шӯрои вазирони Эрон дар бораи бекор кардани раводид бо Тоҷикистон ба муддати то 30 рӯз тасвиб шудааст. Ба қавли манбаъ, сафари бидуни раводид танҳо аз тариқи роҳҳои ҳавоӣ имконпазир аст.
Пештар шаҳрвандони Тоҷикистону Эрон метавонистанд танҳо аз тариқи хатсайри Душанбе-Теҳрон бидуни раводид ё виза сафар кунанд. Барои сафар ба дигар шаҳрҳои Эрон, раводид талаб мешуд.
Мақомоти Тоҷикистон ҳанӯз дар бораи бекор шудани низоми раводид бо Эрон расман хабар надодаанд. Ҳарчанд раиси ҷумҳур Эмомалӣ Раҳмон рӯзи 16-уми январ ва дар ҷараёни сафари ҳамтои эрониаш Масъуд Пизишкиён ба Душанбе гуфта буд, тарафдори аз байн бурдани раводид бо Эрон аст.
Ёддошти тафоҳум миёни Тоҷикистон ва Эрон дар бораи бекор кардани низоми раводид бори авввал дар моҳи ноябри соли 2023 имзо шуда буд. Миёни Тоҷикистон ва Эрон феълан ҳафтае се парвоз ҳаст.
Вазир: Сохтмони роҳи Дарвоз-Ванҷ то Рӯшон имсол ба анҷом мерасад
Вазири нақлиёти Тоҷикистон мегӯяд, сохтмони қисмати роҳи Дарвоз-Ванҷ то даромадгоҳи ноҳияи Рӯшонро як сол пеш ба анҷом мерасонанд.
Вазир Азим Иброҳим рӯзи 29-уми январ дар нишасти хабарӣ гуфт, тибқи лоиҳа, ин қисмати роҳ бояд соли 2026 супурда мешуд, аммо талош доранд сохтмон моҳи июни имсол тамом шавад.
Вазири нақлиёт афзуд, корҳои саҳроӣ барои навсозии 296 км дигари роҳ аз Рӯшон ба баъд тамом шуда, дар ҷустуҷӯи сармоягузор ҳастанд.
Бунёду навсозии қитъаи «Дарвоз –Ванҷ – даромадгоҳи ноҳияи Рӯшон» (93 км) сентябри соли 2022 оғоз гардид. Чин барои ин тарҳ ба Тоҷикистон 203.9 млн. доллар маблағи бебозгашт дод.
Роҳи мошингарди Душанбе-Хоруғ-Қулма барои Тоҷикистон шоҳроҳи муҳими байнулмилалӣ ба шумор меравад, вале бо вуҷуди ин қисматҳои зиёди он ноҳамвору хатарнок аст.
Солона дар ин ҷода даҳҳо ҳодисаҳои нохуш рух медиҳад ва як сабаби фалокатҳои маргбор низ харобии роҳ аст.
Як блогерро барои таҳқири Нилуфар Сотиболдиева ҷазо додаанд
Як блогерро дар Узбекистон барои таҳқири барандаи телевизион, Нилуфар Сотиболдиева, ҷазо додаанд.
Расонаҳо номи блогерро зикр накарда, вале гуфтаанд, ки ӯ 38-сола ва зодаи вилояти Навоии Узбекистон аст.
Ӯ журналистро танқид кардааст, ки духтарашро нодуруст тарбия мекунад. Додгоҳ блогерро гунаҳкор донист.
Нилуфар Сотиболдиева моҳи марти соли 2024 навори рақс бо духтарашро аз соҳили баҳр дар Тайланд дар Инстагарам нашр кард.
Корбарон дар зери навори ӯ шарҳҳои зиёде навиштанд. Яке аз онҳо блогери 38-сола аз вилояти Навоии Узбекистон буд.
Блогерро дар моҳи августи соли гузашта бо гумони қаллобӣ боздошт карданд. Дар мурофиае, ки бо даъвои Нилуфар Сотиболдиева баргузор шуд, ӯ аз муассисаи ислоҳӣ онлайнӣ ширкат кард.
Блогер дар мурофиа гуфт, ки ҳамеша орзуи доштани духтарро дошт ва вақте рақси журналист бо духтарашро дид, фикр кард, ин зан фарзандашро бо роҳи нодуруст мебарад ва эҳсосӣ шуд.
Ӯ гуфт, пушаймон шудааст ва аз журналист маъзарат хост. Нилуфар Сотиболдиев ӯро набахшид ва гуфт, ин бояд ба дигарон дарс шавад, ки аз навиштани шарҳҳои таҳқиромез худдорӣ кунанд.
Нилуфар Сотиболдиева гуфт: "Ман гунаҳкорам, ки ту орзуи доштани духтарро дорӣ? Чаро ба ман навиштӣ? Ман ба ту муроҷиат кардам, кумаку маслиҳат пурсидам? Гуфтӣ, духтар азоб дорад? Ман оилаи худро дорам, ту оилаи худро. Чӣ ҳақ дорӣ, ки ба ман дарс медиҳӣ, ки чӣ кор кунам? Ин беэҳтиромӣ аст, медонед?"
Сотиболдиева гуфтааст, то охир талош кард, ки блогер ҷазо гирад ва ин ба онҳое, ки шарҳҳои таҳқиромез менависанд, дарс шавад.
Додгоҳ блогерро гунаҳкор эълон кард ва ба як сол кори ислоҳӣ бо ситонидани даҳ дарсади маошаш ба фоидаи давлат маҳкум кард.
Раисони чанд ноҳияро дар Тоҷикистон нав карданд
Раисони панҷ ноҳияро дар вилояти Хатлон ва шаҳри Душанбе нав карданд.
Бо фармони раисҷумҳур Эмомалӣ Раҳмон аз 29-уми январ, Бахтиёр Шарифӣ дигар раиси ноҳияи Ёвони вилояти Хатлон нест. Ӯро муовини аввали шаҳрдори Душанбе гузоштанд. Бахтиёр Шарифӣ дар гузашта дар мансаби муовини аввали вазири саноат кор кардааст.
Икромиддин Вализода, ки то ин дам раиси ноҳияи Кӯшониён буд, раёсати ҳукуматро дар ноҳияи Ёвон бар дӯш гирифт. Ҷойи холимондаи ӯро ба Маҳмадшариф Холзода доданд.
Тибқи фармонҳои нав, Умед Гуреззода раиси ноҳияи Сино ва Дилшод Сафарзода раиси ноҳияи Фирдавсии шаҳри Душанбе таъйин гардиданд.
Маҳмуд Амирзода раиси нави ноҳияи Абдураҳмони Ҷомии вилояти Хатлон шудааст.
Аз оғози моҳи январ дар баъзе аз идораҳои давлатӣ ва ҳукуматҳои маҳаллӣ дар Тоҷикистон тағйироти кадрӣ ҷараён дорад.
Ҳукумати Тоҷикистон ҳамвора аз таъйини "кадрҳои ҷавону болаёқат" ситоиш мекунад. Баъзе аз намояндагони мухолифон мегӯянд, ин таъйинот на аз нигоҳи шоистасолорӣ, балки бештар бар асоси хидмату садоқат ба режим сурат мегирад.
"Таъйиноти кадрие, ки солҳои дароз дар ҳукумати Тоҷикистон мушоҳида мекунем, бештар монанди намоишҳои театрӣ ҳастанд, на ислоҳоти воқеӣ," -- гуфта буд Бахтиёр Сафаров, сардори ширкати "Central Asia Consulting” дар Вашингтон, дар суҳбати пешинааш бо Радиои Озодӣ.
Раиси "Тоҷик Эйр" аз поёни баҳси даҳсола бо ширкати литвонӣ хабар дод
Раиси ширкати “Тоҷик Эйр” мегӯяд, баҳси даҳсола бо ширкати литвонии “Скайроуд лизинг” тамом шуд.
Парвиз Шодмонзода рӯзи 29-уми январ дар нишасти хабарӣ гуфт, бар асоси қарори додгоҳ, қарзи онҳо дар назди “Скайроуд лизинг” ба 36,6 миллион доллар расида буд, ва бар асоси созиш ҳамагӣ 2 миллион доллар пардохт мекунаду бас.
Назари ширкати литвонӣ дар ин бора ҳанӯз дастрас нест.
Мудири “Тоҷик Эйр" мегӯяд, аллакай 500 ҳазор долларро ба ҳисоби "Скайроуд лизинг" гузарондаанд ва қарор аст 1,5 миллион доллари дигарро пардохт кунанд.
Баъди пардохти ин маблағ, ба гуфтаи Парвиз Шодмонзода, ду ҳавопаймои ширкати “Скайроуд лизинг”, ки дар фурудгоҳи Душанбе ҳастанд, моли “Тоҷик Эйр” хоҳанд шуд. Ҳарчанд мудири “Тоҷик Эйр” мегӯяд, ҳарду ин ҳавопаймо аз кор мондаанд ва бояд таъмир шаванд.
Баҳси "Тоҷик Эйр" ва ширкати “Скайроуд Лизинг” аз соли 2013 идома дорад. "Скайроуд Лизинг" даъво дорад, ки коршарики тоҷикаш бояд 20 миллион доллар бипардозад. Масъулони ширкати "Тоҷик Эйр" ин даъворо қабул надоштанд.
Пештар Додгоҳи арбитражии шаҳри Вилнюс "Тоҷик Эйр"-ро ба пардохти ин миқдор маблағ вазифадор карда буд. Додгоҳи иқтисодии Душанбе аввал даъворо рад кард, аммо дертар Додгоҳи олии иқтисодӣ қарори Додгоҳи ҳаками Вилнюсро пазируфт.
Дар пайи баҳс бо "Скайроуд лизинг", як ҳавопаймои "Тоҷик Эйр"-ро дар фурудгоҳи Внуковои Маскав ҳабс карданд. Мудири "Тоҷик Эйр" рӯзи 29-уми январ гуфт, баъди созиш бо "Скайроуд лизинг" ҳавопаймои худро аз фурудгоҳи Внуково оварда, барои таъмир ба Узбекистон мефиристанд.
Парвиз Шодмонзода афзуд, ба ҷуз ширкати литвонӣ, "Тоҷик Эйр" аз дигар ширкатҳо низ қарздор аст, аммо "он қадар бисёр нест." Шодмонзода афзуд, баҳс бо ширкати литвонӣ яке аз мушкилиҳои асосии "Тоҷик Эйр" буд.
Ҳавопаймоҳои "Тоҷик Эйр" аз соли 2019 парвоз намекунанд. Ин ширкат аз тирамоҳи соли 2024 парвозҳои маҳаллиро аз Душанбе ба Хоруғ, Панҷакент ва Кӯлоб оғоз кард.
Мудири "Тоҷик Эйр" афзуд талош доранд, парвозҳои байнулмилалиро низ аз сар гиранд, аммо замони дақиқро ба забон наовард.
"Cухан дар бораи оғози бунёди метро дар Душанбе ҳанӯз барвақт аст"
Азими Иброҳим, вазири нақлиёти Тоҷикистон, гузориши баъзе аз расонаҳоро дар мавриди оғози бунёди метро дар шаҳри Душанбе нодуруст хонд.
Ӯ рӯзи 29-уми январ дар нишасти матбуотӣ гуфт, намедонад “ҳадафи ин хабарҳо чист”, вале “моҳияти масъаларо дарк накарда ҳар чизе менависанд”.
"Дар бисёре аз расонаҳо менависанд, ки сохтмон шуруъ мешавад. Сохтмони чунин иншоот осон нест. Инро бояд ҳаматарафа омӯхт, баъд кор сар мешавад. Ин оғози кор аст,” -- афзуд ӯ.
Азими Иброҳим гуфт, дар ҳақиқат, давлат ҳадафи бунёди метроро дар Душанбе дорад, вале ҳанӯз кор дар сатҳи марҳилаи омӯзишӣ ҳаст: "Моҳи март-апрели имсол корҳои имконсанҷии фанниву иқтисодӣ тамом мешавад. Ин маълум мекунад, ки имконияти сохтан ҳаст ё не. Баъди ин асосноккунии фанниву иқтисодӣ оғоз мешавад, худи сохтмон не."
Агар натиҷаи имконсанҷиҳо мусбат шавад, ба гуфтаи вазири нақлиёт, нақшаи бунёди се роҳи метро дар назар аст:
- аз Сирки давлатӣ то поёни бозори "Корвон", яъне то дарвозаи вилояти Хатлон;
- аз Сирки давлатӣ то Чорбоғ;
- аз Сирки давлатӣ то дарвозаи шарқии Душанбе (маҳаллаи ДОК).
Тоҷикистон зарурати сохтмони метроро ба афзоиши аҳолии Душанбе ва меҳмонони он марбут дониста, онро яке аз чораҳои пешгиранда аз роҳбандон ё танбашавӣ дар кӯчаҳои пойтахт медонад.
Бо ин ҳадаф соли 2022 бо ширкати "Роҳи оҳани миллии Корея" Ёддошти тафоҳум дар мавриди омӯзиши имконияти сохтмони роҳи оҳани шаҳрӣ ва метрои сабук дар Душанбе имзо кардааст.
Як ҳавопаймо дар Куриёи Ҷанубӣ оташ гирифтааст
Як ҳавопаймои "Airbus A321" ҳангоми омодагӣ ба парвоз дар фурудгоҳи Куриёи Ҷанубӣ оташ гирифтааст.
Ҳодиса шаби 28-уми январ рух дод.
Ҳавопаймо бояд ба тарафи Ҳонконг мерафт.
Хабаргузории Фаронса навишт, 169 мусофир ва ҳафт сарнишинро аз ҳавопаймо берун оварданд. Як кас ба бемористон бурда шудааст.
Гузоришҳо баёнгари онанд, ки сӯхтор дар дохили ҳавопаймо сар задааст.
Як моҳ пеш ҳавопаймои "Airbus"-и ширкати Jeju Airlines ҳангоми фуруд омадани изтирорӣ аз хати нишаст берун шуд.
Аз 181 мусофир ва сарнишин ҳамагӣ ду нафар наҷот ёфтанд.
“Бас кунед.” Талаби Созмони Милал аз мақомоти Тоҷикистон
Комиссариати олии Созмони Милал дар умури гурезаҳо аз ихроҷи паноҳҷӯёни афғонистонӣ аз Тоҷикистон нигаронӣ карда, аз Душанбе хостааст, ин корро бас кунад.
Намояндагони Комиссариат ба хабаргузории “Франс Пресс” гуфтаанд, танҳо дар моҳи декабри соли 2024 80 афғонистонӣ аз Тоҷикистон ба ватанашон фиристода шуданд.
Ба иттилои Созмони Милал, аксар ихроҷшудаҳо санади гурезагӣ доштанд.
Намояндагони Комиссариати олии Созмони Милал гуфтаанд, маҷбуран ба кишвараш бозпас фиристодани шахсе, ки зери хатари шиканҷа қарор дорад, “мухолифи қонун дар бораи гурезаҳои Тоҷикистон аст.”
Дар як моҳи охир бори дуюм аст, ки Комиссариати олии Созмони Милал дар умури гурезаҳо аз ихроҷи паноҳҷӯёни афғонистонӣ аз Тоҷикистон нигаронӣ мекунад.
Ин ниҳоди зертобеи СММ аввали моҳи декабри соли гузашта низ аз Тоҷикистон хоста буд, ба уҳдадориҳои байнулмилалии худ барои муҳофизат аз касоне, ки аз озор ва азият фирор кардаанд, пойбанд бимонад.
Мақомоти Тоҷикистон ба талабҳои Созмони Милал ва ҳамин тавр ихроҷи гурезаҳои афғонистонӣ расман вокуниш намекунанд. Ихроҷҳои бе шарҳи паноҳҷӯён ба Афғонистон нигаронии ҷиддии онҳоро ба миён овардааст.
Баъзе аз муҳоҷирони афғонистонӣ мегӯянд, аз тарси ихроҷ аз хона намебароянд. Тибқи иттилои охири Созмони Милал, дар Тоҷикистон ҳудуди 9 ҳазор паноҳҷӯйи афғонистонӣ ба сар мебаранд.
Ширкатҳои мухобиротӣ 4 млрд сомонӣ даромад гирифтаанд
Хадамоти алоқаи Тоҷикистон мегӯяд, соли 2024 барои хубтар кардани суръати алоқа ва интернет дар кишвар 798 истгоҳҳои нави базавӣ насб карда шудааст.
Хадамот нагуфтааст, ки истгоҳҳои нав ба кадом ширкатҳои мухобиротӣ тааллуқ доранд.
Дар гузориши Хадамоти алоқа омадааст, барои дастрасӣ ба интернети баландсуръат инчунин зиёда аз 300 километр хатти нахи нурӣ кашидаанд.
Шикоятҳо аз паст будани сифати алоқа ва интернет қариб ҳар рӯз дар шабакаҳои иҷтимоӣ садо медиҳад ва мақомоту ширкатҳо на ҳамаи ин танқидҳоро қабул доранд.
Ба гузориши Хадамоти алоқа, соли 2024 ширкатҳои мухобиротӣ дар кишвар 4,3 миллиард сомонӣ ё тақрибан 400 миллион доллар даромад гирифтаанд. Ин назар ба як соли пеш қариб як миллиард сомонӣ ё 11,3 дарсад бештар будааст.
Бахши алоқаи Тоҷикистон борҳо мавриди интиқоди раиси ҷумҳур ва сокинони оддӣ қарор гирифтааст.
"Толибон" як баста асбоби мусиқӣ ва садҳо кило мӯйи занонро сӯзондаанд
Вазорати амр ба маъруф ва наҳй аз мункари "Толибон" дар Афғонистон як баста асбоби мусиқӣ ва садҳо кило мӯйи занонро оташ задааст.
Ин ниҳод рӯзи 28-уми январ дар баёнияе гуфт, ки асбобҳои мусиқӣ ва мӯйи занонро аз як минтақаи Кобул ҷамъ овард.
Баъд аз расидан ба қудрат дар соли 2021, "Толибон" мусиқиро манъ карданд, чун ба қавли онҳо ғайриисломист.
Намояндагони ин гурӯҳи тундрав дари толорҳои ороиширо барои занон низ бастанд.
Пештар шикастану сӯзондани асбобҳои мусиқӣ дар Афғонистон сабт шуда буд. Бори аввал аст, ки намояндагони "Толибон" дар бораи сӯзондани мӯйи занон хабар медиҳанд.
"Ба онҳо дар ҷойи дигар хона месозем." Изҳороти нави Ҷабборов дар бораи марз
Мақомоти Қирғизистон ва Тоҷикистон ҳангоми нишонагузории сарҳад эҳтимол баъзе аз шаҳрвандони худро мекӯчонанд. Дар ин бора президенти Қирғизистон Содир Ҷабборов (Жапаров) дар мусоҳиба бо хабаргузории давлатии "Кабар" иттилоъ дод.
Ҷабборов дар шарҳи созиши ҳосилшуда бо Тоҷикистон гуфтааст, "мо деҳаҳои наздимарзие дорем, ки мисли тахтаи шоҳмот ҷойгир шудаанд ва хонаҳои мардум дар дохили ҳамдигар қарор доранд."
"Агар дар тарафи мо хонаҳое бошанд, ки ба шаҳрвандони Тоҷикистон тааллуқ доранд, пас, ҷониби Тоҷикистон сокинонро мекӯчонад. Агар хонаи шаҳрвандони мо дар тарафи онҳо бошад, мо онҳоро кӯч медиҳем. Ба онҳо дар ҷойи дигар хона месозем," -- афзуд Содир Ҷабборов (Жапаров).
Ба гуфтаи раисҷумҳури Қирғизистон, агар кӯчондани сокинони минтақаҳои марзӣ анҷом нашавад, муҳофизати сарҳад мушкил хоҳад шуд.
"Мо тақрибан ҳазор километр хати марз дорем. Дар бисёре аз минтақаҳо қитъаҳои баҳсбарангез буданд. Дар баъзе ҳолат ин қитъаҳо баробар тақсим шуданд," -- гуфт раисҷумҳури Қирғизистон.
Шарҳи ҷониби Тоҷикистон дар ин замина дастрас нест.
Тоҷикистон ва Қирғизистон тақрибан ҳазор километр марз доранд. Номуайянӣ дар сарҳад дар солҳои 2021 ва 2022 сабаби муноқишаи хунин шуд ва аз ҳарду ҷониб даҳҳо куштаву захмӣ бар ҷой гузошт.
Мақомоти Тоҷикистону Қирғизистон дар моҳи декабри соли 2024 хабар доданд, ки марзнигориро ба поён расонданд. Қадами баъдӣ имзои ҳуҷҷатҳои байнидавлатӣ дар бораи хати марзи муштарак мебошад. Содир Ҷабборов дар мусоҳибааш гуфтааст, феълан раванди ҳуҷҷатнигорӣ идома дорад.
Ҳамаи давраҳои гуфтушуниди топографҳо ва ҳайатҳои давлатӣ паси дарҳои баста ҷараён гирифта, ҳеч гуна тафсилоте дар бораи минтақаҳои баҳснок расонаӣ нашудааст. Тарафҳо дар бораи он ки хати нави марз кадом қаламравҳоро ба кадом кишвар вогузор мекунад, низ ҷузъиёте надоданд.
Таъсири қатъи ёриҳои Амрико ба ҷомеаи шаҳрвандӣ дар Тоҷикистон
Қатъи муваққатии ёриҳои хориҷии Амрико ба кори чанд созмону ҷомеаи шаҳрвандӣ дар Тоҷикистон низ таъсир расондааст.
Намояндагони ҷомеаи шаҳрвандии Тоҷикистон бо шарти зикр нашудани номашон ба Радиои Озодӣ гуфтанд, тамоми тарҳҳои онҳо, ки аз тарафи сафорати Амрико ё ташкилоти “Интернюс” сармоягузорӣ мешуд, рӯзи 27-уми январ пурра қатъ шуд.
Хабаргузории “Азия-Плюс” низ навишт, тамоми грант ё маблағҳои бебозгаште, ки аз сӯи сафорати Амрико барои ҷомеаи шаҳрвандӣ дода мешуд, бас шудаанд.
Иёлоти Муттаҳида яке аз кумакрасонҳои асосии Тоҷикистон буд ва ба ҷуз ҷомеаи шаҳрвандӣ, инчунин, ба ниҳодҳои қудратӣ, бахусус марзбонон ёрӣ мерасонд.
Тибқи иттилои расмӣ, Амрико давоми 33 сол ба Тоҷикистон зиёда аз 2 миллиард доллар ёрӣ додааст.
Кумакҳои хориҷии Иёлоти Муттаҳидаи Амрико бо сари кор омадани маъмурияти Доналд Трамп ҳадди ақал барои се моҳ боздошта шуданд.
Хабаргузории “Рейтерс” навишт, Марко Рубио, котиби давлатии Амрико, бо судури як қарор, ба ҷуз ёрӣ ба Исроил ва Миср, ирсоли кумакҳои хориҷиро ба ҷойҳои дигар то 90 рӯз қатъ кардааст.
Иттиҳоди Аврупо муҳлати таҳримҳоро алайҳи Русия дароз кард
Кишварҳои узви Иттиҳоди Аврупо таҳримҳоро алайҳи Русия барои ним соли дигар тамдид карданд.
Дар ин бора Рикард Йозвяк, хабарнигори Радиои Аврупои Озод/Радиои Озодӣ, рӯзи 27-уми январ гузориш дод.
Муҳлати таҳрим алайҳи Маскав 31-уми январ ба анҷом мерасид. Хабар дода шудааст, ки Маҷористон (Венгрия) баъди дароз шудани муҳлати таҳримҳо эътирози худро пас гирифт.
Интизор меравад, барои қонеъ кардани Маҷористон, Иттиҳоди Аврупо дар бораи амнияти энергетикии ин созмон изҳорот қабул кунад.
Дар матни изҳорот омадааст, ки Иттиҳоди Аврупо аз Украина кафолате мехоҳад, ки Киев роҳи интиқоли нафти Русияро ба Аврупо намебандад.
Тасмими Украина барои қатъи интиқоли гази русӣ аз қаламраваш пештар эътирози Маҷористон ва Словакияро ба миён оварда буд.
Иттиҳоди Аврупо баъди ҳамлаи бедалели Русия ба хоки Украина дар моҳи феврали соли 2022, алайҳи Маскав таҳримҳо ҷорӣ кард.
"Аз 5 сол то ҳабси абад". Ҳукми 9 муттаҳами ҳамла ба раиси ҲХДТ дар Кӯлоб
Афроде, ки дар тарконидани мошини раиси ҲХДТ дар шаҳри Кӯлоб гумонзад буданд, аз панҷ сол то ҳабси абад, ҳукм гирифтаанд. Ҳамла ба мошини раиси ҳизби ҳоким дар Кӯлоб, моҳи январи соли гузашта рух дода буд.
Ҳамзаалӣ Мусофиров, додситони минтақаи Кӯлоб рӯзи 28-уми январ дар нишасти хабарӣ ниҳодаш эълон кард, ки Бахтиёр Маҷидзода, Наврӯзҷон Одинаев, Қурбоналӣ Воҳидов, Аслам Олтиев, Акмал Шерматов, Саидмаҳмуд Шоев, Ҳоким Имомов, Насим Ашӯров ва Холисамо Раҳимова дар пайванд ба ин ҳодиса дар курсии айбдорӣ нишаста буданд.
Ба иттилои додситонӣ, ягона зан дар ин парванда Холисамо Раҳимова, панҷ сол ҳукм гирифтааст, аммо бинобар кӯдаки хурдсол доштан, дар озодӣ қарор дорад.
Маълум нест, ки ҳукми додгоҳ дар нисбати ин афрод кай эълон шудааст. Назари наздикони маҳкумшудаҳо низ ба ҳукми додгоҳ ҳанӯз дастрас нест.
Ин парванда аз сӯи муфаттишони Вазорати корҳои дохилӣ ва Кумитаи давлатии амнияти миллӣ таҳқиқ ва ба Додгоҳи Хатлон фиристода шуда буд. Манобеъ қаблан ба Радиои Озодӣ гуфта буданд, ки "парванда бар асоси банди "терроризм" ва "даъват барои бо зӯр тағйир додани сохти конститутсионӣ", баррасӣ мешавад.
Мошини хидматии Салим Сайвализода рӯзи 5-уми январи 2024 дар хонааш дар деҳаи Тудакафш таркид ва худаш маҷрӯҳ шуд. Манобеи расмӣ дар аввал ҳодисаро "қасди куштор" гуфтанд.
Вазири корҳои дохилии Тоҷикистон Рамазон Раҳимзода чанд рӯз баъд аз ҳодиса, таркишро "амали террористӣ" хонд ва гуфт, ин кор аз сӯи "гурӯҳи муташаккили ҷиноӣ содир шуд".
Вазири корҳои дохилӣ он замон ҳамчунин гуфта буд, дар робита ба ин ҳодиса "шумораи зиёде дастгир шудаанд". Аммо Рамазон Раҳимзода ба хотири халал нарасондан ба рафти тафтишот, шумори боздоштшудагонро ошкор накард. Ӯ танҳо илова кард, ки муфаттишони ВКД ва КДАМ ҳодисаро таҳқиқ доранд.
Ҳизби халқӣ-демократӣ, ки додгоҳ нӯҳ касро барои таркондани мошини як раҳбари маҳаллиаш ба ҳабс маҳкум кард, ҳизби ҳоким дар Тоҷикистон аст. Раҳбараш президент Эмомалӣ Раҳмон аст ва аксари мансабдорони тоҷик узви ҳамин ҳизб буда, бештари курсиҳои порлумонро ҳам намояндагонаш дар ихтиёр доранд.
Дар як сол дар корхонаҳои Тоҷикистон 30 кас ҳалок шудааст
Мақомоти тоҷик мегӯянд, ки соли гузашта дар корхонаҳои кишвар 48 ҳодисаи нохуш сар задааст, ки бар асари онҳо 30 тан ба ҳалокат расида, 26 каси дигар ҷароҳат бардоштааст.
Ба иттилои Хадамоти назорати давлатии бехатарии корҳо дар саноат ва соҳаи кӯҳкорӣ, сабаби асоси ин ҳодисаҳо, "бемасъулиятии муҳандисиву техникии кормандони корхонаҳо дар ҷойи садамаҳо" будааст.
Масъулини ин ниҳод рӯзи 28-уми январ зимни нишасти хабарӣ гуфтанд, ки дар пайи ин ҳодисаҳо, 27 шахси мансабдор ва 5 шахси ҳуқуқӣ ба ҷавобгарӣ маъмурӣ кашида шудаанд.
Аз ҷумла, дар натиҷаи ҳодисаи нохуше дар маҳалли сохтмони неругоҳи барқии "Роғун", рӯзи 12-уми ноябри соли 2024 се коргар ба ҳалокат расида, як каси дигар маҷруҳ шуд.
Санъат Асо, сардори Хадамоти назорати бехатарии корҳо дар соҳаи саноат ва куҳкорӣ рӯзи 28-уми январ зимни нишасти хабарӣ гуфт, ки дар пайи ҳодисаи рӯзи 12 ноябри соли 2024 дар "Роғун", алайҳи ду тан парвандаи ҷиноӣ боз шудааст. Ӯ гуфт, ки ниҳоди онҳо хулосаи техникии худро дар ҳаҷми 500 саҳифа омода ва Додситонии шаҳри Роғун супурдааст. Додситонӣ ин парвандаро пеш мебарад.
Мақомот маблағи умумии ҷаримаҳо бар асари ҳодисаҳо дар соли 2024-ро 1822080 сомонӣ шумурдаанд. Дар маҷмуъ, дар соли гузашта 340 шахси ҳуқуқӣ, мансабдор ва воқеии корхонаҳо ба ҷавобгарии маъмурӣ кашида шудаанд.
Аз ҳисоби ҷаримаҳо ба буҷа $40 млн ворид шудааст
Соли 2024 маблағи ҷаримаҳо дар Тоҷикистон аз пешбинии мақомот як баробар бештар ҷамъ шудааст.
Тибқи як санади Вазорати молия, ки Радиои Озодӣ ба он шинос шуд, соли гузашта аз ҳисоби ҷарима ва муҷозотҳо ба буҷаи кишвар қариб 430 миллион сомонӣ ё наздики 40 миллион доллар ворид шудааст.
Ин дар ҳолест, ки саҳми ҷаримаҳо дар буҷаи соли 2024 ҳамагӣ 215 миллион ё ҳудуди 20 миллион доллар пешбинӣ шуда буд.
Мақомот ҳанӯз нагуфтаанд, ки сабаби як баробар зиёд шудани маблағи ҷаримаҳо чист.
Сокинон, бахусус ронандагон, аз ҷаримаҳои зиёд ва ҳангуфт шикоят доранд.
Тоҷикистон як санади муҳим дар бораи маъюбонро қабул мекунад
Тоҷикистон аввали соли 2025 Конвенсия оид ба ҳуқуқи маъюбонро тасвиб мекунад. Дар ин бора намояндагони Ваколатдор оид ба ҳуқуқи инсон 27-уми январ зимни нишасти хабарӣ изҳорот доданд.
Ба гуфтаи Сайдалӣ Бобохонзода, як намояндаи Ваколатдор, Нақшаи миллӣ барои қабули Конвенсия оид ба ҳуқуқи маъюбон таҳия шуда, қарор аст аввали имсол тасвиб шавад. Аммо Бобохонзода ягон санаи мушаххасро зикр накард.
Конвенсия оид ба ҳуқуқи маъюбон ҳанӯз соли 2018 аз сӯи раиси ҷумҳур Эмомалӣ Раҳмон имзо шуда, вале Тоҷикистон то ҳол онро пурра тасвиб накардааст.
Тоҷикистон яке аз 6 кишвар дар ҷаҳон мебошад, ки Конвенсия дар бораи ҳуқуқи маъюбонро пурра қабул ва иҷро накардааст.
Санади мазкур ҳамаи масоили марбут ба ҳуқуқи маъюбонро дар бар мегирад ва декабри соли 2006 аз тарафи Маҷмаи умуми СММ қабул шуд. Ҳуҷҷат соли 2008 ба қувваи иҷро даромадааст.
Баъди тасвиби Конвенсия оид ба ҳуқуқи маъюбон, кишварҳо муваззаф мешаванд барои ашхоси имконияти ҷисмониашон маҳдуд шароити хуб фароҳам кунанд.
Вокуниши як мансабдори тоҷик ба силсилаи гузоришҳо дар CNN
Вазири фарҳанги Тоҷикистон ба нашри силсилаи матолиб дар телевизиони CNN вокуниш кард. Дар он Абуалӣ ибни Сино, Аҳмади Фарғонӣ, Муҳаммад Хоразмӣ ва Абурайҳони Берунӣ ҳамчун донишмандони узбек муаррифӣ шудаанд.
Матлубахон Сатториён рӯзи 27-уми январ дар нишасти хабарӣ дар Душанбе гуфт, "бидуни ба инобат гирифтани сарчашмаҳои таърихӣ мероси адабии миллати моро ба миллати дигар мутааллиқ медонад, ки мутаассифона хеле баҳсбарангез аст. Ин андешаҳо безамина ҳастанд. Изҳороти расмии кишвари ҳамсоя нест. Посух бояд ба ин амал бо риояи меъёрҳои дипломатӣ, қотеъона, вале дар ҳамин поя бояд бошад."
Мавзӯи мансубияти миллии чеҳраҳои илму адаб ва мероси фарҳангиву таърихии ниёгони мардуми Варорӯд борҳо мавриди баҳс қарор гирифтааст.
Таърихдон Некрӯз Сафарзода мегӯяд, ин баҳсҳо дар муҳити илмӣ кайҳо ҳал шудаанд.
“Ин масъалаест, ки аслан қобили баҳс нест. Аз худи осори ин бузургон метавон порчаҳое дарёфт кард, ки ишорат мекунанд ба тааллуқоти миллии худашон,” – хулоса кард ӯ.
Видеоро дар инҷо бинед:
Озодии як шаҳрванди Амрико аз зиндоне дар Беларус
Анастасия Нуфер, шаҳрванди Амрико, аз зиндоне дар Беларус озод карда шудааст.
Марко Рубио, котиби давлатӣ ё вазири умури хориҷии Амрико, дар ин бора рӯзи 26-уми январ хабар дод.
Ӯ дар шабакаи иҷтимоии “Х” навишт, ки Нуфер дар замони маъмурияти Ҷо Байден дастгир шуда буд.
Тафсилоти боздошти Анастасия Нуфер маълум нест. Минск ҳеч гоҳ номи ӯро фош накардааст.
Светлана Тихановская, раҳбари мухолифони Беларус, аз раҳоии Нуфер истиқбол ва ҳамзамон ба вазъи зиндониёни сиёсӣ дар Беларус таъкид кард.
Ӯ гуфт: “Ҳар яке аз онҳо бояд озод карда шаванд. Мо муборизаро барои раҳоии касоне, ки ноодилона дастгир шудаанд, давом хоҳем дод.”
